Ka kan Nöünöüfichi Unusen ewe Puk?
1 Lon nöüch we Leenien Mas mei wor ekkewe lesen sia kan käeö lon ach mwich iteiten wiik. Nge me lükün ekkena, mei pwal wor ekkoch kinikin lon sipwe tongeni nöünöü le afalafal ngeni aramas. Ekkena kinikinin pworaus ra kefil seni “The Watchtower” lon fosun Merika, ewe a kan katowu iteiten maram fän iten aramas ese lifilifil. Ka kan nöünöüfichi meinisin ekkena kinikin lon Ewe Leenien Mas lon om angangen afalafal?
2 “Met Sia Käeö Seni Jises”: Ei kinikin a fokkun älisikich le poputääni emön chon käeö. Nge ika kesaamwo sotuni ena kinikin, kopwe sotuni le ällea ngeni ewe chon imw itelapen ewe pworaus, mwirin äiti ngeni met Jises a apasa ussun ena mettoch. Ika a chüen pwapwaiti, sopwelo ämi pworausfengen ren om nöünöü ewe itelap kisikis. Ekkewe itelap kisikis ra mak lon itiitin kapas eis pwe repwe älisi aramas ar repwe ekieki woon ewe pworaus. Etiwa ewe chon imw an epwe uwawu meefian ussun ewe kapas eis. Ekis aweweei ekkewe lios me sopwelo ämi pworausfengen lon ewe parakraf mwirin. Oua tongeni pworausfengen woon ekkewe fitu parakraf lon ena atun. Iwe, lupwen ka liwiniti kopwe sopwelo ämi pworausfengen woon ekkewe lusun parakraf. Kopwe mmolnetä le sopwelo ämi käeö lon ewe Kutta puk are pwal ekkoch puk mi kawor lon fosun Chuuk.
3 “Ekkewe Kii Fän Iten Pwapwaan Ewe Famili:” Ei kinikin a äiti ngeni ekkewe mwän pwüpwülü, fin pwüpwülü, me ekkewe sam me in ifa ussun repwe apwönüetä ekkewe kapasen emmwen lon Paipel pwe repwe pwäkini ekkewe sokkun osukosuk mi tongeni atai kinamween ewe famili. Ka pwal tongeni nöünöü ekkena pworaus le älisi aramas ar repwe küna ewe tipatchem seni ewe Paipel.—2 Timoti 3:16, 17.
4 Kinikin Fän Iten Ekkewe Säräfö: Ei kinikin “Fän Iten Ekkewe Säräfö” a eü minen älillis le weweöchüiti eü pworaus lon Paipel. Ka tongeni nöünöü ei kinikin le älisi ekkewe säräfö ar repwe küna älillisöchün ar käkkäeö ewe Kapasen Kot. (Kölf. 119:9, 105) Lupwen ka fos ngeni ekkewe sam me in, ka tongeni menlapei ewe kinikin “Asukula Noum Kewe.” Ekkewe pworaus lon ei kinikin ra tongeni älisi ekkewe kükkün ar repwe käeö ekkoch lesen seni ekkewe aramas lon Paipel. Ka fen akkota le älleaan ngeni noum kewe ekkeei pworaus?
5 Pwal Ekkoch Kinikin: Ewe kinikin “Kapas Eis Seni Chon Ällea” a pworaus ussun eü kapas eis aramas repwe eäni. Ka tongeni fos ussun ei kinikin lupwen ka anöünöü ewe chassi ngeni aramas ese lifilifil. Ewe kinikin “Echö Taropwe Seni . . .” emön misineri are pwal ekkewe ekkoch repwe apworausa pworausen ekkewe weires ra küna lupwen ra afalafal. Ekkeei pworaus ra tongeni älisi ekkewe mi mochen aüseling ar repwe küna pwe ewe kapas allim a fen esilesilfeil woon unusen fönüfan, ina pwönüetään esissillen än Kraist nonnom.—Mt. 24:3, 14.
6 Ewe kinikin “Arap Ngeni Kot,” a longolong woon ewe älleaan Paipel lon ewe Sukulen Afalafal. A tongeni älisi ekkewe mi letip wenechar ar repwe sileöchü Jiowa. Ewe kinikin “Äppirü Ekkewe Aramas Mi Watte Ar Lükü” a älisi chon ällea ar repwe chemeni pwe ekkewe aramasen loom lon Paipel iir wesewesen aramas. Ra tongeni sasingi lon ekiekiir nonnomun ekkeei aramas, ifa ussun ar kefil, ar küna weires me pwäratä ar lükü.
7 Sia mmen pwapwa ren ekkeei kinikinin pworaus lon Ewe Leenien Mas ra mak fän iten ach sipwe nöünöü lon ach afalafal ngeni aramas! Sipwe unusen weweöchüiti masouan ekkeei pworaus pwe sia tongeni nöünöüfichiir lon ach afalafal.