Ifa ewe Minen Tümün lon Pioing Mi Öch Seni Meinisin?
“Emön mi etiwa ewe minen tümün lon pioing ese fiti chcha a küna ewe sokkun tümün mi öch seni meinisin lon pekin reirei.” Ina alon Dr. Michael Rose, medical director me anesthesiologist. Met a kapachelong lon ekkewe “minen tümün lon pioing ese fiti chcha”? A lamot kopwe silei pwe kopwe tongeni filiöch ren met sokkun minen älillis me reirei lon pioing kopwe etiwa. Kopwe katol ewe video No Blood—Medicine Meets the Challenge. Mwirin, ppi ika ka weweiti ewe video ren om sotun pölüeni ekkewe kapas eis fän.—Chechchemeni: Sam me in repwe ekieki ika nöür kewe kükkün semirit repwe pwal katol pun epwe fich lon ewe video än ekkewe tokter rei aramas.
(1) Ifa populapen än Chon Pwäratä Jiowa rese angei IV chcha? (2) Chon Pwäratä Jiowa ra kan etiwa met sokkun minen älillis lon pioing? (3) Ifa an ekkewe chon semwen pwüngün filatä? (4) Pwata emön a pwäratä mirit ika a filatä an epwe chök etiwa ekkewe minen älillis me lükün IV chcha? (5) Lupwen watte chcha a towu seni emön, ikkefa ekkewe ruu mettoch mi lamot ekkewe tokter repwe akkom föri? (6) Ikkefa ekkewe rüänü allük ekkewe minen älillis me lükün IV chcha ra longolong woon? (7) Ifa ussun ekkewe tokter mi tongeni (a) ekisalo ükükün ewe chcha epwe kusu seni emön, (b) tümünü ekkewe cell mi par, (c) älisi förün chcha lon inis, me (d) äeäsefällin ewe chcha a fen kusu seni emön? (8) Aweweei ekkeei minen älillis (a) hemodilution me (b) cell salvage. (9) A lamot kopwe silei met ussun ekkewe minen älillis me lükün IV chcha? (10) Ekkewe tokter mi tongeni föri ekkewe sokkun reirei mi weires nge resap äeä chcha? (11) Met sokkun siwil mi öch mi fisitä iei lein ekkewe mwichen tokter?
Pokiten minne emön a käeö seni Paipel, mwelien letipan epwe pwisin filatä ika epwe etiwa ekkewe minen älillis a fich lon ei video. Ka fen filatä menni ekkewe minen älillis me lükün IV chcha kopwe etiwa fän itom me noum kewe semirit? A lamot pwe kopwe pwal esile ngeni chon om famili rese fiti ach lükü ussun filiom me met ewe popun om lükü.—Nengeni “Question From Readers” lon ewe Leenien Mas, lon fosun Merika, minen June 15, 2004, me October 15, 2000.