Ineet Sipwe Chuursefäli Iir Kewe mi Mochen Rongorong?
1. Met a kapachelong lon ewe angangen föralo chon käeö?
1 Ewe angangen föralo chon käeö a kapachelong ach chuursefäli ekkewe mi mochen silei än Jiowa we Mwu me än kokkot. (Mt. 28:19, 20) Ewe fansoun mi öch sipwe liwiniti emön a longolong woon ach tawe pwal än ewe chon imw. Pwata a lamot sipwe mwittir liwinitiir mwirin ewe äeüin fansoun sia chuuriir?
2, 3. Met popun mi lamot sipwe achocho le mwittir liwin?
2 Pwata Sipwe Mwittir Liwin? Ei angangen afalafala “ewe Pworausen Manau usun ewe Mwün Kot,” epwele muchulo me sopwoloon ototen ei fönüfan a arapoto. (Mt. 24:14; 1 Pit. 4:7) Ina minne, iei mwo, lupwen ewe “ränin küna manau” a chüen suuk ngeni ekkewe mi mochen aüseling, mi lamot sipwe apwönüetä ewe pesepes pwe sipwe achocho le‘afalafala ewe Kapasen Kot,’ pachelong ach mwittir chuursefäliir pwe sipwe ämääraatä ar mochen käeö.—2 Kor. 6:1, 2; 2 Tim. 4:2.
3 Setan a fokkun mochen mwittir angei pwikilin ewe Mwu sia fen fotuki leluken emön. (Mk. 4:14, 15) Fän chommong, chon ewe famili, chienen chon angang, me ekkewe ekkoch repwe esiita ewe emön mi mochen rongorong. Ach mwittir liwinitiir epwe atufichikich le sopwelo met sia fen pworausfengen woon me mwen ekkewe chon esiit repwe ataielo ar mochen aüseling.
4. Met ekkewe kopwe föri lon ewe atun ka kerän chuuri ewe chon imw pwe epwe amecheresi om liwiniti?
4 Ota Ämi Fansoun Chufengensefäl: Mwen om kopwe lo seni ewe chon imw ka kerän chuuri, mi öch kopwe akkota ineet kopwe liwin. Isetiw eü kapas eis kopwap pölüweni lupwen ka liwin. A lamot kopwe makkeei pworausen om chuuri ewe chon imw. Ren om tawe, kopwe tongeni eisini ika ka tongeni liwin sorotään are ekiselo chök. Ika ka chuuri ewe chon imw lon wiiken me a akkangang unusen wiik, iwe eli epwe tipeeü om kopwe liwin lon en wiiken. Kopwe fokkun liwiniti lon ewe atun oua fen kokkotfengen woon.—Mt. 5:37.
5. Ifa usun ach mwittir liwiniti iir kewe mi mochen aüseling epwe älisikich le apwönüetä wisach le föralo chon käeö?
5 Mi wor chommong popun mi öch ach sipwe mwittir liwiniti iir kewe mi mochen aüseling. Ina minne, kopwe föri ewe kokkot me mwittir chuursefäliir pun “ewe fansoun a chok mochomoch.” (1 Kor. 7:29) Lon om mwittir liwinitiir, ina watteloon om uwaöchülo.