“Än Jiowa We Rän Mi Lapalap A Arapoto”
“Än Jiowa we rän mi lapalap a arapoto. A fen arapoto, me a wenewenen mwittirito.”—SEFANAIA 1:14, NW.
EMÖN föpwül a meseikeiti warotoon ränin an apwüpwülü. Emön inelap a witiwiti uputiuen nöün we mönükol. Emön chon angang mi fokkun mölülü a mwötöresiti poputään an fansoun asösö. Met ewe ra löllöfengen woon? Ir me ülümön ra witiwiti eü rän mi sokkolo aüchean, eü rän epwe wesewesen kkü manauer. Ar kewe memmeef mi alolloon nge ra sokkofesen. Lo, lo, lo tori a war ewe rän ra mochen pwe repwe fen mmonletä ngeni.
2 Pwal ussun chök ikenäi, ekkewe chon Kraist mi enlet ra meseikeiti warotoon eü rän mi sokkolo aüchean. Ina ewe rän mi lap, “ränin ewe Samol mi Lapalap [Jiowa, NW].” (Aisea 13:9; Sowel 2:1; 2 Piter 3:12) Met ena “ränin ewe Samol mi Lapalap” me ifa ussun warotoon ena rän epwe kkü aramas? Pwal och, ifa ussun sipwe ännetatä pwe sia wesewesen mmonletä ngeni warotoon ena rän? A lamot pwe sipwe kütta pölüen ekkeei kapas eis iei, pun ekkewe pisekin ännet ra ännetatä enletin ekkeei kapas lon Paipel: “Än Jiowa we rän mi lapalap a arapoto. A fen arapoto, me a wenewenen mwittirito.”—Sefanaia 1:14, NW.
“Än Jiowa we Rän Mi Lapalap”
3 Met weween “än Jiowa we rän mi lapalap”? Lon ewe Paipel, ekkewe kapas “ränin ewe Samol mi Lapalap” a weneiti ekkewe fansoun lupwen Jiowa a apwüngü chon koputan kewe me alingalo itan we mi lap. Ekkewe aramas mi lükülükümmang lon Juta me Jerusalem pwal ekkewe chon Papilon me chon Isip mi kirikiringaü ra küna kapwüng loom lon “ränin Kot ewe Samol mi Unusen Manaman.” (Aisea 2:1, 10-12; 13:1-6; Jeremia 46:7-10) Iwe nge, “än Jiowa we rän mi lapalap” epwap fisitä lon mwach kkan. Ina ewe “rän” Jiowa epwe apwüngü ekkewe mi aitengaüa itan. Epwe poputä ren taloon “Papilon mi Lapalap,” ewe mwicheichen lamalam mi chofona woon fönüfan, me epwe müchülo ren taloon ei otot mi ngaü lon ewe maunen Armaketon.—Pwarata 16:14, 16; 17:5, 15-17; 19:11-21.
4 Lap ngeni aramas rese ekieki ussun ewe ränin Jiowa nge repwe niuokkusiti ei rän mi arapoto. Met popun? Me ren ewe soufos Sefanaia, Jiowa a apasa: “Ewe rän epwe eu ränin lingeringer, eu ränin riaföü me niuokus, eu ränin tatakis me feiengau, eu ränin rochopwak me toputop, eu ränin kuchuchu me rochokichin rochopwak.” A fokkun aniuaniu ena rän! Iwe, a pwal apasa: “Üpwe atoto riaföü won aramas . . . pokiten ar tipis ngeniei.”—Sefanaia 1:15, 17.
5 Iwe nge, fite million aramas ra meseikeiti warotoon än Jiowa we rän. Met popun? Ra silei pwe iei ewe ränin amanau me ngaselo fän iten ekkewe mi pwüng, eü rän lupwen Jiowa epwe fokkun tekiatä me itan epwe pinilo. (Sowel 3:16, 17; Sefanaia 3:12-17) Än aramas niuokkusiti are meseikeiti ena rän a longolong woon met ra föfföri iei. Met meefiom ussun warotoon ena rän? Ka mmonletä ngeni? A kkü manauom pwe än Jiowa we rän a wesewesen kkanoto?
“Chon Esiit Repwe Feito Ren Ar Esiit”
6 Inaamwo ika iei eü rän mi fokkun atapwalapwal nge, lape ngeni chon fönüfan rese äfänni warotoon “ränin” Jiowa. Ra turunufasei me esiita ekkewe aramas mi öüröürer ussun ena rän a chök mwittirito. Nge ekkewe chon Kraist mi enlet rese mäirü. Ra chechchemeni ewe kapasen öüröür ewe aposel Piter a makkei: “Aeuin seni meinisin, oupwe fakkun wewe ren ei mettoch, pwe lon ekkewe ranin le sopolon chon esiit repwe feito ren ar esiit, repwe tapwelo mwirin pwisin ar mochenia ingau, O repwe apasa, ‘Ia pwonen an epwe feito? Pun seni chok fansoun semach kewe ra mourelo, mettoch meinisin ra usun we chok seni popun lom.’ ”—2 Piter 3:3, 4.
7 Met epwe älisikich ach sipwe likiitü fän än aramas lükülükümang me ach sipwe ekipwichi ussun ewe rän mi atapwalapwal? Piter a erenikich: “Ua fongunata ngunumi mi limelimoch usun och minen achema ngenikemi, pwe oupwe chechemeni oesinien ekkewe soufos mi fel, o allukun ewe Samol ach Chon Amanau ren noun kewe chon kuno ngenikemi.” (2 Piter 3:1, 2) Ach älleäsochisi ekkewe oesini mi öüröürakich epwe ‘fongunata ngunuch.’ Eli sia fen rongorong ekkeei kapasen achechchem fän fitu, nge iei a lamot ach sipwe akkaüseling ngeni ekkeei kapasen öüröür lap seni me loom.—Aisea 34:1-4; Luk 21:34-36.
8 Pwata ekkoch ra tunalo ekkeei kapasen achechchem? Piter a sopwelo: “Ren ar ekieki iei usun, a lama seni ir pwe a wor ekkewe lang lom lom ren ewe kapasen Kot, o pwal eu fonufan mi forata seni konik o ren konik. Iwe, ewe konik a pungutiu o a pwoluelo ewe fonufan mi nonnom lon ewe fansoun, o a pwal atailo.” (2 Piter 3:5, 6) Ewer, mei wor ekkoch ra oput warotoon än Jiowa we rän. Rese mochen pwe och mettoch epwe aosukosuka kokkotun lon manauer! Rese mochen ätittin mwen mesen Jiowa pokiten lapalapen manauer. Me ren Piter, ra manaueni manauer “ren ar ekieki” chök pwisin ar mochen.
9 Pokiten ekkeei chon esiit ra “ekieki iei ussun,” ra tunalo pwe Jiowa a fen angolong lon mwökütükütüün aramas. Jises Kraist me ewe aposel Piter ra fos ussun “ekkewe ränin Noa” me “ekkewe ränin Lot.” (Luk 17:26-30; 2 Piter 2:5-9) Mwen ewe Noter, ekkewe aramas rese äfänni ewe kapasen öüröür seni Noa. Pwal ussun chök, mwen taloon Sotom me Komora, kofotun nöün Lot kewe ra ekieki pwe Lot “a chök ürümwot.”—Keneses 19:14.
10 A pwal ina ussun chök ikenäi. Nge, nengeni meefien Jiowa ussun ekkewe rese äfänni: “Lon ewe fansoun üpwe chosani Jerusalem fän eu lamp. Üpwe apwüngü ekewe mwän mi menemen ren püsin ar tufich o lükü püsin ir, ir chokewe mi ekieki lon leluker, ‘Ewe Samol mi Lapalap esap föri och mi mürina, esap pwal föri och mi ngau.’ Aramas repwe soläni ar kewe pisek, nge imwer kewe repwe tala. Inamwo ika ra aüetä imwer, resap fokun nonom lor. Inamwo ika ra fotuki tanipin wain, resap fokun ün wain seniir.” (Sefanaia 1:12, 13) Ekkewe aramas ra kan achocho ngeni ar angang iteiten rän, nge resap küna feiöch mi nomofochelo seni ar angang weires. Met popun? Pokiten än Jiowa we rän epwe mwittirito, iwe, wöür kewe meinisin ra wöüni iei resap seläniir.—Sefanaia 1:18.
“Kopwe Chök Witiwit”
11 Sisap ekieki ussun ekkewe chon fönüfan nge a lamot ach sipwe chechchemeni ewe fön seni ewe soufos Apakuk: “Pun mine üpwe pwäri ngonuk epwap pwönüetä lon eu fansoun mi kefilitä. Nge fansoun an epwe pwönüetä epwe fokun müttir, nge esap chofana. Are epwe mang le pwönüetä, kopwe chök witiwit. Epwe fokun pwönüetä, nge esap mang.” (Apakuk 2:3) Inaamwo ika pwe ena rän a ussun itä a mmangoto me rech nge, sipwe chechchemeni pwe Jiowa ese mmang. Ränin we epwe feito lon ewe fansoun mi filitä, lon ewe kulök aramas rese ekieki ussun.—Mark 13:33; 2 Piter 3:9, 10.
12 Jises a menlapei ewe lamoten ach ekkekieki ussun än Jiowa we rän lupwen a öüröürakich pwe ekkoch me lein nöün kewe chon käeö repwe pachewammang. A fen oesini ussur: “Nge are ewe chon angang mi ingau epwe apasa lon letipan, ‘Eli ai we masta epwe mangoto,’ o epwe popueta ninni chienan kewe, o eti ekkewe mi puchen achi le momongo o ukkun; iwe, mastaan ewe chon angang epwe feito lon eu ran atewe ese mo ekieki usun, pwal lon eu klok atewe ese mo sinei, o epwe ninningaua i o alluku pwe epwe eti chon likotuputup, ikewe epwe wor kechiu me akarungi ie.” (Mattu 24:48-51) Iwe nge, ewe chon angang mi tuppwöl me tipatchem a akkamwöchü ewe ngünün atapwalapwal. Ena chon angang a chök mammasa me mmonletä iteitan. Ina minne, Jises a seikatä i “won pisekin meinisin” ikei ie woon fönüfan.—Mattu 24:42-47.
Ewe Lamoten Ach Sipwe Eäni ewe Ngünün Atapwalapwal
13 A fokkun lamot pwe ekkewe chon Kraist loom repwe akkamwöchü ewe ngünün atapwalapwal. A pwal lamot pwe repwe mwittir sü seni Jerusalem lupwen ra küna pwe “ekkewe mwichen sounfiu ra pwellifeili” ewe telinimw. (Luk 21:20, 21) Iwe, ena mettoch a fis lon ewe ier 66 C.E. Nengeni ifa ussun Jises a menlapei ewe lamoten än ekkewe chon Kraist loom akkamwöchü ewe ngünün atapwalapwal: “Nge are emon a nom won sesarin won, esap totiu pwe epwe angei och mettoch seni imwan. Are emon a pwal nom le malamal, esap liwinsefal pwe epwe angei ufan.” (Mattu 24:17, 18) Met popun ekkewe chon Kraist repwe fokkun chechchemeni alon Jises lon ewe ier 66 C.E., lupwen uruwo a pwäratä pwe Jerusalem epwe talo rüänü ier mwirin ena fansoun?
14 Inaamwo ika ekkewe sounfiun Rom rese mwo atai Jerusalem tori 70 C.E. nge, ekkewe rüänü ier me mwan ra ur ren fitikoko. Ren enletin ekkena ier ra ur ren föfförün mwänesol me nni manau. Emön sou uruwo a apasa pwe lon ena fansoun lon Jerusalem, a fiffis eü maun lefilen pwisin chon Jus, eü maun “mi aniuokkus me ur ren nni manau me kirikiringaü.” Ekkewe alüwöl ra wisen angang le apöchökküla ekkewe orooren maun ünükkün ewe telinimw, uwou pisekin maun, me wiliti sounfiu. Iwe, iteiten rän ra kan rensü fän iten maun. Me ren ekkewe nöüwis chokkewe rese peni ar kewe kokkot ir chon ü ngeniir. Ika ekkewe chon Kraist ra mmang le sü, epwe fokkun watte ar osukosuk.—Mattu 26:52; Mark 12:17.
15 Sipwe chechchemeni än Jises kapas pwe “ir mi nonnom Jutia,” sap chök lon Jerusalem, repwele sü. A fokkun lamot ar repwe mwittir sü pun mwirin fitu chök maram, Rom a poputäsefälli ewe maun. Akkom, ra liapeni Kalili lon 67 C.E., me ekis me ekis ra liapeni Jutia lon ewe ier mwirin. Ina popun ekkewe aramas lükün ewe telinimw ra fokkun riäfföü. A pwal weiresilo än ekkewe chon Jus sü seni Jerusalem. Ra mammasa ekkewe asamelapen Jerusalem, iwe, ika emön a sotuni le sü, ra ekieki pwe epwe älisi ekkewe chon Rom.
16 Pokiten ekkeei pworaus meinisin, sia weweiti ewe popun Jises a menlapei atapwalapwalen ewe fansoun. A lamot pwe ekkewe chon Kraist repwe tipemecheres le pöütalo minne mi nom rer. Resap mut ngeni ekkewe mettochun aion ar repwe arikalo ar ekiek. A lamot ar repwe tipemecheres le “likitalo mettoch meinisin mi nom” rer fän iten ar repwe älleäsochisi än Jises we kapasen öüröür. (Luk 14:33) Chokkewe ra mwittir älleäsochis ren ar sülo pekiloon ewe Jortan ra küna manau.
Akkamwöchü Ach Ngünün Atapwalapwal
17 Ekkewe oesini lon Paipel ra affata ngenikich pwe sia nonnom lon ewe fansoun sopwoloon. Lap seni loom, a lamot ach sipwe ekipwichi warotoon ewe rän. Lon fansoun kinamwe emön sounfiu ese kan ekieki ussun ekkewe osukosuk me feiengaü lon maun. Iwe nge, ika a meefi pwe esor lamoten an epwe mammasa, nge a wor ewe kökköön an epwe maun, eli an ese mmonletä epwe emmwen ngeni an mälo. A pwal ina ussun kich. Ika sia pachewammang, sisap mmonletä fän iten sokkopaten osukosuk me sisap meefi och lupwen än Jiowa we rän a wesewesen war. (Luk 21:36; 1 Tesalonika 5:4) Ika emön a fen ‘kul seni an tapwela’ mwirin Jiowa, iei ewe fansoun epwe küttasefälli i.—Sefanaia 1:3-6; 2 Tesalonika 1:8, 9.
18 Esap eü minen ämäirü pwe ewe aposel Piter a fönöükich ach sipwe “amuttiri warotoon ewe ranin Kot”! Ifa ussun sipwe föri ena mettoch? Ren ach manaueni ewe ‘manau mi fel o mi fich ngeni’ chon angangen Kot. (2 Piter 3:11, 12) Ach achocho ngeni ena sokkun manau epwe älisikich le meseikeiti warotoon ewe “ranin Kot.” Sise tongeni wesewesen amwittiri ewe fansoun lusun tori warotoon än Jiowa we rän. Nge, ach achocho lon än Jiowa angang epwe ussun itä sia amwittiri fetälin ewe fansoun atun sia witiwiti ena rän.—1 Korint 15:58.
19 Ach ekkekieki ussun än Kot we kapas me ekkewe emmwen lon epwe pwal alisikich ach sipwe “mwotoresiti” are “witiwiti” warotoon ena rän. (2 Piter 3:12, The Amplified Bible; The New Testament, ren William Barclay) A kapachelong lon ekkeei kapasen achechchem ekkewe chommong oesini ussun warotoon än Jiowa we rän me ekkewe feiöch mi somelo epwe toto ngeni ekkewe mi ‘witiwiti’ Jiowa.—Sefanaia 3:8.
20 Iei ewe fansoun pwe oukich meinisin sipwe lechüni ewe fön a kawor ren ewe soufos Sefanaia: “Me mwen eman epwe asükemiila usun asepwäl a ässala pön wiich, me mwen epwe wareitikemi än ewe Samol mi Lapalap song mi fokun watte, pwal mwen epwe torikemi ränin än ewe Samol mi Lapalap lingeringer. Oupwe kütta ewe Samol mi Lapalap, ämi meinisin mi tipetekison me lon ewe fanü, ämi mi aleasochis ngeni an kewe allük. Oupwe föri mine a pwüng o atekisonakemi. Eli oua tongeni sü seni ewe apwüng lon ränin än ewe Samol mi lapalap lingeringer.”—Sefanaia 2:2, 3.
21 A ifa me öchchün ewe lesenin ier fän iten 2007: “Än Jiowa we rän mi lapalap a arapoto.” Nöün Kot kewe aramas ra wesewesen ächiföüa pwe “a fen arapoto, me a wenewenen mwittirito.” (Sefanaia 1:14, NW) “Nge esap mmang.” (Apakuk 2:3) Iwe, atun sia witiwiti ena rän, amwo sipwe mammasa fansoun meinisin, pun sia mirititi pwe ewe saingoon pwönüetään ekkeei oesini a arapoto!
Ifa Ussun Kopwe Pölüeni?
•Met weween “än Jiowa we rän mi lapalap”?
•Met popun chommong ra tunalo atapwalapwalen ekkeei fansoun?
•Met popun a lamot pwe ekkewe chon Kraist loom repwe fen mwökütüküt fän atapwalapwal?
•Ifa ussun sipwe alapalo ach ngünün atapwalapwal?
[Ekkewe kapas eis fan iten ewe lesen]
1, 2. (a) Menni rän mi sokkolo aüchean ekkewe chon Kraist ra kan witiwiti? (b) Ikkefa ekkewe kapas eis sipwe eisini pwisin kich?
3. Met weween “än Jiowa we rän mi lapalap”?
4. Pwata chommong aramas repwe niuokkusiti ränin Jiowa mi arapoto?
5. Ifa ewe ekiek mi mürinnö fite million aramas ra eäni ussun än Jiowa we rän, me met popun?
6. Ifa ekiekin chommong aramas ussun “ränin” Jiowa, me met popun ekkewe chon Kraist rese mäirü ren ei mettoch?
7. Met epwe älisikich ach sipwe ekipwichi ewe rän mi atapwalapwal?
8. Met popun chommong ra tunalo ekkewe kapasen achechchem lon Paipel?
9. Met sokkun ekiek ekkewe aramas ra eäni lon ränin Noa me Lot we?
10. Ifa meefien Jiowa fän iten chokkewe rese äfänni ewe kapasen öüröür?
11. Menni fön sipwe lefäreni?
12. Jises a öüröürakich ussun met, nge ifa ussun föfförün nöün Jises kewe mi tuppwöl a sokkolo?
13. Ifa ussun Jises a menlapei ewe lamoten ach akkamwöchü ewe ngünün atapwalapwal?
14, 15. Pwata a fokkun lamot pwe ekkewe chon Kraist loom repwe mwittir sü lupwen ra küna pwe ekkewe mwichen sounfiun Rom ra pwelli Jerusalem?
16. Ifa ewe ekiek mi pwüng ekkewe chon Kraist loom repwe eäni pwe repwe küna manau lon ena fansoun riäfföü?
17. Met popun sipwe ekipwichi warotoon ena rän?
18, 19. Met epwe älisikich ach sipwe “amuttiri warotoon ranin Kot” we?
20. Menni fön sipwe lechüni?
21. Nöün Kot kewe aramas repwe achocho ngeni met lon ei ier 2007?
[Blurb on page 7]
Iei ewe lesenin ier fän iten 2007: “Än Jiowa we rän mi lapalap a arapoto.” —Sefanaia 1:14.
[Lios lon pekin taropwe 5]
Ussun chök lon ränin Noa we, ekkewe chon esiit repwe rükö lupwen Jiowa epwe apwüngüür
[Lios lon pekin taropwe 6]
A lamot än ekkewe chon Kraist mwittir sü lupwen ra “kuna ekkewe mwichen sounfiu ra pwellifeili Jerusalem”