Sia Fokkun Aücheani Wiisach Kewe!
1 Seni loom loom, Jiowa a ngeni nöün kewe chon angang chommong sokkun wiis. A ngeniir wiiser ese lifilifil ika ir mwän are fefin, kükkün are watte, are met nonnomur. (Luk 1:41, 42; Fof. 7:46; Fil. 1:29) Ikkefa ekkewe wiis a fen awiisa ngenikich ikenäi?
2 Ekkoch Wiis Mi Aüchea A Ngenikich: Eü wiis ach sipwe käit me ren Jiowa. (Mt. 13:11, 15) Pwal eü wiis mi apwapwa ach sipwe mwareiti Jiowa ren ach uwawu meefiach lon mwich. (Kölf. 35:18) Ina minne, lupwen a suuk ngenikich ewe fansoun ach sipwe uwawu meefiach lon mwich, sia kan mwasangasangeiti le föri ena. Pwal ina chök ussun, lupwen sia ekieki pwe mi aüchea iteiten kinikin are angang lon mwichefel, sipwe fokkun apwönüetä ena wiis ren unusen ach tufich. Iwe, sia kan fiffiti ewe angangen elimelim me tümünüöchü ach we leenien mwich?
3 Sia pwal pwapwaesini eü liffang mi aüchea, an ewe Epinkepiisom aüseling ngeni ach kewe iotek, nge ina ewe mettoch fite milion aramas ra tipemwaramwareiti ika Kot epwe aüseling ngeni ar kewe iotek. (SalF. 15:29) Jiowa pwisin a aüseling ngeni ekkewe iotek seni nöün kewe chon angang. (1 Pit. 3:12) Ese pwal aükük ika fän fitu sipwe iotek ngeni. A ifa me aüchean ena liffang ren ach sipwe tufichin “iotek fansoun meinisin”!—Ef. 6:18.
4 “Akkangangfengen me Kot”: Eü me lein ekkewe wiis mi fokkun aüchea sia wiiseni ina ach “akangangfengen” me Kot le esilefeili ewe pworaus allim ussun Mwuun we. (1 Kor. 3:9) Ina eü angang mi atoto ngenikich pwapwa me pöchökkül. (Jon 4:34) Jiowa a tufichin apwönüetä ei angang inaamwo ika ese nöünöü aramas, nge, a fen awiisa ngenikich ena wiis pokiten an tongeikich. (Luk 19:39, 40) Jiowa ese pwal ngeni ion ese lifilifil ena wiis. A lamot pwe chokkewe ra fiti ewe angangen afalafal repwe apwönüetä me amwöchü än Kot allük. (Ais. 52:11) Sia kan pwäratä pwe ena wiis a aüchea ngenikich ren ach akkota angangen afalafal pwe epwe eü kinikin mi lamot lon ach kokkot iteiten wiik?
5 Sia eäni eü manau mi aüchea me pwapwa pokiten ekkewe wiis seni Jiowa. (SalF. 10:22) Sisap ekieki pwe ir mi lamot kisikis! Ren ach pwäratä pwe wiisach kewe ra wenewenen aüchea, sia apwapwai Semach we lon läng, I ewe Chon Liffangoto “meinisin sokkun liffang mi murinno.”—Jem. 1:17.