Itá Kot A Meefieni Meefien Aramas?

MINNE FÉRIEN KOT KEWE RA ÁITI NGENIKICH

Ewe napanap weweiti meefien aramas a wewe ngeni “ewe tufichin meefieni meefien pwal emén are weweiti minne a fis ngeni ren óm anchangei ika epwe met meefiom ika a fis ngonuk minne a fis ngeni eménna.” Emén sousile usun ekiekin aramas itan Dr. Rick Hanson, a erá pwe aramas ra uputiw nge a fen nóm rer ena napanap.

EKIEKI EI: Pwata a nóm rech ena napanap weweiti meefien emén, ewe napanap mi fókkun amwarar ese nóm ren pwal ekkewe ekkóch ménúmanaw? Ewe Paipel a áweweei pwe Kot a féri aramas lón pwisin napanapan. (Keneses 1:26) Kich sia ffér lón pwisin napanapen Kot, weween sia tongeni áppirú napanapan kewe me pwári napanapan kewe mi amwarar. Ina popun, atun sia álisi ekkewe ekkóch pokiten ewe napanap weweiti meefien emén, ren enletin sia áppirú ach we Chón Fératá mi tong Jiowa Kot lón napanapan le weweiti meefien aramas.​—Än Salomon Fos 14:31.

MINNE PAIPEL A ÁITI NGENIKICH USUN ÁN KOT MEEFIENI MEEFIEN ARAMAS

Kot a meefieni meefiach me a oput atun sia kúna riáfféú. Áwewe chék iei alon Paipel usun ekkewe chón Israel lóóm mi likiitú fán ar slave lón Isip me mwirin ra nóm lón ewe fénúpéén fán weires úkúkún 40 ier: “A lolileniesini ar kewe riaffou, lupwen an rong ar we pupuchor.” (Kölfel 106:44, TF) Nengeni pwe Kot ese chék silei usun ar kewe weires. A tongeni pwisin meefi metekiir. A erá: “Üa pwal silei ar weires meinisin.” (Ekistos 3:7) Kot a pwal erá: ‘Chokewe mi atapakemi ra atapa fituken lon mesei.’ (Sekaraia 2:8) Atun aramas ra eriáfféúkich, letipan a metek usun chék letipach.

Inaamwo ika sia pwisin apwúngúkich me sia meefi pwe sise fich ngeni án Jiowa epwe meefieni meefiach, nge ewe Paipel a alúkúlúkúkich pwe “Kot a tekia seni mwelien letipach, a pwal silei mettoch meinisin.” (1 Johannes 3:19, 20) Kot a silekich lap seni pwisinkich. A unusen silei nónnómuch, ekiekich, me meefiach. Me a meefieni meefiach.

Ekkeei Wokisin ra alúkúlúkúkich

• “Lupwen kopwe iotek, üpwe aüselingok, nge lupwen kopwe kökköriei, üpwe apasa, ‘Ngang iei.’”​—AISEA 58:9.

• “Pun ngang üa silei mine üa ekieki ngenikemi. Üa ekieki feiöchümi, nge sap feiengauemi, pwe üpwe ngenikemi eu fansounöch me apilükülük. Mürin oupwe köriei, oupwe feito o iotek ngeniei, nge ngang üpwe aüselingakemi.”​—JEREMAIA 29:11, 12.

• “Kopwe osupwalong chönün mesei lon om rume. Ifa usun, kosap aleaniir?”​—KÖLFEL 56:8.

KOT A ÁFÁNNIKICH, WEWEITIKICH, ME A MEEFIENI MEEFIACH

Itá ach silei pwe Kot a meefieni meefiach epwe álisikich le likiitú fán weires? Ekieki usun pwóróusen Maria:

A erá: “Ua meefi pwe a mmen áweires manawei me uren pwúngúngaw mwirin ai meefi ámmetekin málóón nei we át, 18 ierin mwirin an likiitú fán an kanser ren úkúkún 2 ier. Ua song ren Jiowa pwe ese angolong me echikara nei we!

“Mwirin wonu ier, emén chienei mi tongeei me chúngú meefiei me lón ai we mwichefel a aúseling ngeniei atun ua pwáraawu meefiei pwe Jiowa ese tongeei. Mwirin an aúseling ngeniei ren fitu awa ese pékúetiw ai fós nge a eráátá eú wokisin mi achchúngúei, ina 1 Johannes 3:19, 20, a erá: ‘Kot a tekia seni mwelien letipach, a pwal silei mettoch meinisin.’ A áweweei pwe Jiowa a weweiti ach riáfféú.

“Inaamwo ika a ereniei ena, nge a chúen weires ngeniei ai upwe likitaló ai song! Mwirin ua álleani Kölfel 94:19, ewe mi erá: ‘Lupwen a wor chomong ai öürek, en ka achipaei o apwapwai lelukei.’ Ua meefi pwe a mak ena wokisin fán itei! Ló, ló, ló, ua mmen kinamwe le fós ngeni Jiowa usun ai weires pokiten ua silei pwe a aúseling ngeniei me a weweitiei.”

A ifa me oururun letipach le silei pwe Kot a weweitikich me tongekich! Nge pwata a fiffis chómmóng riáfféú? Itá pokiten Kot a apwúngúkich pokiten met minne mi ngaw sia féri? Itá Kot epwe féri ese lifilifil met le aúkatiw riáfféú meinisin? Epwe pélú ekkena kapas eis lón en lesen mwirin ei.