Ewe Ruu Ränin Mwichelap Epwe Älisikich le Tümünü ach Riri Ngeni Kot
1. Ifa ewe eü mettoch mi kawor me ren Jiowa pwe epwe älisikich le arongafetälei ewe kapas allim?
1 Jiowa a kisäseü le awora sile, asukul me kapasen pesepes mi lamot ngenikich ach sipwe föri an angang, ewe angangen afalafala ewe kapas allim. (Mt. 24:14; 2 Tim. 4:17) A kawor ekkena sokkun älillis lon ach Ruu Ränin Mwichelap a fiffis iteiten ier. Eü mineföön prokram epwe menlapei ei itelap “Tümünü Ach Riri Ngeni Kot,” mi longolong lon Rom 8:5 me Juta 17-19. Ei kokkot epwe poputä lon wiiken August 31, 2009.
2. (a) Ifa usun sipwe küna älillis seni ewe ruu ränin mwichelap? (b) Ifa usun ekkewe ruu ränin mwichelap mi fis lon ekkewe ier, ra älisuk lon ewe angangen afalafal?
2 Ifa Usun Epwe Älisikich: Ewe prokram epwe tongeni öüröürakich ren ekkewe minen efeiengaw, usun chök ekkewe mettoch epwe tongeni olusmwäällielo ach fansoun me erikikichelo seni ekkewe mettoch mi fokkun lamot. Sipwe käeö ifa usun sipwe u ngeni ewe sokkun ekiek, pwe ese wor ngawen ach mutatä ekkewe sokkun kapas me föfför mi ngaw me sipwe pwal käeö napanapen emön aramas mi ririöch ngeni Kot. Ewe afalafal mi wor fitu kinikin lon epwe fis lon Ränin Fel, epwe äiti ngeni ekkewe famili pwal emön me emön leich, ifa usun sipwe tongeni apöchökküla ach riri ngeni Kot lon ekkeei fansoun mi chök lallapolo osukosuk me sossotun ach lükü. Ei prokram epwe älisikich le tümünü letipach, apöchökküla ach riri ngeni Kot me ännefotaöchü ekkewe feiöch mi lap sipwe küna ika sia tümünü ach riri ngeni Kot.
3. Ineet epwe fis om ruu ränin mwichelap me met kopwe monetä ngeni?
3 Atun ka silei ineet me ia epwe fis ia ewe ruu ränin mwichelap kopwe akkota pwe kopwe fiti me aüselingöch ngeni eü me eü ekkewe afalafal. Kopwe lükülük pwe Jiowa epwe efeiöchü ekkewe mi tinikken.—SalF. 21:5.
4. Met sia lükülük pwe sipwe angei seni ach ruu ränin mwichelap epwele fis?
4 Pwüngün, Jiowa i ewe chon Awora ei liffang mi mürinnö. Ewe prokram ewe chon angang mi tuppwöl a ammolnatä, ina met a lamot ngenikich le apwönüetä wisach, usun chon Kraist chon afalafal. Sia kilisou ngeni Jiowa fän iten ekkeei mettoch meinisin a fen awora ngenikich fän tong, a älisikich le “akamwochu ach apilukuluk allim sia fen pwarata, o sisap mokutukut.”—Ipru 10:23-25, TF; Jem. 1:17.