Ka Tongeni Tikeri Met Ekkewe Ka Achocho Ngeni

1. Ikkefa ekkewe weires ekkóch ra kúna?

KA FEN isettiw eú mettóch ka mochen achocho ngeni lón pekin ngún nge a weires óm kopwe tikeri?b Iká ina, esap chék en ka meefi ena. Áwewe chék, Philip a mochen émúrinnéló me akkalapaaló an ikkiótek, nge a weires an epwe awora fansoun le iótek. Erika a mochen an epwe kan warekkái atun ekkewe mwichen afalafal, nge arapakkan iteiten ekkewe mwiich a chúen waremmang. Fán fite Tomáš a sótun álleani unusen ewe Paipel. A erá: “Úse sani le álleani Paipel. Úa fen sótuni fán úlúngát, nge iteitan úa chék tori puken Lifitikos úa kaúló.”

2. Pwata kosap lichippúng iká a wor eú mettóch ka mochen achocho ngeni nge kesaamwo tikeri?

² Kosap lichippúng iká a wor eú mettóch ka mochen achocho ngeni iei, nge kesaamwo tikeri. Fán chómmóng a lamot fansoun me angang weires, ren ach sipwe tikeri pwal mwo nge eú mettóch mi chék mecheres. Óm mochen tikeri met ka achocho ngeni a pwáári pwe ka aúcheani óm riri ngeni Jiowa me ka mochen angang ngeni lón úkúúkún óm tufich. Jiowa a aúcheani óm achocho. Pwúngún, Jiowa ese erenikich ach sipwe féri minne mi lap seni ach tufich. (Kölf. 103:14; Mik. 6:8) Ina minne atun ka filaatá met ka mochen achocho ngeni, kopwe nochchei pwe ka tongeni tikeri. Iká ina, iwe met ka tongeni féri pwe kopwe tikeri? Iei sipwele pwóróus wóón ekkóch mettóch ka tongeni féri.

APÉCHÉKKÚLA ÓM MOCHEN TIKERI MET KA ACHOCHO NGENI

3. Pwata a mmen lamot an epwe péchékkúl ach mochen tikeri met ewe sia achocho ngeni lón pekin ngún?

³ A mmen lamot an epwe péchékkúl óm mochen tikeri met ekkewe ka achocho ngeni lón pekin ngún. Pún iká a nóm reom ena esin mochen, iwe kopwe angang weires fán itan. Ach mochen tikeri ewe mettóch sia achocho ngeni, a ussun chék enienin en ásepwál mi amwékútú efóch waseres an epwe tori ia we epwe ssá ngeni. Iká ewe ásepwál a chék ekkenien, iwe ewe chón ssáló wóón waan we waseres ese mwáál epwe tikeri ewe leeni a mochen ló ie. Me iká a péchékkúl enienin ena ásepwál, iwe epwe fen mwittir tikeri ena leeni. Pwal ina chék ussuch, iká sia fókkun mochen tikeri met ewe sia achocho ngeni, iwe sipwe angang weires fán itan. Iei alon David, emén Chón Kraist seni El Salvador: “Iká ka fókkun mochen, iwe kopwe fókkun achocho. Kosap mut ngeni och mettóch an epwe eppetuk le tikeri met ka achocho ngeni.” Iwe, met ka tongeni féri iká ese péchékkúl óm mochen?

4. Met sia tongeni iótek ussun? (Filipi 2:13) (Pwal ppii ewe sasing.)

⁴ Iótek ngeni Jiowa an epwe álisuk le apéchékkúlaló óm mochen. Ren án Jiowa we ngún mi fel, a tongeni amwékútuk le tikeri met ka mochen achocho ngeni. (Álleani Filipi 2:13.) Fán ekkóch sia isettiw met sipwe achocho ngeni pokiten sia silei pwe itá ina met sipwe féri, me a éch ena. Nge neman ren enletin sise mochen. Ussun chék ren ei fefin Chón Kraist itan Norina seni Uganda. A isettiw met a ekiekin achocho ngeni an epwe wor néún chón káé, nge ren enletin ese kon lien mochen féri ena pwe a ekieki pwe i emén sense mi lipwákingaw. Nge met a álisi? A erá: “Úa poputá le tingorei Jiowa iteiten rán an epwe álisiei le apéchékkúlaló ái mochen le káé ngeni emén. Lón ena chék pwal atun, úa achocho le émúrinnéló ái angangen asukul. Mwirin fitu maram, úa kúna pwe a lapóló ái mochen káé ngeni emén ewe Paipel. Lón chék pwal ena ier, úa poputá le káé ngeni rúúemén.”

5. Met sia tongeni ekilonei epwe álisikich le apéchékkúlaló ach mochen tikeri met ewe sia achocho ngeni?

⁵ Ekilon wóón met Jiowa a fen féri fán itom. (Kölf. 143:5) Ewe aposel Paul a ekilonei án Jiowa úméúméch mi somwoló ngeni, me ina met a amwékútú an epwe angang weires fán itan. (1 Kor. 15:9, 10; 1 Tim. 1:12-14) Pwal ina chék ussun, iká ka ekkekilonei met Jiowa a fen féri fán itom, iwe epwe péchékkúleló óm mochen tikeri met ewe ka mochen achocho ngeni. (Kölf. 116:12) Áwewe chék, sipwe ppii met a álisi emén Chón Kraist fefin lón Honduras le wiliiti emén regular pioneer. A erá: “Úa ekilonei úkúúkún án Jiowa tongeei. A lukieito ngeni néún kewe aramas. A tongeei me túmúnúei. Ái ekilonei ekkena a apéchékkúlaló ái tongei Jiowa me ái mochen pioneer me angang weires fán itan.”

6. Pwal met a tongeni álisikich le apéchékkúla ach mochen?

⁶ Nefótófót wóón feiéchún óm tikeri met ka achocho ngeni. Nengeni met a álisi Erika ewe sia fen fósun me mwan, ewe a achocho an epwe warekkái atun mwichen afalafal. A erá: “Úa mirititi pwe ái mmangeiti ewe mwiich úa fókkun missini ekkóch feiéch. Nge iká úa warekkái úa tongeni kapong ngeni pwiich kewe me chiechi ngeniir. Úa pwal tongeni aúseling ngeni ekkóch emmwen mi álilliséch lón ái angangen afalafal.” Erika a nefótófót wóón feiéchún an warekkái ngeni ekkena mwiich, iwe a tikeri an na mochen. Ikkefa ekkewe feiéch ka tongeni nefótófót wóór? Iká ka achocho le émúrinnéló óm állea Paipel are iótek, ekieki ifa ussun ekkena mettóch repwe apéchékkúlaló óm riri ngeni Jiowa. (Kölf. 145:18, 19) Iká ka achocho le ámááraatá eú napanapen Chón Kraist kewe, iwe nefótófót wóón ifa ussun ena a émúrinnéló óm ririéch ngeni ekkewe ekkóch. (Kol. 3:14) Pwata kese makeetiw meinisin ekkewe popun ka mochen tikeri ekkena mettóch? Mwirin kopwe chechcheki met ewe ka makeetiw. Tomáš ewe sia fen fósun me mwan, a erá: “Iká a chómmóng popun ach sipwe tikeri eú mettóch, iwe sipwe angang weires le tikeri.”

7. Met a álisi Julio me pwúlúwan we le tikeri met ra achocho ngeni?

⁷ Chiechi ngeni chókkewe repwe tongeni álisuk. (SalF. 13:20) Áwewe chék, ppii met a álisi Julio me pwúlúwan we le tikeri ar mochen alapaaló ar angangen afalafal. A erá: “Áúa filaatá pwe áúpwe chék chiechi ngeni chókkewe repwe apéchékkúlakem le tikeri minne áúa achocho ngeni, me áúa apwóróusa ngeniir ussun ám kana mochen. Chómmóng me leir ra fen tikeri ekkena esin mettóch, iwe ra áiti ngenikem ekkóch emmwen mi álilliséch. Chiechiem kana ra kan pwal eis pwóróusen ewe mettóch áúa achocho ngeni, me ra pwal apéchékkúlakem atun áúa need álillis.”

ATUN SISE KON LIEN MOCHEN ACHOCHO

8. Met a tongeni fis iká sia chék achocho le tikeri met sa achocho ngeni atun chék sa meefi ach mochen? (Pwal ppii ewe sasing.)

⁸ Iwe nge, ren enletin, a wor atun sise mochen féri och pwe sipwe tikeri met ewe sia achocho ngeni. Iká ina, iwe itá a wewe ngeni pwe sisap chúen achocho? Aapw. Áwewe chék, enienin ásepwál mi péchékkúl a mmen lamot ren an epwe amwékútú efóch waseres an epwe tikeri ewe leeni epwe ló ie. Nge a sókkopat péchékkúlen enienin ásepwál, fán ekkóch eli esap pwal mwo nge enien. Iwe itá weween pwe ewe ssáló ese tongeni féri met pwe epwe mwékút? Aapw. Áwewe chék, ekkóch waseres a wor mwesinan are ekkóch a wor fétúner. Ewe ssáló a tongeni áeá ekkena mettóch ren an epwe chúen sássá. Ach mochen achocho ngeni och mettóch a ussun chék ena ásepwál. Fán ekkóch sia fókkun mochen achocho, nge fán ekkóch ese wor ach mochen. Nge iká sipwe achocho atun chék sa fókkun mochen, eli sisap tikeri ekkewe mettóch sa achocho ngeniir. Ewe ssáló a chúen kútta alen an epwe tikeri ikewe a mochen ló ie, iwe pwal ina chék ussun, sia chúen tongeni angang weires le tikeri met ewe sia achocho ngeni, inaamwo iká ese wor rech ewe mochen le féri. Pwúngún pwe ese mecheres ena. Nge atun ka tikeri met ewe ka achocho ngeni kopwe pwapwa. Me mwen ach sipwe pwóróus wóón met sia tongeni féri, sipwe akkomw pwóróus wóón eú kapas eis epwe tongeni ppiitá.

9. Itá sipwe chúen akkachocho ngeni ekkóch angang lón pekin ngún, inaamwo sise enletin mochen? Áweweei.

⁹ Jiowa a mochen ach sipwe angang ngeni fán pwapwa me seni enletin mochenich. (Kölf. 100:2; 2 Kor. 9:7) Iká ina, iwe itá sipwe chúen akkachocho ngeni ekkóch angang lón pekin ngún, inaamwo sise enletin mochen? Nengeni met aposel Paul a féri. A erá: “Üa fokun pöchökül ngeni inisi o anomu fän nemeniei.” (1 Kor. 9:25-27) Paul a eriáni pwisin i le féri minne mi pwúng, inaamwo iká ese enletin mochen féri met Jiowa a apasa an epwe féri. Itá Jiowa a pwapwa ren án Paul angang ngeni? Ewer! Me a efeiéchú an achocho.—2 Tim. 4:7, 8.

10. Ikkefa feiéchún ach sipwe akkachocho ngeni ekkóch angang, inaamwo sise enletin mochen?

¹⁰ Pwal ina chék ussun, Jiowa a pwapwa le kúna ach achocho le tikeri ekkóch angang lón pekin ngún, inaamwo sise enletin mochen. A pwapwa pokiten a silei pwe inaamwo iká sise kon sani ena angang sia féri, nge sia chúen féri pokiten sia tongei i. Jiowa epwe efeiéchú ach achocho, ussun an efeiéchú Paul. (Kölf. 126:5) Iwe, atun sia kúna án Jiowa efeiéchúkich, neman ina met epwe tongeni apéchékkúlaló ach mochen. Iei met Lucyna, emén Chón Kraist fefin seni Poland a erá: “Fán ekkóch, úse mochen ló fiti ewe angangen afalafal ákkáeúin atun úa pekkus. Iwe nge, ewe pwapwa úa kúna atun úa ló afalafal a eú feiéch mi amwarar.” Iwe, sipwe ppii met sia tongeni féri atun ese kon lien wor rech ewe mochen le féri och angang fán iten Jiowa.

11. Ifa ussun Jiowa a tongeni álisikich le apéchékkúla ach nemenifichi pwisinkich?

¹¹ Iótek ach sipwe nemenifichi pwisinkich. Ewe napanap nemenifichi pwisinkich, ina ewe tufichin nemeni ach kewe memmeef me féffér. Fán chómmóng a weneiti ach sipwe nemeni pwisinkich pwe sisap féri minne mi ngaw. Iwe nge, a pwal lamot ach sipwe nemeni pwisinkich le féri minne mi múrinné, ákkáeúin iká sipwe féri eú angang mi weires are eú angang sise wesewesen mochen féri. Chemeni pwe nemenifichi pwisinkich, ina uwaan án Kot we ngún mi fel, ina popun tingorei Jiowa an we ngún mi fel an epwe álisuk le ámááraatá ena napanap mi lamot. (Luk. 11:13; Kal. 5:22, 23, NW) David, ewe sa fós ussun me mwan, a apwóróusa ifa ussun iótek a álisi. A mochen pwe an pwisin káé epwe chék fiffis iteitan. A erá: “Úa kan tingor án Jiowa álillis le ámááraatá ewe napanap nemenifichi pwisinkich. Ren an álillis, úa tongeni akkóta ái kkótun káéén Paipel, me úa féri iteitan.”

12. Ifa ussun Än Salomon Afalafal 11:4 epwe álisikich le tikeri met sia achocho ngeni lón pekin ngún?

¹² Sisap witiwit tori manawach epwe unusen nónnóméch. Wóón ei fénúfan, nónnómuch esap tongeni múrinné fansoun meinisin. Iká sia ekieki pwe sipwap achocho atun sia nónnóméch, iwe eli sisap fókkun tikeri minne sia achocho ngeni. (Álleani Än Salomon Afalafal 11:4.) Iei alon emén Chón Kraist mwán itan Dayniel: “Manawach esap tongeni unusen nónnóméch. Ina popun sisap witiwit tori án nónnómun manawach epwe múrinné, sipwe chék poputá le anganga met sia achocho ngeni.” Emén pwiich lón Uganda itan Paul a apasa pwal eú popun sisap akkachopwa: “Atun sia poputá le achocho inaamwo iká a áweires nónnómuch, iwe a wor eú popun án Jiowa epwe efeiéchúkich.”—Mal. 3:10.

13. Pwata a múrinné ach sipwe poputá ren ekkóch mettóch mi chék kisikis?

¹³ Poputá ren mettóch mi kisikis. Eli sise mochen poputá le achocho pokiten me rech met ewe sia ekiekin tikeri a mmen weires. Iká ina, ka tongeni kinietiw lón fitu kinikin mi kisikis ren an epwe mecheres? Áwewe chék, iká ka achocho le ámááraatá eú napanap, pwata kese akkomw achocho le pwáári lón ekkóch mettóch mi kisikis? Iká ka mochen achocho le álleani unusen ewe Paipel, ka tongeni akkóta le állea fitu chék minich iteitan? Tomáš, ewe sia fós ussun me mwan, a weires le tikeri an mochen álleani unusen ewe Paipel lón eú ier. A apasa: “Úa mirititi pwe ewe kkótun állea úa filaatá ese kii ngeniei. Ina popun úa filaatá ái úpwe sótuni sefál nge úa akkóta le álleani fitu chék wokisin iteiten rán me ekiloner. Iwe, úa poputá le sassanaaló ái állea.” Atun a lapóló án Tomáš pwapwa, a poputá le attamaaló an we fansoun le állea. Ló, ló, ló, a álleani unusen ewe Paipel.c

KOSAP LICHIPPÚNG IKÁ A PPIITÁ OCH METTÓCH A ÁWEIRESUK

14. Met a tongeni fis epwe áweiresikich le tikeri minne sia mochen achocho ngeni?

¹⁴ Inaamwo iká a wor rech mochen are sia nemenifichi pwisinkich, nge sipwe chúen tongeni weires le tikeri minne sia achocho ngeni. Áwewe chék, a tongeni fis mettóch mi weiweitá epwe aosukosukakich, iwe esap chúen wor ach fansoun le anganga met ekkewe sia mochen tikeriir. (Jas. 4:14) Eli sipwe kúna weires mi tongeni elichippúngúkich me apwangapwangaakicheló. (SalF. 24:10) Pokiten sise unuséch, sia tongeni mwáálliló me epwe fen áweiresikich le tikeri minne sia achocho ngeni. (Rom 7:23) Are eli sia chék meefi pekkus. (Mat. 26:43) Met a tongeni álisikich atun sia kúna weires?

15. Pwata sisap fangetá iká a fis och mettóch epwe áweiresikich le tikeri met sa achocho ngeni? (Kölfel 145:14)

¹⁵ Kosap fangetá iká a fis och mettóch epwe áweiresuk le tikeri met ka achocho ngeni. Ewe Paipel a apasa pwe sipwe tongeni kúkkúna weires. Iwe nge, a pwal affata pwe sipwe chúen tongeni akkachocho, ákkáeúin ren án Jiowa álillis. (Álleani Kölfel 145:14.) Philip ewe sia fósun me mwan, a apasa: “Úse kon nefótófót wóón ekkewe fansoun úa ttur, nge úa fen nefótófót wóón ekkewe fansoun úa pwáátá me achochosefál le tikeri minne úa achocho ngeni.” David, ewe sia fósun me mwan a apasa: “Me rei, ekkewe weires úa kúna esap iir minen eppet, nge fen iir alen ái úpwe pwár ngeni Jiowa úkúúkún ái tongei.” Pwúngún, ach akkachocho pwal mwo nge atun a áweires sia pwáári ngeni Jiowa pwe sa mochen apwapwaai. Epwele ifan me pwapwaan Jiowa atun a kúna úkúúkún ach achocho ngeni met ekkewe sia mochen tikeriir!

16. Met ekkewe weires ra tongeni áiti ngenikich?

¹⁶ Káé seni met a fis ngonuk mi áweiresuk le tikeri met ka achocho ngeni. Ekieki met a fis me pwisin eisinuk, ‘Met úa tongeni féri pwe esap fissefál met ewe a áweiresiei?’ (SalF. 27:12) Iwe nge, fán ekkóch, ekkena weires ra tongeni pwáári pwe ese kii ngenikich met sa achocho ngeni. Iká a pwal ina ussun reom, eli mi éch kopwe etittinasefáliir iká mi chúen tufich óm kopwe tikeriir.d Iká kese tikeri met ka achocho ngeni pokiten ese wesewesen kii reom, iwe Jiowa esap ekieki pwe ka sópwongaw.—2 Kor. 8:12.

17. Pwata a lamot sipwe chechchemeni ekkewe mettóch sia fen fériir?

¹⁷ Ekieki met ka fen féri. Ewe Paipel a erá: “Kot esap eäni föför esepwüng, esap manlükala ewe angang oua föri.” (Ipru 6:10) Iwe, itá kosap pwal ménúki minne ka fen féri. Ekieki ussun ekkewe mettóch ka fen achocho ngeniir me lóóm, nge iei ka fen tikeriir, áwewe chék, eli ka fen ámááraatá óm ririéch ngeni Jiowa, fóffós ngeni aramas ussun, me ka fen papatais. Iwe, ka fen feffeitá me tikeri ekkóch mettóch ka fen achocho ngeniir lón óm angang ngeni Jiowa me lóóm, nge iei kopwe chék pwal sópweeló le akkachocho le tikeri met ekkewe ka isettiw óm kopwe achocho ngeniir.—Fil. 3:16.

18. Met a lamot sipwe chechchemeni atun sia akkachocho ngeni met sa mochen tikeri? (Pwal ppii ewe sasing.)

¹⁸ Ren án Jiowa álillis, ka tongeni tikeri met ka achocho ngeni, ussun chék ewe ssáló a pwapwa le tikeri ikewe a mochen ló ie. Nge chemeni pwe chómmóng ssáló ra pwal pwapwaiti ewe fansoun ar sássái. Pwal ina chék ussun, kosap ménúki le meefi pwapwaan óm kúna úkúúkún án Jiowa álisuk me efeiéchuk atun ka akkachocho ngeni met ka mochen tikeri. (2 Kor. 4:7) Iká kosap achanú, watteen feiéch epwe toruk.—Kal. 6:9.