Siwil Mi Apwapwa Ngeni Ewe Leenien Mas!
1 Lepoputään ei ier, a fen tori ekkewe mwichefel eü esilesil mi apwapwa:Poputä seni lon January 2008, Ewe Leenien Mas epwe wor ruu kapiin ir mi sokkofesen, eü fän iten aramas meinisin me ewe eü epwe fän iten Chon Pwäratä Jiowa! Eli kopwe fen nenneiruk: ‘Ifa ussun ekkena ruu chassi repwe sokkofesen? Met öchchün an epwe wor ruu kapi mi sokkofesen? Epwe wor mineföön napanap sipwe küna lon ekkena mineföön kapi?’
2 Ifa Ussun Repwe Sokkofesen: Ewe eü chassi lepoputään ewe maram epwe för Fän iten Aramas Ese Lifilifil. Masouen meinisin minne epwe mak lon epwe för fän iten aramas ese lifilifil. Nge ewe eü lukalapen ewe maram epwe för Fän iten ewe Mwichefel nge esap fän iten anöünöü ngeni aramas atun afalafal. Lon ei chassi epwe masou ren ekkewe lesen sipwe käeö lon eü maram, epwe pwal wor pworaus lon epwe apwapwa ngeni ekkewe Chon Pwäratä Jiowa. Ewe chassi Fän iten Aramas Ese Lifilifil, epwe fokkun apwapwa ngeni ekkewe Chon Pwäratä Jiowa nge lapoloon ngeni ekkewe sap ir Chon Pwäratä mi etiwa ewe Paipel. Nge ewe Awake!, epwe chüen chök awenewen ngeni chon älleä ese pwal lifilifil, pachelong chon tipemwaramwareiti lamalam me chokkewe mi fiti och lamalam rese lükü Kraist.
3 Öchchün Kewe: Lon ewe chassi Fän iten ewe Mwichefel, esap chüen lamot epwe wor aweween ekkoch kapas an epwe älisi ekkewe sap ir Chon Pwäratä pwe repwe weweiti, ussun chök ewe kapas “pioneer.” Ei chassi epwe tongeni awora pworaus mi mak pwe epwe weneiti Chon Pwäratä Jiowa me ekkewe Chon käeö mi feffeitä lon pekin ngün. Nge ifa ussun ewe Fän iten Aramas Ese Lifilifil? Pokiten ekkewe pworaus mi kefilitä me napanapen makkan ra för fän iten aramas sap ir Chon Pwäratä repwe fokkun pwapwa le älleäni seni lepoputään tori lesopwolon. Ewer, emön me emön Chon Pwäratä Jiowa epwe küna feiöch seni an älleäni ewe chassi. Pokiten sipwe anöünöü ngeni aramas eü chök Leenien Mas fiti ewe Awake! lon ach angangen afalafal iteiten maram, ach tufichin afalafal epwele mürinnölo.
4 Mineföön Napanap: Ekkoch mineföön napanap ra mmonletä pwe repwe pachelong lon Ewe Leenien Mas Fän iten Aramas Ese Lifilifil. Eü kinikin epwe pworaus woon ekkewe popun afalafal lon ewe Paipel epwe mecheres le weweiti. Ewe eü epwe kapas woon ifa ussun ewe Paipel epwe älisi ekkewe famili. Eü napanapen käeöön Paipel epwe atetteletiu pwe epwe älisi ekkewe säräfö. Epwe wor eü pworaus lon ewe chassi epwe menlapei kapasen lon Paipel pwe epwe asukulakich ussun napanapen Jiowa.
5 Lon unusen Micronesia epwe pwal fis eü siwil mi apwapwa fän iten Ewe Leenien Mas. Lepoputään January 2008, masouen ekkewe chassi mi peres iteiten maram lon fosun Chuuk, Kosrae, Palau, Ponape, me Yap, repwele löllö chök me ewe chassi lon fosun Merika. Ewe lesen iteiten wiik lon ewe Leenien Mas sipwe tongeni käeö epwe chök löllöpök me ewe lesen pwiich kewe woon unusen fönüfan repwe pwal käeö.
6 Sipwe iotek pwe Jiowa epwe efeiöchü ei mineföön kökkööt fän iten Ewe Leenien Mas. Amwo ei chassi, fengen me ewe Awake!, repwe tori chommong aramas mi fichiiti ewe kapas allim.—Mt. 10:11.