Ekkewe Mwich fán Iten Angangen Afalafal Ra Apwénúetá Popun Ra Kawor
1. Ifa ewe popun a wor mwich me mwen ewe angangen afalafal?
1 Lón eú atun, Jesus a mwich ngeni néún kewe 70 chón káé me mwen repwe feiló afalafal. (Luk. 10:1-11, Testament Mi Fö) A apéchékkúler ren an áchema ngeniir pwe esap iir chék, me Jiowa “samolun ewe räs” I epwe emmweniir. A pwal ngeniir kapasen emmwen pwe repwe lipwákéch le féri ewe angang, me akkóter pwe repwe “akaruemon.” Ikenái, a pwal ina chék usun ekkewe popun ra fis ekkewe mwich me mwen ewe angangen afalafal pwe repwe apéchékkúlakich, elipwákéchúkich me akkótakich.
2. Epwe ifa ttamen ewe mwich fán iten afalafal?
2 Kukkuto chék, ttamen ewe mwich fán iten afalafal a kan 10 ngeni 15 minich, a kapachelong lón ewe angangen akkóta ekkewe kúmi, ereniir ar territory, me iótek. Iei a wor ekkesiwil. Lepoputáán April, ewe mwich fán iten afalafal epwele chék 5 ngeni 7 minich. Iwe nge, epwe pwal mwoch seni ika a kerán wes pwal eú án ewe mwichefel mwich, pún chókkewe ra fiti ra fen pwapwaiti le aúseling eú pwóróusfengen seni Paipel. An epwe wor ekis chék mwich fán iten ewe angangen afalafal epwe wewe ngeni pwe meinisin ra tongeni áeá watteen fansoun le afalafal. Pwal och, ika ekkewe pioneer are chón afalafal ra fen poputá le afalafal me mwen ewe mwich, iwe, ese pwal ttam ar kaúló le afalafal.
3. Itá epwe ifa akkóten ekkewe mwich fán iten afalafal pwe epwe tongeni álilliséch ngeni chón afalafal?
3 A lamot ekkewe mwich fán iten afalafal repwe kókkótéch pwe repwe álilliséch ngeni ekkewe chón afalafal. Lón chómmóng mwichefel a mmen éch án ekkewe kúmi káimufesen lón ar mwich lap seni ar repwe mwichfengen lón eú chék leeni. Epwe ámecheresi ekkewe chón afalafal le sái ngeni ewe mwich fán iten afalafal me eli pwal ngeni ewe territory. Epwe pwal mecheres akkóten ekkewe chón afalafal, me eli a pwal mecheres ngeni ekkewe chónemmwen le túmúnú chón lón ar kewe kúmi. Ewe kúmiin mwán mi ásimaw a tongeni ekieki met a fiffis lón ar kewe territory me apwúngaló minne mi fókkun múrinné. Me mwen ewe iótekin lesópwólóón mi chék mwoch, a lamot pwe meinisin repwe fen silei ia repwe afalafal ie me ié pélúwer.
4. Pwata sipwe ekieki pwe ekkewe mwich fán iten afalafal iir ra pwal aúchea usun chék án ewe mwichefel kewe mwich?
4 Saminne Ra Lamot Kisikis Seni án ewe Mwichefel Kewe Ekkóch Mwich: Pokiten ekkewe mwich fán iten afalafal ra fis fán iten chék chókkewe repwe afalafal, iwe neman esap meinisin chón mwichefel repwe fiti. Iwe nge, ekkena mwich ra pwal aúchea usun chék aúchean án ewe mwichefel kewe ekkóch mwich. Iir ra pwal kawor seni Jiowa pwe repwe atufichikich pwe sipwe alóllólaatáái ekkewe ekkóch lón tong me lón féffér múrinné. (Ipru 10:24, 25) Ina minne, a lamot pwe ewe chónemmwen epwe mmólnéch pwe ewe mwichen afalafal epwe elingaaló Jiowa me chókkewe mi fiti repwe feiéch seni. Ika mi tufich, a lamot chókkewe repwe afalafal repwe achocho le fiti.
Ekkewe mwich fán iten afalafal ra pwal aúchea usun chék aúchean án ewe mwichefel kewe ekkóch mwich
5. (a) Ifa wisen ewe chónemmweni ewe angangen afalafal lón an akkóta ekkewe mwich fán iten afalafal? (b) Ifa usun emén Chón Kraist fefin epwe emmweni ewe mwich fán iten afalafal?
5 Minne ewe Chónemmwen Epwe Ammólnatá: Ren án emén epwe mmólnéch le féri an we afalafal lón mwich, a lamot epwe silei met epwe eáni afalafal me mwen epwe fis ewe mwich. A pwal ina usun lón ekkewe mwich fán iten afalafal. Pwúngún pwe atun ekkewe kúmiin afalafal ra imufesen lón ar mwich, iwe ekkewe chónemmweni ewe kúmi are néúr kewe assistant repwe wisen emmweni ewe mwich fán iten en me an kúmi. Iwe nge, atun ewe mwichefel epwe ochufengeni ekkewe kúmi lón ar mwichfengen, ewe chónemmweni ewe angangen afalafal epwe ewisa emén an epwe emmweni ewe mwich. Ekkóch chónemmweni ewe angangen afalafal ra féri schedule fán iten meinisin chónemmwen, me a pacheetá kapiin wóón ewe leenien pwóróus esilesil. A lamot pwe ewe chónemmweni ewe angangen afalafal epwe eáni mirit atun epwe ewisa chónemmwen, me ekieki pwe échún ekkena mwich epwe pwal lóngólóng wóón án chókkana tufichin asukul me akkót. Ika ese wor mwán mi ásimaw, chónálillisin mwichefel are Chón Kraist mwán mi tongeni emmweni ewe mwich lón ekkewe ekkóch rán, iwe ewe chónemmweni ewe angangen afalafal epwe ewisa ngeni emén Chón Kraist fefin mi lipwákéch.—Ppii ewe lesen “Lupwen Emén Chón Kraist Fefin Epwe Emmweni.”
6. Pwata a lamot ewe chónemmweni ewe mwich fán iten afalafal epwe mmólnéch?
6 Lupwen a wor ach kinikin lón Sukulen Angangen Chón Kraist are Káitin Chón Afalafal, sia aúcheani me ammólnaéchú. Nge, ákkáfitemén me leich ra kerán angang wóón ar kinikin atun ra sássá ngeni ewe leenien mwich. Iwe, sipwe pwal aúcheani me ammólnaéchú wisach we le emmweni ewe mwich fán iten afalafal. Pokiten iei ttamen ewe mwich fán iten afalafal a mwochomwoch, iwe a fókkun lamot mmólnéch pwe ewe mwich epwe masou ren pwóróus mi lamot me epwe taweéch. A pwal kapachelong lón mmólnéch án ewe chónemmwen epwe silei ewe territory me mwan.
7. Ikkefa ekkóch mettóch ewe chónemmwen a tongeni pwóróus wóón?
7 Minne A Tongeni Pwóróus Wóón: Pokiten nónnómun ekkewe territory a sóssókkofesen, ewe chón angang mi alúkúlúk ese awora eú outline fán iten eú me eú mwich fán iten afalafal. Ewe pwóór itelapan “Atun ewe Mwich fán Iten Afalafal, Neman Ka Tongeni Pwóróus Usun” a menlapei ekkóch mettóch. Lape ngeni ewe mwich epwe napanapen pwóróusfengen. Fán ekkóch, epwe tongeni kapachelong eú pwoomw mi fen mmólnetá are eú video mi álilliséch seni jw.org. Atun ewe chónemmweni ewe mwich fán iten afalafal a ammólnatá, a lamot epwe ekieki met epwe apéchékkúla me elipwákéchú chókkewe repwe afalafal lón ena rán.
Atun ewe chónemmwen a ammólnatá ewe mwich fán iten afalafal a lamot epwe ekieki met epwe apéchékkúla me elipwákéchú chókkewe repwe afalafal lón ena rán
8. Met neman epwe kon álilliséch ewe chónemmwen epwe pwóróus wóón atun ewe mwich fán iten afalafal lón Ammól me Ráninfel?
8 Áwewe chék, iteiten Ammól, lap ngeni chón afalafal ra kan anéúnéú Ewe Leenien Mas me Awake! Chómmóng me lein ekkewe ra afalafal lón Ammól rese kan akkafalafal lón Sárinfál ngeni Enimu, ina popun neman resap kon chechchemeni ewe afalafal ra asóssót atun ar Famili Fel. Ina minne, epwe álilliséch ika ewe chónemmwen epwe enniwili eú me lein ekkewe afalafal lúkúnpéén Ach Angangen Afalafala ewe Mwú. A pwal tongeni pwóróus wóón ifa usun sia tongeni apachaalong eú pwóróus mi fis lón leeniach, are eú holiday lón ach anéúnéú ewe magazine are lón ach ammólnatá ewe chón imw an epwe pwapwaiti ach chuursefáli ika a etiwa ewe magazine. Ika ekkóch chón fiti ewe mwich ra fen akkanéúnéú magazine, iwe, ewe chónemmwen a tongeni tingorer ar repwe awora ekkóch kapasen pesepes are apwóróusa pwóróuseer mi apéchékkúl. Iteiten Ráninfel, neman ewe chónemmwen epwe filatá le féri pwal ekkena ren ekkewe puk sipwe anéúnéú lón ena maram. Neman sia tongeni anéúnéú ekkewe puk sia kan néúnéú le káé usun chék Pwóróus Allim me Paipel A Apasa ese lifilifil menni rán, me ewe chónemmwen a tongeni ekis pwóróus wóón ifa usun anéúnéún eú me lein ekkena puk.
9. Lón Ammól me Ráninfel atun ewe angangen einet mi kkóló aúchean, met ewe chónemmwen epwe tongeni pwóróus wóón?
9 Ika a wor án ewe mwichefel angangen einet mi kkóló aúchean lón Ammól me Ráninfel, neman ewe chónemmwen epwe pwóróus wóón anéúnéún ewe magazine fiti ewe taropween etiwetiw are tract. Are pwóróus wóón met ra tongeni féri ika ewe chón imw a pwapwaiti ewe afalafal. Are pwóróusfengen me ekkewe chón afalafal usun pwóróuseer nge mi menlapei aúchean ekkena sókkun angangen einet.
10, 11. Pwata mmólnéchún ekkewe chón afalafal a lamot ngeni sópwéchún ewe mwich fán iten afalafal?
10 Minne Ekkewe Chón Afalafal Repwe Ammólnatá: A pwal wor met ekkewe chón afalafal repwe féri pwe ewe mwich fán iten afalafal epwe sópwéch. Ren ar ammólnatá fán iten afalafal, neman atun ar famili fel, epwe wor mettóch ra tongeni apwóróusa ngeni ekkewe ekkóch chón afalafal. A pwal kapachelong lón mmólnéch ar angang néúr puk, magazine me tract me mwen repwe fiti ewe mwich fán iten afalafal pwe meinisin ra tongeni mwittir feiló lón ar territory.
11 A pwal lamot ar repwe mwittir tikeri ewe mwich fán iten afalafal fitu minich mwen epwe poputá. Sia kan achocho ach sipwe mwittir ngeni meinisin án ewe mwichefel kewe mwich. Iwe nge, epwe kon osukosuk ewe mwich fán iten afalafal ika sia mmang. Ifa usun? Ewe chónemmwen a kan ekieki chómmóng mettóch ren an epwe akkótaéchú ewe kúmi. Ika ese kon chómmóng repwe afalafal, neman epwe filatá an epwe tinaló meinisin ngeni ewe territory ra fen poputá afalafal lón. Ika ekkóch ra chék fetál ngeni ena mwich me ewe territory a ekis towau, iwe neman epwe appélúwer ngeni ekkewe mi wor waar. Ika a chómmóng féfférún atai allúk lón ewe territory, neman epwe ewisa ngeni ekkewe Chón Kraist mwán ar repwe fiti ekkewe Chón Kraist fefin are afalafal kkan ngeniir. Neman epwe ewisa ngeni ekkewe chón afalafal mi apwangapwang inisiir ar repwe afalafal lón ewe leeni mi sónosónéch are lón ekkewe imw ese kon tekia. Neman ekkewe minefé repwe fiti ekkewe mi fen akkafalafal ren fite, fite ier. Nge, ika ekkewe chón afalafal repwe mmang le war, lape ngeni ewe kókkót epwe siwil pwe repwe tongeni kapachelong lón. Mi pwúng pwe fán ekkóch mi wor och popun mi aúchea a efisi ach sipwe mmang. Iwe nge, ika sia kan eérenaaló le mammang, iwe mi éch sipwe eisini pwisinkich ika sia kan mammang pokiten sise kon aúcheani ewe mwich fán iten afalafal are sise kan akkótaéchú kókkótun manawach.
12. Met ka tongeni ekieki ika fán chómmóng ka kan pwisin féri óm kókkót?
12 Ekkewe chón afalafal ra tongeni filatá ika repwe pwisin féri ar kókkót me mwen epwe poputá ewe mwich are repwe tingorei ewe chónemmweni an epwe filatá emén chiener. Ika fán chómmóng ka pwisin féri óm kókkót, iwe en mi tongeni ‘suki letipom’ ren óm kopwe fiti ekkewe ekkóch lap seni óm kopwe chék fiti chiechiom kewe iteitan? (2 Kor. 6:11-13) En mi tongeni mwin me emén mineféén chón afalafal fán ekkóch pwe kopwe álisi an epwe feffeitá lón an tufichin asukula aramas? (1 Kor. 10:24; 1 Tim. 4:13, 15) Aúselingéch ekkewe kapasen emmwen seni ewe chónemmwen kapachelong ia oupwe poputá le afalafal ie. Ika a wes ewe mwich kosap siwili ewe kókkót. Mwittir feiló ngeni ewe territory.
13. Ika meinisin repwe túmúnúéchú me féri wiser, ifa usun ewe mwich fán iten afalafal epwe álilliséch ngenikich?
13 Mwirin án ekkewe 70 chón káé afalafal, chókkewe Jesus a akkóter fán iten ewe angangen afalafal, ra “liwinto ren pwapwa.” (Luk. 10:17, TF) Ese mwáál, án Jesus emwicheer me mwen ar ló a álisiir ar repwe sópwéch. Ikenái, ekkewe mwich fán iten afalafal ra pwal tongeni asopwéchúkich. Ika meinisin repwe túmúnúéchú me féri wiser kewe, iwe, ekkewe mwich fán iten afalafal repwe apéchékkúlakich, elipwákéchúkich, me akkótaéchúkich pwe sipwe apwénúetá wisach kewe pwe “epwe eu minen pwärätä ngeni aramas meinisin.”—Mat. 24:14.