Aururu Ekkewe Mi Letipeta
1 Ese pwal wor eü tappin aramas a osupwangen kaworen aurur. Pokiten sia äppirü ewe emmwen seni ach we King, Jises Kraist, sia pwal mochen “achipa chon luketatakis.”—Ais. 61:1.
2 Napanapen Ach Aururur: Pwe sipwe aururu aramas, masouen ach afalafal epwe itepök me rüüepek me eü minen apöchökkül ngeniir. Kosap kon alapa om fos ussun föfför mi ingaü mi fiffis woon fönüfan me pwal ussun ekkewe afalafal mi chofona, nge kopwe kon menlapei lon ämi pworausfengen ewe enlet lon Paipel me ewe äpilükülük ussun än Kot kewe pwon mi aururukich. Esap weween pwe sisap pwal fos ussun Armaketon. Wisach ach sipwe esilei ussun “ewe ierin än ewe Samol mi Lapalap chen a war, pwal ewe ränin än Kot apwüngü chon oputer,” me öüröüra chon föfföringaü ‘pwe repwe kul seni ar föfföringau.’ Iwe nge, ewe kapasen öüröür ussun Armaketon me ewe watteen kataloon epwe fis, esap itä pwölüelo ewe itelap ussun ewe “kapas allim ussun ewe mwu.”—Ais. 61:2; Is. 3:18; Mt. 24:14.
3 Seni Imw me Imw: Sia kan künakün aramas mi letip tatakkis pokiten samau, mäloon emön atonger kewe, pwüngüngaü me osukosuk lon pekin moni. Pun kich chon äppirü Kraist, sia pwal “fakkun tongei” me meefieni meefien aramas sia chuuri lon ach angangen afalafal. (Luk 7:13; Rom 12:15) Inaamwo ika sia äiti ngeniir eü ika ruu wokisin mi weneiti ar osukosuk, nge sipwe pwäratä pwe sia “muttir le rong,” pwe repwe tongeni pwärawu meefier. (Jem. 1:19) Mwirin ach aüseling ngeniir, sia tongeni tufichin aururur.
4 Lon ewe fansoun mi fich atun sia pwopworausfengen, sia tongeni apasa, “Ua mochen äiti ngonuk och pworausen apöchökkül seni ewe Paipel.” Sipwe tümünüöchü ach fos pwe sisap apwüngü iteiten ekiek mi mwääl emönna a apasawu. Iwe nge, sipwe chök awenewen ngeni ach awora kapasen apöchökkül me aurur ren ach nöünöü Paipel ewe mi kan apöchökküla ewe letip. Ren ei mettoch, ka tongeni angei och pworaus lon ewe Reasoning From the Scriptures (Awewe Seni ewe Paipel) pekin taropwe 117-121 fan ewe itelap “Encouragement” (Minen Apöchökkül). Are anöünöü ngeni ewe chon imw ewe tract itelapan Aurur fan iten Ekkewe mi Letipechou me äiti ngeni ewe minen apöchökkül a mak lon.
5 Kükküttä Fansoun le Aururu Ekkewe Ekkoch: Ka silei emön chon orum, chienom chon angang, chiechiom le sukul, are emön lon om famili mi osupwangen aurur? Pwata kese achocho le chuuriir lon imwer me aururu letiper seni Paipel? Om silei pwe ra osupwang ren aurur, ka tongeni ammolnatä fän iten ena mettoch. Ren ei popun ekkoch ra mak taropwe are kökkö woon fon. Tong enlet ngeni chon oruch epwe amwökütükich le meefi weiresin letiper me awora aurur seni ewe Paipel.—Luk 10:25-37.
6 Ewer, iei wisach pwe sipwe aururu chokkewe mi sengiseng, apöchökkülatä ekkewe mi letipeta, me fotukalong lon letiper ewe äpilükülüköch. Ina ewe aurur aramas woon pwellin fönüfan ra osupwang. Sipwe mwasangasang le fos ussun ekkewe mettoch mi mürinnö Kot a fen pwonetiu, eü minen aurur me äpilükülük fän iten ekkewe mi letip wenechar. Amwo sipwe chechchemeni iteitan ewe lamoten ach sipwe “achipa chon luketatakis.”—Aisea 61:1.