Kosap Pireir le Afalafal
1. Ineet a lamot pwora, me pwata?
1 Om niuokkus ika aramas repwe esiitok a pinei om kopwe afalafal lon sukul? A fokkun lamot pwora fän iten om kopwe kapas, äkkäeüin ika ka nisässäü. Met epwe älisuk?
2. Ifa usun ekkewe chon sukul repwe pwäraalo mirit atun ra afalafal lon sukul?
2 Kopwe Pwäraalo Mirit: Inaamwo ika ka ekieki pwe om we leenien sukul, ina pwisin om leenien afalafal, nge esap itä weween pwe kopwe afalafal ngeni meinisin usun chök atun ka afalafal imw me imw. Kopwe pwäri mirit le silei ineet kopwe kapas usun Paipel lon sukul. (SalAf. 3:1, 7) Eli minne oupwe pworausfengen woon are käeö lon sukul epwe atufichuk le pwäratä om lükü. Are, eli emön chon sukul epwe eis ika pwata kese fitiir le föri ekkoch mettoch. Le poputään sukul, ekkoch ra esile ngeni nöür kewe sense pwe iir Chon Pwäratä Jiowa me ra pwal ngeniir ekkoch puk mi äweweei ach lükü. Ekkoch ra anomu nöüch kewe puk woon ar chepel pwe epwe efisi än chiener kewe kapas eis.
3. Epwe ifa usun kopwe tongeni mmolnetä le afalafal lon sukul?
3 Kopwe Mmolnetä: Ika ka mmolnetä, epwe lapolo om lükülük. (1 Pit. 3:15) Iwe, kopwe ekieki me mwan met sokkun kapas eis repwe piitä, me ifa usun kopwe pölüweniir. (SalF. 15:28) Ika mi tufich, kopwe uwei noum Paipel me ekkoch nöüch kewe puk pwe repwe tongeni älisuk le pölüweni kapas eis. Tingorei semom me inom pwe oupwe asossot le pölüweni kapas eis lon ämi famili fel.
4. Pwata kopwe sossopwelo le afalafal lon sukul?
4 Kopwe Ekieköch: Kosap ekieki pwe chienom kewe chon sukul repwe chök ekkesiitok atun kopwe fos usun ewe enlet. Ekkoch repwe fen ingeiti om pwora, iwe, repwe pwal mwo nge aüseling. Nge kosap lichippüng ika ese wor emön a aüselingok. Jiowa epwe pwapwa ren om achocho. (Ipru 13:15, 16) Sopwelo le tittingorei an epwe älisuk le afalafala an kapas “fän pwora.” (Fof. 4:29; 2 Tim. 1:7, 8) Anchangei mwänekum atun emön epwe aüseling ngeni om afalafal. Eli epwe pwal mwo nge wiliti emön chienom le angang ngeni Jiowa!