Sipwe Ammwüchü Ach Tinikken Fän Iten ewe Angangen Afalafal
1 Iteiten ier seni 1992, Chon Pwäratä Jiowa ra nöüni lap seni eü bilion awa ren ar tinikken le föri ewe angangen afalafala ewe mwu me föralo chon käeö. A ifa me watteen ach pwapwa lon ach föri ei angang!—Mt. 28:19, 20.
2 Ewer, meinisin kapasen kilisou me mwareiti epwe chök weneiti Jiowa, ewe a kan apöchökkülakich lon ach angangen afalafal lon ekkei “fansoun weires.” (2 Tim. 3:1) Met sipwe föri pwe sipwe sopwelo ach tinikken lon ei angang mi aüchea?
3 Populapen Ach Tinikken: Ach tong mi alolloon ngeni Kot me chon oruch, pwal ach mochen apwönüetä met sia eäni pwon ngeni Jiowa a amwökütükich lon ach angangen afalafala ewe Mwu. (Mt. 22:37-39; 1 Jon 5:3) Ach tong a amwökütükich ach sipwe pennükü ekkewe mettoch pwe sipwe tongeni unusen fiti ei angang.—Luk 9:23.
4 Achocho le Sopwelo Om Tinikken: Ewe chon oputa kich ewe Tefil a fokkun achocho ngeni an epwe akükkünalo ach tinikken lon ewe angangen afalafal. Än aramas rese etiwa kich lon ach territory, ekkewe minen arikirik woon ei fönüfan, weiresin nonnomwuch iteiten rän, me aürekin apwangapwangen inisich, ir ekkoch chök me lein ekkewe mettoch Setan a äeä pwe epwe sotuni le aletipechoukich.
5 Ina minne, sipwe fokkun achocho le sopwelo ach tinikken. A lamot ach sipwe ämääraatä ach we “tongen le popun.” Ren an epwe fis ena, sipwe äkkälleäni än Kot we kapas, ewe Paipel, me alamota ekkewe minen älillis lon pekin ngün seni “ewe chon angang mi tuppwel o tipatchem.”—Pwar. 2:4; Mt. 24:45; Kölf. 119:97.
6 A ffatöch me ren ekkewe oesini lon Paipel pwe ränin Jiowa we fän iten ninniiloon aramas mi ngaü a chök arapoto. (2 Pit. 2:3; 3:10) Pokiten sia weweiti ena, sipwe akammwüchü ach tinikken me unusen fiti ewe angangen afalafal me föralo chon käeö a fiffis iei woon fönüfan!