Arap ngeni Kot
A Weweiti Ach Letipeta
“UA WESEWESEN meefi om letipeta.” A ina ussun emön Chon Pwäratä Jiowa misineri mi chinnap a aweweei eü napanap mi fokkun aüchea. Jiowa a äkkäeüin meefi meefiach. A pwisin meefi riäfföün nöün kewe aramas. Pwata sipwe lükü ena mettoch? Än Jiowa meefi meefiach a pwäpwälo lon alon me föfförün Jises kewe atun a nonnom woon fönüfan. (Jon 5:19) Awewe chök, ekilapei met Jon 11:33-35 a aweweei ussun.
Lupwen Lasares, chienen Jises we, a mälo nge an mälo a chök weiweitä, Jises a pwerelo lon sopwun Lasares we. Itä pwata fefinen Lasares kewe, Meri me Marta, resap fokkun letipeta. Jises a fokkun tongei ena famili. (Jon 11:5) Iwe, met epwe föri? Ewe Paipel a apasa: “Lupwen Jises a kuna an [Meri] kechiu, pwal an ekkewe re Jus kechiu, ekkewe mi fiti i, ngunun a fakkun chouchou o a mairu, nge a apasa, ‘Ia oua isetiu atewe ie?’ Ra apasa ngeni i, ‘Samol, kopwe chok feilo o nengeni.’ Iwe, Jises a kechiu.” (Jon 11:33-35) Pwata Jises a kechiu? Pwüngün, chienan we Lasares a mälo, nge Jises epwele amanauasefällietä. (Jon 11:41-44) A wor pwal eü mettoch a achchüngü letipen Jises?
Nengenisefälli alon ewe wokisin a mak asan. Lupwen Jises a küna än Meri me chienan kewe kechiu, a “ngüngü” me “chouchou.” Ekkewe popun kapas ewe Paipel a mak lon a wewe ngeni memmeef mi fokkun pöchökkül.a Letipen Jises a fokkun chchüng ren minne a küna. A pwäpwälo ükükün choun meefian ren an a kechiu. A ffat pwe letipen Jises a chchüng ren än aramas letipeta. Ese pwal sürütiü chönün mesom ika emön attongom we a kechiu?—Rom 12:15.
Än Jises meefi meefien aramas a äiti ngenikich ussun napanapen me föfförün Seman we, Jiowa. Chechchemeni pwe Jises a unusen mwirifichi Seman we ren napanapan kewe pwe a tongeni apasa: “Ewe mi kunaei a fen kuna ewe Sam.” (Jon 14:9) Ina popun, lupwen sia älleäni pwe “Jises a kechiu,” sia tongeni lükülük pwe Jiowa a pwal pwisin meefi meefien nöün kewe chon fel mi letipeta. Enlet, ekkewe ekkoch sou makkei puken Paipel ra alükülükü ena mettoch. (Aisea 63:9; Sekaraia 2:8) A ifa me watteen än Jiowa tong me kirekiröch!
Lupwen aramas ra meefi meefiach, sia mochen chiechi ngeniir. Ika sia letipechou are letipeta, sia mochen nom ren emön mi weweiti ach kewe osukosuk me meefi ach riäfföü. A fen ina me lapoloon ach mochen arap ngeni Jiowa, emön Kot mi ümöümöch a meefi ach letipeta me a weweiti ewe popun sia kechiu!—Kölfel 56:8.
[Footnote]
a Fän chommong, ewe kapasen Krik mi aföü ngeni än Jises “kechiu” a wewe ngeni “a sür chönün mesan,” iwe nge, ewe kapas mi aföü ngeni än Meri me chienan kewe kechiu a tongeni wewe ngeni “leüwommong le kechiu, püpüchör.”