Aücheani Wisom le Akkafalafal
1. Met ekiekin chommong aramas usun ach angangen afalafal?
1 Chommong aramas lon än Setan ei otot ra ekieki pwe ach angangen afalafal, eü angang mi “umwes.” (1 Kor. 1:19-21) Ika sise tümünüöch, iwe, ena sokkun ekiek mi mwääl epwe tongeni apwangapwangakichelo me akükkünaalo ach achocho. (SalF. 24:10; Ais. 5:20) Met popun sipwe aücheani wisach we, wisen Chon Pwäratä Jiowa?—Ais. 43:10.
2. Pwata ewe angangen afalafal, ina eü angang mi pin?
2 Eü Angang mi Pin: Ewe aposel Paul a äweweei pwe ewe angangen afalafal, ina eu “angang usun eman souasor,” weween eü angang mi pin sia föri fän iten Kot. (Rom 15:15, 16) Ifa usun? Iwe, atun sia akkafalafal, sia “angangfengen” me Jiowa Kot, ewe “a pin,” me sia epinaalo itan we. (1 Kor. 3:9; 1 Pit. 1:15) Me ren Jiowa, ach angangen afalafal, ina “ach asoren mwareiti” i, me eü kinikinin ach fel ngeni.—Ipru 13:15, TF.
3. Met popun ewe angangen afalafala ewe kapas allim, ina eü wis mi fokkun aüchea?
3 Sap minne meinisin ra wisen föri ei angangen afalafala ewe kapas allim. Ekkewe chonläng repwe pwapwa le föri ei angang, iwe, ese mwääl repwe fokkun angangöch. (1 Pit. 1:12) Iwe nge, Jiowa a filikich aramas sise unusöch usun chök “sepi mi för seni pwül” le wiseni ei wis mi aüchea.—2 Kor. 4:7.
4. Ifa usun sia pwäraalo pwe sia aücheani ewe angangen afalafal?
4 Sia Akkomwa Ei Angang: Pokiten sia aücheani wisach le afalafal, sia meefi pwe ina eü me lein ekkewe mettoch mi wesewesen lamot me “fokun mürina” lon manauach. (Fil. 1:10) Ina popun, sia akkota le akkafalafal iteiten wiik. Emön mi sani basket me fiti eü kümi epwe praktis me mwen iteiten eü me eü ekkewe ränin okkuf me achocho le angangöchülo. Pwal ina chök usun, sipwe ammolnatä me mwen ach sipwe lo afalafal pwe sipwe ‘forfichi le anganga ewe kapas mi enlet’ me achocho le angangöchülo.—2 Tim. 2:15; 4:2.
5. Iö a aücheani ach angangen afalafal?
5 Kosap tipengaw ren ekiekin aramas. Chechchemeni pwe mi chüen wor chommong aramas ra kilisou ren ach chuchchuuriir. Iwe nge, sisap akkomwa ach apwapwaai aramas. Nge a lamot chapur ekiekin Jiowa, iwe, a fokkun aücheani ach achocho le afalafal.—Ais. 52:7.