Achocho le Afalafal lon Fansoun Atapwal!
1. Ifa än Paul we kapasen pesepes mi lamot ach sipwe ekieki ikenäi?
1 “Kopwe achocho ngeni om kopwe arongafeili ewe Kapas.” (2 Tim. 4:2) Pwata än Paul we kapasen pesepes a fokkun lamot ngenikich ikenäi? Ifa usun ekkeei kapas repwe achchüngükich me ekkewe ekkoch?
2. Pwata sipwe tinikken le küttafichi chokkewe resaamwo rongorong ewe kapas allim?
2 Mi Kküü Manauen Aramas: Mi chüen wor fite million aramas woon unusen fönüfan repwe mwo rongorong ewe kapas allim mi tongeni amanauer. (Rom 10:13-15; 1 Tim. 4:16) Lon ekkewe leeni sia kan afalafal ie iteitan, sia chüen küna chommong aramas mi letip wenechar. Ika sia chuuriir lon sokkopaten rän are kulok, eli sipwe pwal tongeni chuuri pwal ekkoch aramas. Ika sia tinikken le küttafichi ekkewe aramas, epwe limöch mwelien letipach me sipwe pwal limelimöch seni chan aramas meinisin.—Fof. 20:26.
3. Ifa usun sipwe alamota ach fansoun afalafal?
3 Inaamwo ika ekkewe chon Kraist lon fansoun ekkewe aposel ra küna koput me ninni nge ra ‘achöfetalei är afalafal lon unusen Jerusalem.’ (Fof. 5:28) Sia pwal achocho le unusen “pwärätä” ewe kapas allim? (Fof. 10:42) Lupwen sia afalafal sia alamota ach fansoun? Atun sia witi chienach kewe ra chursefälli ekkoch aramas, sia achocho le fos ngeni chokkewe mi feffetäl ünüküch?
4. Ifa usun ach achocho le afalafal lon ei fansoun atapwal a älisikich le mammasa?
4 Alapalo Ach Mammasaöchü: Pokiten sopwoloon ei otot a arapoto, mi lamot sipwe nennelo me mammasa. (1 Tes. 5:1-6) Lupwen sia afalafal iteitan usun ach äpilükülük, a tümünükich pwe mettochun ei fönüfan esap chounikichetiw. (Luk 21:34-36) Iwe, ach ekieki ränin Jiowa we an “epwe müttirito,” a amwökütükich le alapalo ach angangen afalafal epwe tongeni amanaua aramas.—2 Pit. 3:11, 12.
5. Ifa usun ach süföl ngeni manau a amwökütükich lon ach afalafal?
5 Lupwen sia achocho le afalafal lon ei fansoun atapwal, sia eäni än Jiowa ekiek usun manau: “Pun esap mochen pwe eman epwe pöütmwälila, nge a fen mochen pwe meinisin repwe ekieksefäl.” (2 Pit. 3:9; Is. 33:11) Sipwe apposa letipach le chuuri chommong aramas ükükün ach tufich, ren ach sipwe elingalo Jiowa!—Kölf. 109:30.