Mi Naf Äi Achocho le Afalafal?
1. Met a tongeni alolileni emön Chon Kraist mi tuppwöl?
1 Ka fen pwisin eisinuk ei kapas eis? Eli ka letipengaw ren an a kükkünülo om fansoun le fiti ewe angangen afalafal pokiten ka chinnapelo, apwangapwangolo, are choulo wisom lon famili. Emön sister a wor ülümön nöün a makkeei pwe fän ekkoch a meefi mengiringir ren watteen fansoun me pöchökkül a äeä le tümünü an famili, nge ese kon lien tongeni fiti afalafal. Met epwe älisikich pwe sipwe itepök me rüüepek.
2. Met Jiowa a kütta senikich?
2 Met Jiowa A Kütta Senikich: Ese mwääl kich meinisin sia mochen alapalo ach angangen afalafal. Nge ren enletin, ach mochen föri och mettoch ese fokkun löllö ngeni ach tufichin apwönüetä met sia mochen. Om mochen alapalo om angang a pwäratä pwe ka ekieki lamoten ei angang. Sipwe chechchemeni pwe Jiowa a silei ach apwangapwang me ese kütta senikich met ese ki rech. (Kölf. 103:13, 14) Met Jiowa a kütta senikich? A mochen ach sipwe angang ngeni ren unusen letipach.—Kol. 3:23.
3. Ifa usun sipwe etittina ach achocho lon ewe angangen afalafal?
3 Met epwe tongeni älisikich le mirititi wesewesen tufichich? Sia tongeni tingorei Jiowa an epwe älisikich le etittina met sia wesewesen tufichin föri. (Kölf. 26:2) Chienach Chon Kraist mi äsimaü, mi sileöchükich me affata ngenikich ika mei wor och mettoch sipwe angang woon, a tongeni älisikich. (SalF. 27:9) Pwal och, chechchemeni pwe nonnomuch a sissiwil, ina popun a lamot sipwe etittina iteitan.—Ef. 5:10.
4. Itä epwe ifa ach ekiek usun ekkewe kapasen ächechchem seni Paipel ren ewe angangen afalafal?
4 Ekieköch Woon Ekkewe Minen Ächechchem: Atun eü kitir ekkewe chon emweir ra kan kökkölong ar kapasen pesepes. Ra föri ena pwe ekkewe chon ssä repwe achocho le tikeri ewe tep, nge esap fen ar repwe apwangapwangerelo. Pwal ina chök usun, ekkewe minen ächechchem a katowu lon ach mwich me nöüch kewe puk pwe sipwe ‘achocho le arongafeili ewe Kapas,’ ra älisikich nge rese fen ämmeef ngenikich pwe ese naf ach achocho. (2 Tim. 4:2) Sia tongeni lükülük pwe ika sia achocho le angang ngeni Jiowa ükükün ach tufich, i epwe chechchemeni me aücheani ach ‘angang me chen’ ngeni.—Ipru 6:10.