Asukula Noum Semirit le Mwareiti Jiowa
1. Ekkewe semirit ra tongeni mwareiti Jiowa?
1 Kölfel 148:12, 13 a pesei ekkewe ät me nengngin ar “repwe mwareiti iten ewe SAMOL.” Ewe Paipel a masou ren chommong pworaus ussun semirit mi mwareiti Jiowa. Ren chök awewe, “ewe ät Samuel a angang fän mesen ewe Samol mi Lapalap.” (1 Sam. 2:18) Mi pwal wor emön “kükün nengin” ewe a ereni pwülüwan Neman we pwe nöün Jiowa we soufos lon Israel a tongeni amoielo ewe rupun pwötür woon Neman. (2 Kg. 5:1-3) Lupwen Jises a tolong lon ewe imwenfel me föri an kewe manaman, “ekkewe semirit” ra wisan kökö “Osanna ngeni Noun Tafit!” (Mt. 21:15) Ifa ussun sam me in repwe asukula nöür kewe semirit ar repwe mwareiti Jiowa?
2. Pwata mi lamot ngeni ekkewe sam me in ar repwe isetiu eü leenien äppirü mi mürinnö fän iten nöür kewe?
2 Leenien Äppirü: Me mwen ar repwe tongeni fotukalong ewe enlet lon letipen nöür kewe, ekkewe semelapen Israel repwe akkom tongei Jiowa me epwe nom lon leluker an kewe allük. (Tut. 6:5-9) Ren om kapasöch ussun ewe angangen afalafal me om fiti ena angang iteiten wiik, nöüm kewe repwe esinna pwe ewe angangen afalafal a aüchea me apwapwa.
3. Ifa ussun emön sister a küna älillis seni än seman me inan we leenien äppirü?
3 Emön sister a apasa: “Lupwen ua wattetä, eörenien äm famili le fiffiti ewe angangen afalafal iteiten wiikend. Uwa küna pwe semei me inei ra fokkun pwapwaiti ar akkafalafal. Iwe, atun äm aua mämmäritä, äm aua ekieki pwe ewe angangen afalafal eü mettoch mi fokkun apwapwa.” Ena sister a wiliti emön chon afalafal ese mwo papatais atun an a fisu ierin me iei a 33 ierin an a fiti ei angangen afalafal full-time.
4. Met weween ach sipwe asukula nöüch kewe ar repwe feffeitä?
4 Asukuler Ar Repwe Feffeitä: Älisi nöümi kewe pwe epwe wor wiser lupwen ra fiti ewe angangen afalafal. Eli ra tongeni wisen fichifich woon ewe asam, ngeni ewe chon imw echö tract, are älleäni eü wokisin. Ren ar föri ekkena epwe lapalo ar pwapwaiti ewe angang me epwe älisiir ar repwe lükülük woon ar tufich lon angangen esilefeili pworausen ewe mwu. Iwe, atun ra mämmäritä epwe lapalo ar fiffiti ewe angangen afalafal. Ina minne, älisiir pwe repwe feffeitä me repwe ekieki met repwe achocho ngeni fän iten ar repwe feffeitä lon ar angangen afalafal.
5. Met emön semirit epwe föri ren an epwe tufichin wiliti emön chon afalafal esaamwo papatais?
5 Mwittir fos ngeni ekkewe elter ika ka meefi pwe nöüm kewe ra fen tufich ngeni ar repwe wiliti chon afalafal resaamwo papatais me pwal lupwen ra pwäralo ar mochen eäni ena wis. Ren ar wiliti emön chon afalafal repwe fokkun ekieki ussun pwisin wiser le mwareiti Jiowa. Chechchemeni pwe ese pwal lamot pwe sileen emön semirit epwe löllö ngeni sileen emön mi watte mi fen papatais me mwen an epwe tufichin wiliti chon afalafal esaamwo papatais. Nöüm we a weweiti ekkewe popun afalafal lon Paipel? A kan amwöchü ekkewe allük lon Paipel ussun manau mi limöch? A mochen fiti ewe angangen afalafal me wiliti emön Chon Pwäratä Jiowa? Ika ina, ekkewe elter repwe tongeni apwüngalo pwe a tufich ngeni an epwe emön chon afalafal esaamwo papatais.—Nengeni Organized to Do Jehovahs Will, pekin taropwe 79-82.
6. Pwata a fokkun lamot ngeni ekkewe sam me in ar repwe asukula nöür kewe?
6 A lamot achocho lon ach asukula nöüch kewe ar repwe mwareiti Jiowa seni lon letiper. Iwe nge, ese wor mettoch mi kon apwapwa ngeni ekkewe sam me in lap seni ar repwe küna nöür kewe le feffeitä lon pekin ngün. Nge lap seni ena, Jiowa a pwapwa lupwen ekkewe semirit repwe apworausa ussun an kewe angang mi amwarar.