Atun Fansoun Ei Áchechchem, Kopwe Áppirú Tinikkenin Jiowa me Jesus?
1. Met Chón Pwáraatá Jiowa ra achocho ngeni atun ewe fansoun Áchechchem?
1 Jiowa a apwénúetá fán tinikken minne a tipeni. Aisea 9:7 a fós usun ekkewe ekkóch feiéchún án Kot we Mwú, iei met a erá: “Ewe Samol mi Unusen Manaman epwe tiliken le apwönüetä ei.” Néún Kot we a pwal pwári tinikken fán iten fel mi enlet atun an angangen afalafal wóón fénúfan. (Joh. 2:13-17; 4:34) Iteiten ier atun fansoun Áchechchem, fite million chón afalafal wóón unusen fénúfan ra fókkun achocho le áppirú tinikkenin Jiowa me Jesus ren ar alapaaló ar angangen afalafal. Kopwe pwal emén me leir?
2. Ewe tinikken epwe amwékútúkich le féri met lepoputáán March 7?
2 Angangen Einet Atun Áchechchem: Ewe angangen einet lón ei ier fán iten esilesilen ewe Áchechchem epwe poputá lón Ammól, March 7. Kopwele akkota iei pwe ka tongeni fiti ewe afalafal fán tinikken. Ekkewe mwichefel repwe fókkun meseik atun ra éttúres le fiti ei angangen einet lón ar kewe leenien afalafal úkúkún ar tufich. Kopwe fókkun achocho le etiwa noum kewe chón káé, return visit, chienom chón angang, aramasom, me chienom chón sukul ren óm anéúnéú ngeniir ewe taropween etiwetiw are ren óm áeá ewe jw.org.
3. Ifa usun sipwe tongeni alapaaló ach angangen afalafal fán March me April?
3 Auxiliary Pioneer: Tinikken epwe pwal amwékútúkich le alapaaló ach angangen afalafal. Ese mwáál chómmóng repwe tongeni fiti auxiliary pioneer fán March me April, pún a wor ach kefil le filatá ach sipwe tikeri ewe 30 awa. Atun ámi famili fel are pwisin káé, ekieki fiti iótek ren ifa usun oupwe tongeni féri ena. (SalF. 15:22) Óm mwasangasang fán iten ewe angangen einet epwe amwékútú ekkewe ekkóch ar repwe pwal tinikken lón angangen afalafal. Ika kopwe féri ekkesiwil lón nónnómun manawom pwe kopwe tongeni alapaaló óm angang, iwe, ka ákkáppirú tinikkenin Jesus.—Mark. 6:31-34.
4. Ikkefa ekkewe feiéch epwe feito seni ach ákkáppirú tinikkenin Jiowa me Jesus?
4 Ach ákkáppirú tinikkenin Jiowa me Jesus lón ei fansoun Áchechchem epwe wato feiéch wachemwuk. Epwe chómmóngóló ekkewe repwe rongorong lón ach we leenien afalafal. Sipwe kúna pwapwa me menemenéch seni ach angang ngeni Jiowa, me ach fang ngeni ekkewe ekkóch. (Föf. 20:35) Nge lap seni ena, sipwe apwapwaai ach Kot mi tinikken me Néún we.