Ekkewe Mwich fän iten ewe Angangen Afalafal
1. Atun sia lo afalafal, pwata sia mochen an epwe kokkotöch?
1 Jises a isetiw eü leenien äppirü mi mürinnö ren an akkotaöchü ewe angangen afalafala ewe Mwu. Pwal ina chök usun, chokkewe mi emmweni ei angang woon unusen fönüfan ikenäi, ra pwal mochen ena angang epwe kokkotöch. Fän ei sokkun ekiek, ekkewe mwichefel woon unusen fönüfan ra äeä ekkewe mwich fän iten ewe angangen afalafal pwe repwe akkotaöchü ekkewe chon afalafal fän iten ena angang.—Mt. 24:45-47; 25:21; Luk 10:1-7.
2. Met epwe fis lon ekkewe mwich?
2 Eü Kokkot mi Mürinnö: A fis ekkewe mwich fän iten afalafal pwe epwe awora kapasen apöchökkül me emmwen ngeni chokkewe repwele fiti ewe angangen afalafal. Eli repwe pworausfengen usun ewe lesenin rän ika a weneiti ewe angangen afalafal. Fan ekkoch, repwe pworaus ussun ekkewe pesepes seni ewe Ach Angangen Afalafala ewe Mwu, Reasoning puk are Ministry puk. Epwe tongeni fis eü pwoomw usun anöünöün eü puk ngeni aramas. Mwen ewe iotek, meinisin repwe silei iö repwe fiti le afalafal me ikewe repwe afalafal ie. Ekiselo chök mwirin särin ei mwich 15 minich ttaman, meinisin repwe lo.
3. Iö kewe repwe wisen akkotaöchü ekkewe mwich fän iten ewe angangen afalafal?
3 Ifa Usun A Kokkotöch Ekkewe Mwich? Ewe service overseer, epwe wisen akkotaöchü ekkewe mwich fän iten ewe angangen afalafal. Ekkewe chon emmweni kümiin chon afalafal, are nöür kewe chon älisiir, repwe fiti en me an kümiin afalafal lon Ammol me Räninfel. Eli ekkoch elter are ministerial servant repwe tongeni fiti ekkewe chon afalafal seni Särinfel ngeni Enimu. A öch ika ewe service overseer epwe silei angangen ekkewe chon emmweni kümiin chon afalafal pwe epwe naföch ekkewe leenien afalafal imw me imw lon Ammol me Räninfel. Seni Särinfel ngeni Enimu ewe service overseer epwe filatä chokkewe repwe wisen emmweni ekkewe kümiin chon afalafal.
4-6. (a) Pwata ekkewe mwich fän iten afalafal repwe alongolong woon met a fis lon ekkewe leenien afalafal? (b) Ikkefa ekkewe kapas eis epwe älisi ekkewe elter le silei ineet me ia epwe fis ekkewe mwich fän iten afalafal?
4 Ineet me Ia epwe Fis Ekkeei Mwich? Epwe mürinnö ekkeei mwich repwe fis lon ekkewe leeni mi mecheres ngeni chon afalafal ar repwe fiti, lap seni ar repwe mwichfengen lon eü chök leeni. Äwewe chök, lon imwen emön chon afalafal ikewe repwe afalafal ie. Ra pwal tongeni mwich lon ekkewe Kingdom Hall. Chommong mwichefel ra mwich fän iten ewe angangen afalafal lon ar kewe Kingdom Hall mwirin särin ekkewe mwich lon Räninfel. Ekkewe elter repwe akkota pwe ekkewe leenien mwich resap towau seni ewe leenien afalafal. Ina minne, epwe mürinnö ika ekkewe elter repwe ekkenniwili ena kokkot me ppii ika ikewe ekkewe leenien mwich ra nom ie a chüen mürinnö fän iten kkotöchün ewe angangen afalafal.
5 Ewe fansoun epwe fis ekkeei mwich me fän fite lon eü wiik, epwe alongolong woon chon ewe sopw. Eli ekkeei kapas eis fan epwe älisi ekkewe elter pwe repwe filatä ineet me ia epwe mürinnö ar repwe fis ekkewe mwich fän iten ewe angang afalafal.
6 Menni leeni sipwe alapalo ach afalafal lon? Ineet fansoun epwe mürinnö ngeni ewe afalafal imw me imw? Lekuniol, epwe mürinnö ewe angangen afalafal imw me imw are föri return visit? Meinisin ekkewe kokkotun afalafal repwe pachetä woon ewe paap fän iten ekkewe pworaus esilesil. Oukich meinisin chon afalafal sia mochen aunusalo ach afalafal lon ekkewe leenien afalafal tori ewe ükükün sia tongeni apasa usun ewe aposel Paul: “Üa awesala ai angang lon ekei leni.”—Rom 15:23.
7. Ifa wisen ewe chon emmweni ekkewe chon afalafal?
7 Emmweni Ekkewe Mwich fän iten ewe Angangen Afalafal: Ewe emön epwe wisen emmweni ei mwich epwe süföliti kokkotun ewe mwich ren an ammolnafichi. Epwe poputä, nge esap mmang seni kulokun poputä me epwe mwoch, lefilen 10 me 15 minich. Epwe fen nom ren ewe chon emmwen mapun ewe leenien afalafal me mwen poputään ewe mwich. Inaamwo ika sisap witi ekkewe ra mmangoto mwirin särin ewe mwich, nge sipwe föri met repwe silei ren ikewe sipwe afalafal ie. Mwirin chök särin ewe mwich, meinisin repwe mwittir lo ngeni ewe leenien afalafal. Ewe mwich mi kokkotöch me älillisöch epwe awora emmwen ngeni chon fiti pwe repwe apwönüetäöchü ar afalafal lon ena rän.—SalF. 11:14.
8. Ifa usun ekkewe chon fiti ekkewe mwich fän iten afalafal repwe tipeeüfengen me älillisfengen me ekkewe chon emmweni?
8 Fiffiti ewe Mwich fän iten Afalafal: A lamot tipeeüfengen me älillisfengen. (Ipru 13:17) Ika a tufich, ewe chon emmweni ewe kümiin chon afalafal epwe älisi chokkewe mi osupwangen chiener le afalafal. Epwe mürinnö ika ekkewe chon afalafal mi lipwäköch repwe nom pwe repwe älisi ekkewe minefö me ekkewe resaamwo kon lien angöch. Chokkewe mi tipemecheres le fiti emön rese kon lien fiffiti, epwe tongeni wiliti eü minen apöchökkül. (SalF. 27:17; Rom 15:1, 2) Meinisin repwe achocho pwe resap mmang. Ach süföliti ei kokkot me ach tongei chienach kewe chon lükü, epwe amwökütükich le apwönüetä wisach.—2 Kor. 6:3, 4; Fil. 2:4.
9. Ifa usun ekkewe pioneer repwe tongeni awora ar älillis ngeni ei kokkot?
9 Älillis Seni Ekkewe Pioneer: Än ekkewe pioneer fiffiti ekkewe mwich fän iten ewe angangen afalafal epwe eü minen apöchökkül me aüchea ngeni meinisin. Pwüngün pwe mei wor chommong mettoch ekkewe pioneer repwe föri iteiten rän. Lükün ar käeö ngeni aramas me föri return visit, repwe apwönüetä wiser ngeni ar famili me lo angang. Ina pwata, sap minne ekkewe pioneer repwe meefi lamoten ar repwe fiti iteiten mwich meinisin fän iten ewe angangen afalafal, äkkäeüin ika a fis iteiten rän. Iwe nge, eli epwe tufich ar repwe fiti ekkoch me leir iteiten wiik. Ekkewe mwich fän iten ewe angangen afalafal repwe minen käit ngeni chon afalafal, iwe, lipwäköchün ekkewe pioneer epwe pwal watte älillis ngeniir, pun ar fiffiti ewe angangen afalafal a atufichi ekkewe pioneer pwe repwe lipwäköchülo. Iir ekkewe leenien äppirü pokiten ar tinikken le fiffiti ewe angangen afalafal me ar älillis lon ekkewe mwich fän iten ewe angangen afalafal.
10. Pwata a mürinnö ngeni meinisin chon afalafala ewe Mwu repwe letip unus le peppeni ei kokkot?
10 Usun chök Jises me nöün kewe chon käeö, ewe angangen afalafala ewe Mwu imw me imw ina kinikinin ach angang mi nampa eü. A fis ekkewe mwich fän iten afalafal pwe epwe apöchökkülakich me elipwäköchükich lon ei angang. Meinisin ekkewe chon afalafala ewe kapas allim repwe fiti ena kokkot ükükün ar tufich. (Fof. 5:42; 20:20) Iwe, amwo oukich meinisin sipwe föri minne epwe atufichikich le peppeni ei kokkot. Ren ach föri ena, sia tongeni lükü pwe Jiowa epwe älisikich me apwapwaai letipen ach Samol, Jises Kraist, atun sia afalafala ewe kapas allimen än Kot we Mwu.—Mt. 25:34-40; 28:19, 20.