Afalafal Woon Fon mi Tongeni Uwaaöch
1. Lon ach we angangen afalafal, met popun a lamot afalafal woon fon?
1 Met popun sia mochen ekilapei ewe angangen afalafal woon fon? Pun iei pwal eü alen ach sipwe tongeni älisi aramas le küna manau ren ar silei ewe enlet. (2 Pit. 3:9) Inaamwo ika sia afalafala ewe kapas allim äkkäeüin imw me imw, nge sia pwal mochen alamota pwal ekkoch sokkun angangen afalafal epwe atufichikich le chuuri ekkewe aramas rese kan nonnom lon imwer.—Mt. 24:14; Luk 10:1-7; Pwar. 14:6.
2. Ifa kokkotun ewe angangen afalafal woon fon?
2 Kokkotun ei Angang: Usun chök ewe angangen afalafal imw me imw, mi pwal kawor ekkewe territory ngeni iö kewe ra mochen afalafal woon fon. Ra tongeni föri ei le äkkäläemön are rüüemön are ülümön. Repwe föri lon eü leeni mi kinamwe, ese watte akürangan. Chommong ra sani le mommot ren eü chepel nge epwe nom rer ekkewe pisekin afalafal ra kan nöünöü le afalafal imw me imw.
3. Ifa usun sipwe afalafal woon fon?
3 Ifa Usun Sipwe Afalafal Woon Fon: Lupwen sia afalafal woon fon, mi lamot pwe ngingiich epwe usun itä sia foffos ngeni chiechiach. Ren iir kewe ra kerän föri ei angang, ra tongeni älleani ar afalafal nge ngingiir epwe pwal usun nge ra foffos ngeni chiener. Ra mmen älillisöch ekkewe kapasen le poputään lon ewe Reasoning puk, Ach Angangen Afalafala ewe Mwu me ewe taropwe Ka Mochen Silei ewe Enlet? Ika kopwe eäni pwisin om afalafal, ammolnatä ewe pworaus kopwe apworausa, ekieki menni kapas eis kopwe eäni me pwal ekkoch wokisin repwe pölüweni ena kapas eis. Eli, kopwe fos usun ekkewe puk ka kan anöünöü ngeni aramas imw me imw. Chechchemeni ekkeei mettoch: Kopwe kinamwe me ammanga om fos. Fos lon eü ngingi mi pwäratä fäiro, mosonottam me tong pun aramas ra tongeni esilla ren ngingum. Aüseling me afaani meefien ewe chon imw me kilisou ren met a apasa. Tümünü pwe kosap fosun ewe kokkotun awora monien älillis pwe rete ekieki pwe sia fos usun fesin moni.
4. Met ewe angangen afalafal woon fon epwe tongeni atufichikich le föri lon ach leenien afalafal?
4 Eli kopwe fos ngeni emön woon fon mi tter inisin are mi semwen, are emön a mmen weires om kopwe chuuri ika ka afalafal imw me imw pun a akkangang iteitan. Mei wor ekkoch ra nonnom lon ekkewe leeni mi pinepin ach sipwe afalafal ie. Ina minne, ika sia mochen unusen apwönüetä wisach, sipwe alamota ei angangen afalafal woon fon me ekieki uwaöchün.