En Mi Silei?

Ifa wisen emén souwa lón fansoun lóóm?

LÓN fansoun lóóm, emén souwa a wisen túmúnú imwen are leenien emén. Ekkewe kapasen Krik me Ipru mi afféúni “souwa,” fán ekkóch a tongeni wewe ngeni emén chón emmwen are emén meilapen chón túmúnú eú imw.

Lupwen Josef, néún Jakop we, a slave lón Isip, a wiliti emén souwa lón imwen néún we masta. Néún we masta ewe re Isip a “anomu fän nemenemen Josef meinisin mine a eäni.” (Ken. 39:2-6) Mwirin och fansoun, lupwen Josef a wiliti emén sounemenemen Isip mi watte manan, a ewisa ngeni emén pwe epwe wisen souwa are túmúnú imwan we.​—Ken. 44:4.

Lón ránin Jesus we, ekkewe soufénú ra nóm towau seni ar kewe atake. Iwe ra ewisa ngeni emén souwa an epwe wisen masa ekkewe chón atake iteiten rán.

Ié a fich ngeni ewe wis souwa? Emén soumak seni Rom itan Columella lón fansoun ekkewe popun Chón Kraist, a erá pwe a lamot ngeni emén slave mi kefilitá le chónemmwen are souwa, an epwe akkomw káé an epwe angangéch. Epwe emén mi “túmúnú pwe ekkewe chón angang repwe féri ar angang, nge esap kirikiringaw ngeniir.” A pwal erá pwe a aúchea seni meinisin án emén souwa esap ekieki pwe a silei mettóch meinisin me epwe kan tipemecheres le káé mineféén mettóch.

Án Kot we Kapas a eáni áwewe emén souwa me an angang ren met a kan fiffis lón ewe mwichefelin Chón Kraist. Áwewe chék, ewe aposel Paulus a pesei ekkewe Chón Kraist ar repwe áeá tufichiir kewe me ren Kot lón ar álillisfengen “usun chon souani ewe chenin Kot.”​—1 Pet. 4:10, Testament Mi Fö.

Jesus pwisin a áeá pwóróusen emén souwa are chón angang lón an kapas áwewe mi mak lón Lukas 16:1-8. Pwal och, lón ewe oesini usun esissillen an waroto lón an King, a alúkúlúkú néún kewe chón káé pwe epwe seikaatá “ewe chon angang mi allükülük o tipachem,” are souwa mi tuppwél. Ewe ákkáeúin angang ena chón angang are souwa epwe wisen apwénúetá ina an akkawora mwéngé lón pekin lúkú ngeni ekkewe chón tapweló mwirin Jesus atun ewe ránin lesópwólóón. (Mat. 24:45-47; Luk. 12:42) Sia mmen kilisou pwe sia nóm lein chókkewe mi akkangei ena mwéngé lón pekin lúkú ewe chón angang are souwa a ammólnatá mi kawor ngeni unusen fénúfan mi apéchékkúla ach lúkú.