Achocho Ngeni le Nöüni Emön Chon Käeö Paipel
1 “Oupwele aneloi mesemi, o oupwe kuna ekkewe malamal, pwe ra fen pwechepwech ren ewe ras.” (Jon 4:35) Än Jises keei kapas ra enletin fichiiti met ekkewe chon afalafal ra küna ikenäi.
2 Iei, sia chüen küna aramas mi letip-wenechar, ir kewe mi mochen käeö än Jiowa kewe al. A pwälo ei ren chommongen mineföön chon käeö ra papatais iteiten ier. Ika ka wesewesen mochen poputäni eü käeöön Paipel, iwe, met kopwe föri?
3 Isetiu Eü Mettoch Kopwe Achocho Ngeni: Akkom, achocho le poputä om kopwe käeö ngeni emön iteitan. Ekkekieki om na goal atun ka fiti ewe angangen afalafal. Pokiten ina wisach ussun Chon Kraist ach sipwe asukula aramas me lükün ach afalafal ngeniir, iwe, kich meinisin sipwe achocho le alapalo ach fansoun lon ei angangen Bible study.—Mt. 24:14; 28:19, 20.
4 Pwal Ekkoch Mettoch Sipwe Ekieki: A fokkun lamot ngeni chon afalafal meinisin ewe iotek mi pop seni letip. Fän ekkoch sia chuuri aramas mi fen iotek an epwe wor emön epwe älisiir le weweiti Paipel. A ifa me watteen ach feiöch ren än Jiowa nöünöükich le küna me osukula ekkena aramas!—Akai 2:7; Fof. 10:1, 2.
5 Emön pwiich we a iotek pwe epwe nöüni emön chon käeö. Mwirin, a atettelalo ekkewe kükkün taropwe, itelapan, En Mi Mochen Alapalo Om Sile Ussun Ewe Paipel? lon an we leenien angang. Iwe, emön fefin a küna me angei ewe tract, a älleäni me poputä le amasoua ewe pworun etiwetiw lon, nge pwiich we a kapas ngeni, iwe mwirin, a poputä le käeö ngeni.
6 Chienach kewe mi lipwäköch le poputä me käeö ngeni aramas ewe Paipel ra tongeni älisuk pwe kopwe tongeni nöüni emön chon käeö. Tingorei Kot pwe kopwe küna emön, me alamota ekkewe älillis meinisin pwe kopwe tikeri om goal. Neman ekiselo chök kopwe pwapwaesini om käkkäeö ngeni emön ewe Paipel.