Mwareiti Jiowa Iteiten Rän
1. Met nöün Kot kewe chon angang ra üppos le föfföri me pwata?
1 King Tafit a pwäratä an üppos le mwareiti Jiowa “iteiten rän” tori feilfeilo chök. (Kölf. 145:2, 7, 21) Pwal ina usun kich, mei wor popun ach sipwe mwareiti Jiowa iteiten rän.—Kölf. 37:10; 145:14, 18; 2 Pit. 3:13.
2. Ifa usun ekkewe famili repwe tongeni mwareiti Jiowa iteiten rän?
2 Mwareiti Jiowa lon Imwach Kewe: Mei wor nöüch kewe puken älillisin Paipel sia tongeni nöünöü pwe epwe amürinnöloi ach pwoppworausfengen lon ewe lesenin rän, ach pwapwaiti än ewe Famili Fel me mmolnetä fän iten ekkewe mwich. Chommong famili ra eöreni le möngöfengen fän eü iteiten rän, ei fansoun a atufichiir le akkasos me mwareiti Jiowa fän kinamwe me rese pwal atapwal. Ika ekkewe sam me in repwe poputääni ei sokkun pwoppworausfengen repwe tongeni älisi nöür kewe le “fönöör o öüröürer lon ach Samol.”—Ef. 6:4; Tut. 6:5-7.
3. Met a suuk ngenikich atun sia nonnom lein pwiich kewe?
3 Mwareiti Jiowa Lein Pwich Kewe: Lupwen sia fiti ekkewe mwich me ewe angangen afalafal, iei ewe fansoun mi kon mürinnö a suuk ngenikich me pwich kewe ach sipwe mwareiti Jiowa. (SalF. 15:30; Fil. 4:8; Ipru 13:15) Pokiten kich meinisin sia tongei Jiowa a mecheres ach sipwe uwawu meefiach kewe mi pwäratä pwe sia äfänni än Jiowa kirekiröch lupwen sia pwoppworausfengen.—Kölf. 106:1.
4. Me lukun ach sipwe fiti ewe angangen afalafal ineet atun a pwal suuk ngenikich ach sipwe mwareiti Jiowa?
4 Mwareiti Jiowa Atun sia Fos Ngeni Chon Lukun: Eli nonnomun manauach esap mut ngenikich ach sipwe fiti ewe angangen afalafal iteiten rän, nge ach ekis afalafal usun Jiowa me an kewe kokkot ngeni chienach chon angang, chon sukul me ekkewe aramas sia nom leir a tongeni awora eü äpilükülük ngeni chokkewe mi letip wenechar. (Kölf. 27:14; 1 Pit. 3:15) Emön pwiich a afalafal ngeni chienan we chon säi woon sepenin. Ewe chon säi a fokkun küna aurur me apöchökkül seni met a rongorong, iwe a ngeni pwiich we nampaan nöün fon me leenian pwe repwe tongeni sopwelo ar pwoppworausfengen. Lon ei fansoun mi weires ren lapoloon osukosuk me ngangngawoloon nonnomun manauen aramas, nöün Jiowa kewe chon angang ra kan ukkuwei ngeni chokkewe mi mochen aüseling ewe “kapasen feiöch.” A awora ewe äpilükülük mi efisatä än ekkoch repwe mwareiti Jiowa.—Ais. 52:7; Rom 15:11.
5. Pwata sia mochen mwareiti Jiowa me met a efisatä ach föri ena?
5 A ifa me pwapwaan Jiowa le aüseling ngeni nöün kewe chon angang ra kan mwareiti i iteiten rän! Usun chök förian kewe meinisin, sipwe pwal pwäratä lingen Jiowa lon eü me eü rän lon imwach kewe, lein pwiich kewe, me atun sia fos ngeni chokkewe resaamwo fitikich le mwareiti Jiowa.—Kölf. 19:1-4.