Alapalo le Afalafal ngeni Chokkewe mi Eäni Eü Sokkun Fos
1. Lon ach kewe leenien afalafal, ifa ewe wis mi pwal suuk ngenikich?
1 Jises Kraist a oesini pwe ewe kapas allim epwe afalafalfeil woon unusen fönüfan pwe “epwe eu minen pwärätä ngeni aramas meinisin.” Iir kewe mi fiti ei angangen afalafal me asukula aramas ra mirititi lamoten alon Jises keei. (Mt. 24:14; 28:19, 20) Lupwen sia afalafal, eli sipwe küna aramas seni sokkopaten fönü mi eäni pwal eü fos. Mi pwal fich ngeniir ar repwe rongorong pworausen än Kot we Mwu, me peni ewe enlet me mwen warotoon ränin Jiowa we mi amwarar. (Mal. 3:18) Ifa usun sipwe alapalo ach afalafal ngeni chokkewe mi eäni eü sokkun fos lon ach leenien afalafal?
2. Ifa usun sipwe äppirü Jiowa lupwen sia chuuri chokkewe mi sokkolo ar fos?
2 Äppirü Ekiekin Jiowa Usun Chokkewe Mi Eäni Pwal Eü Fos: Ren ach sipwe äppirü än Jiowa tong ngeni aramas meinisin lon ach leenien afalafal, mi lamot sipwe älisiir seni enletin letipach le sileöchü ewe Kot mi enlet, Jiowa, ese pwal lifilifil ika menni fos ra eäni. (Kölf. 83:18; Fof. 10:34, 35) Inaamwo ika sia akkomw afalafal ngeni ekkewe aramas mi eäni ewe fos ewe mwichefel a eäni, nge mi lamot sipwe pwal äfänni chokkewe mi eäni eü sokkun fos me kütta ifa usun sipwe afalafaler usun pworausen än Kot we Mwu. Jiowa a akkota pwe sipwe afalafala aramas meinisin woon fonufan, iwe, sia fiti ena kokkot ika sia ateneki chokkewe mi sokkolo ar fos. Nge, ifa ussun sipwe alisi ekkewe aramas rese eäni ach fos?
3. Ifa ewe puk mi älillisöch a kawor fän itach me ifa usun sipwe mmolnetä le nöünöü?
3 Nöünöü ewe Puk Good News for People of All Nations: (Kapas Allim Fän Iten Aramas Meinisin) Ei puk a fen för fän iten ach sipwe nöünöü ngeni chokkewe mi eäni pwal eü fos. Kopwe uwei ei puk iteitan, sileöchü kinikinin lon, me mmolnetä le nöünöü. Kopwe esissila ekkewe pekin taropwe lon ewe puk, ekkewe fos aramas ra eäni lon om leenien afalafal pwe epwe mecheres ngonuk om kopwe äit ngeniir. Ika mi kawor ekkewe puk lon ekkena sokkun fos lon ach kewe leenien mwich, mi öch kopwe uwei me anöünöü mwirin om fos lon ewe puk Nations.
4. Ifa usun sipwe nöünöü ewe puk Nations lon ach angangen afalafal?
4 Ika ka chuuri emön mi pwal eäni eü fos lon ewe angangen afalafal nge kese sile menni fos a eäni, iwe, kopwe äit ngeni tükütükün ewe puk. Suuk ngeni ewe mappün fönüfan woon pöön ewe puk me lon, akkomw itinuk me itini menni fönüom. Iwe, itini me pwomweni pwe ka pwal mochen silei ika i seni ia me menni fos a eäni. Mwirin om silei menni fos a eäni, nengeni tettelin masouen ewe puk, me suuk ngeni ewe pekin taropwe ikewe an fos a mak ie. Äit ngeni ewe chon imw ewe pworaus mi makkechon asan me pwomweni pwe ka mochen epwe älleani ewe pworaus. Ika a wes, anöünöü ngeni echö taropwe lon fosun fönüan are itini ewe pworaus mi esissil, mi erä pwe ka mochen liwinsefäl fän eü puk lon fosun fönüan. Mwirin itini ewe mak mi makkechon mi erä “itei” me ereni itom. Itini ewe mak mi makkechon mi erä “itom” me witi an epwe pölüweni. Iwe, akkota om kopwe liwinsefäl.
5. Met mi lamot sipwe föri pwe sipwe tümünüöchü chokkewe mi mochen aüseling mi sokkolo ar fos?
5 Kokkotun Liwinsefäl: Sipwe föri ükükün ach tufich le chuuri chokkewe mi pwapwaiti pworausen ewe Mwu inaamwo ika mi sokkolo ar fos. Ika sia küna pwe emönnewe a mochen silei Kot me an Kapas, iwe, sipwe amasoua ewe taropwe Please Follow Up (Ouse Mochen Oupwe Chuuri) (S-43) me mwittir ngeni ewe seketeri pwe epwe tinalo ngeni ewe keangen ofesilap. Iwe mwirin, epwe titiilo ewe taropwe ngeni ewe kümiin aramas mi eäni ena fos pwe epwe wor emön epwe mwittir chuuri i. Ewe seketeri epwe awora echö kapiin ewe taropwe ngeni ewe service overseer pwe epwe tongeni silei ika a lapolo chochoon chon mochen aüseling me lein chokkewe mi eäni eü sokkun fos. Ei taropwe fän iten chök chokkewe mi mochen aüseling.
6. Met wisach atun sia chuuri emön mi mochen aüseling nge a eäni eü sokkun fos?
6 Eli epwe ekis ttam lefilen ewe fansoun a titiilo ewe taropween S-43 me ewe atun epwe wor chon afalafal mi silei an fos epwe chuuri i. Ina minne, mi lamot pwe ewe chon afalafal mi fen tinalo ewe taropwe epwe chök sopwelo le chuuri emönnewe me ämääraatä an mochen aüseling tori an a wor chon chuuri lon pwisin an fos. Fän ekkoch, ra tongeni käeöfengen lon Paipel. Iwe nge, ifa usun ewe chon afalafal epwe angei ekkoch puk mi mak lon pwisin än emönnewe fos?
7. Met sokkun älillis mi kawor pwe sipwe angei ekkewe puk mi mak lon ewe fos ekkewe aramas sia chuuriir ra eäni?
7 Ekkewe Puk lon Fosun Ekis: Ekkewe mwichefel resap anomu chommong puk lon fosun ekis. Iwe nge, ika ewe service overseer a küna pwe a lapolo chochoon ekkewe mi mochen aüseling me lein chokkewe mi eäni eü sokkun fos, iwe, eli epwe ekis awattelo ekkewe puk repwe anomu pwe ekkewe chon afalafal ra tongeni anöünöü. Ika esor puk mi kawor lon ewe mwichefel, epwe tongeni chummong, nge eli epwe ekis mmang an epwe war. Ina minne, a kawor eü sokkun älillis seni ewe www.watchtower.org, pwe chon afalafal are chokkewe mi mochen aüseling ra tongeni nöünöü are kapiini chommong puk lon sokkopaten fos. Ei sokkun älillis epwe fokkun älillisöch fän iten ach sipwe ämääraata än aramas pwapwaiti le rongorong inaamwo ika ra eäni pwal eü fos.
8. Met chon ewe mwichefel repwe föri le älisatä än aramas mochen aüseling inaamwo ika mi sokkolo ar fos?
8 Wisen ewe Mwichefel: Fän ekkoch a chommongolo ekkewe aramas mi eäni eü sokkun fos lon eü leeni, nge esor mwichefel mi eäni ena fos mi kan ngeni. Ina minne, chokkewe mi eäni pwal eü fos me pwapwaiti le aüseling repwe ketiw le fiti ach kewe mwich. Än chon ewe mwichefel etiwaöchüür me äfänniir a tongeni apöchökküler le fiffiti mwich iteitan. Le poputään, eli epwe wor ekis osukosuk ren sokkofesenin ar fos are nonnomun manauer, nge ren enletin ese wor och mettoch epwe pinei ewe tong mi enlet lefilen Chon Pwäratä Jiowa woon unusen fönüfan. (Sef. 3:9; Jon 13:35) Ika ka angöch lon eü fosun ekis me mochen chuuri chokkewe mi sile ena fos, kese mochen kopwe ereni ewe seketeri lon om mwichefel pwe epwe esile ngeni ewe keangen ofesilap. Ren ei, epwe tongeni älisi chon ewe ofes le akkota pwe emön epwe chuuri emönnewe mi sokkolo an fos.
9. Ineet atun epwe tongeni fis ewe sukulen fos fän iten chon afalafal? Ifa usun epwe för ei?
9 Sukulen Fos: Ika ka älisi chokkewe mi sokkolo ar fos, a öch ika kopwe peseer le fiti ewe mwichefel mi eäni ar fos ika mi tufich ar repwe föri ena. Iwe nge, ika rese tufich, ekkoch chon afalafal ra filatä pwe repwe käeö ena fos me alapalo ar älisi ekkewe mi mochen aüseling. Ika esor mwichefel mi kan ngeniir, eli ewe keangen ofesilap epwe filatä an epwe wor eü sukul fän iten ekkoch chon afalafal repwe käeö ewe fos pokiten a chommongolo chokkewe mi eäni ena sokkun fos lon leenier. Ika epwe fis ewe sukulen fos, iwe, ewe keangen ofesilap epwe esile ngeni ekkewe mwichefel mi kan ngeni usun ewe osupwang me akkota ewe esilesil fän iten ena sukul. Chokkewe mi mochen fiti ewe sukul, itä repwe ekieki pwe repwe fiti ewe kümiin aramas are ewe mwichefel pwe repwe älisatä ewe angangen afalafal lon ena fos.
10. Ineet atun eü mineföön kümiin aramas mi sokkolo ar fos epwe tongeni poputä?
10 Fförütään ewe Minefö Kümiin Aramas: Eü minefö kümiin aramas fän iten chokkewe mi sokkolo ar fos epwe tongeni poputä ika a pwönüetä ekkeei rüanü mettoch. (1) Mi wor chokkewe mi pwapwaiti le aüseling me käeö me lein ekkewe aramas mi eäni ena sokkun fos. (2) Mei wor ekkoch chon afalafal mi sile are repwe käeö ewe fos. (3) Emön elter are ministerial servant mi lipwäköch a tongeni emmweni me föri ekkoch mwich iteiten wiik lon ena fos. (4) Eü mwichen elter epwe älisi ewe kümi. Iwe, lupwen a pwönüetä ekkeei mettoch, ekkewe elter repwe mak ngeni ewe keangen ofesilap usun ewe kümi me tingor pwe ewe mwichefel epwe wisen tümünü ewe kümiin aramas mi sokkolo ar fos. (Nengeni Ach angangen Afalafala Ewe Muu minen January 2007, pekin taropwe 4-6.) Ekkewe elter mi tümünü ewe kümi repwe “chon emmweni ewe kümi” me ekkewe ministerial servant repwe “chon älillis lon ewe kümi.”
11. Pwata ach alapalo le afalafal ngeni chokkewe mi eäni eü sokkun fos lon ach leenien afalafal, ina eü wis mi aüchea?
11 Ach alapalo le afalafala chokkewe mi eäni eü fos lon ach leenien afalafal, ina eü kinikin mi lamot lon ewe angangen afalafal woon unusen fönüfan, ach we Leenien Äppirü Jises Kraist a poputääni. Sipwe tinikken le föri wisach me nennengeni ifa usun Jiowa a amwökütükütü mwuun fönüfan meinisin me uwealong chokkewe mi fich ngeni. (Akai 2:7) A ifa me watteen ach pwapwa le unusen älisi ei angang! Amwo Jiowa epwe efeiöchü ach angangfengen le alapalo ach afalafala chokkewe mi eäni eü sokkun fos lon en me an leenien afalafal. Chechchemeni mwo pwe inaamwo ika mi sokkolo än ekkoch aramas fos, nge Kot mi tongeni ämääraatä!—1 Kor. 3:6-9.