Eü Pisek Aüchea, Eü Wis Mi Älükülük Ngenikich
1 Ewe aposel Paul a aücheani wisan we seni Kot ewe angangen afalafal me a kapas ussun pwe a löllö ngeni eü “pisek auchea.” (2 Kor. 4:7) A likiitü le apwönüetä wisan we fän weires me riäfföü mwääl. Ese mölülü le afalafala ese lifilifil ia aramas ra nom ie. A säi fän chommong woon fönü me matau fän weires me feiengaü. Ifa ussun sipwe äppirü Paul me pwäratä pwe sia pwal aücheani ewe angangen afalafal? (Rom 11:13) Ifa ussun ewe angangen afalafal a ussun chök eü pisek mi kon aüchea seni meinisin?
2 Eü Pisek Mi Kon Aüchea: Ekkewe pisek aüchea woon fönüfan ra atoto feiöch nge ese nomottam me a pwal efisi letipengaü. Iwe nge, ach angangen afalafal a atoto ngenikich pwal ngeni aramas feiöch mi nomofochelo. (1 Tim. 4:16) A älisi aramas mi letip wenechar ar repwe silei Jiowa, föri och siwil lon manauer, me eäni ewe äpilükülükün manau esemuch. (Rom 10:13-15) Pokiten sia fokkun aücheani wisach, sia kan pwapwaesini eü manau mi aüchea, meefi menemenöch, me eäni äpilükülüköch.—1 Kor. 15:58.
3 Pwäratä Om Aücheani Ei Pisek Mi Aüchea: Aüchean och mettoch me rech a pwä ren ükükün ekkewe mettoch sia kan pennukuelo fän itan. A ifa me watteen aüchean wisach ach sipwe tongeni fangolo ach fansoun me pöchökkül le mwareiti Jiowa! (Ef. 5:16, 17) Lapalapen ach äeä ach fansoun a ännetatä pwe sia wenewenen alamota ekkewe mettochun ngün lap seni ekkewe mettochun aion. Pokiten mei wor rech ei mettoch mi kon aüchea sia tongeni fang ngeni, sipwe tinikken le afalafal me achocho le apworausa ewe kapas allim iteiten fansoun.
4 Aramas ra kan pwäri ngeni ekkoch pisekiir kewe mi aüchea pwe repwe pwapwaiti le katol nge rese kan aopalo. Ika sia ekieki pwe ach angangen afalafal a ussun chök eü pisek aüchea, epwe fokkun pwälo lon kinikinin manauach. (Mt. 5:14-16) Pokiten sia fokkun meefi kilisou ren ei wis, sipwe pwal äkkäppirü ewe aposel Paul me alamota iteiten fansoun ach sipwe pwäratä pwe sia enletin aücheani ewe angangen afalafal ussun chök eü pisek aüchea.