Ka Tongeni Älisi Pwülüwen Pwiich Kewe Rese Fitiir lon Ar Lükü?
1. Iö kewe ra pwal mochen älisi pwiich kewe pwe pwülüwer kewe repwe etiwa ewe enlet?
1 Mi wor ekkoch lon om we mwichefel pwülüwer rese fitiir lon ar lükü? Ika ewer, iwe esor tipemwaramwar pwe pwiich kana ra mochen pwe pwülüwer kewe repwe fitiir lon ewe fel mi enlet. Nge esap chök iir ra mochen ena, pwe pwal unusen ewe mwichefel ra usun chök Kot, ewe mi mochen pwe “aramas meinisin repwe küna manau, repwe pwal silei ewe let.” (1 Tim. 2:4) Ifa usun sipwe älisi pwülüwen pwiich kewe rese lükü?
2. Ifa usun ach mirit epwe atufichikich le älisi pwülüwen pwiich we ese fiti lon an lükü?
2 Äeüin, sipwe sotun le esilla ekiekin ewe chon lükün. Chommong pwülüwen pwiich kewe ra tongei chon ar famili me achocho le wiliti emön sam are in mi mürinnö. Eli ra eäni lüküen ar lamalam mi sokko seni ach. Eli ra chök silei met chiener kewe ra ereniir usun Chon Pwäratä Jiowa nge ese pwüng alor. Ekkoch ra mängaw ren än pwülüwer äeä fansoun fän iten ar fel nge itä ürürün fän iten ar famili. Mirit epwe älisikich le kirekiröch me süföliti pwülüwen pwiich we ese lükü, me sisap pireir atun sia nonnom ren.—SalF. 16:20-23.
3. Ifa ewe mettoch mi mürinnö seni meinisin epwe lukeato emön ese fiti ach lükü?
3 Chchüngü i: Eli le poputään, föfföröchüch epwe lukeato pwülüwen pwiich we ese lükü, nge esap ach afalafal ngeni. (1 Pit. 3:1, 2) A lamot sipwe äfänniir. Ekkewe sister lon ewe mwichefel repwe wisen chchüngü ekkewe fefin rese fiti pwülüwer lon ar lükü, iwe pwal ekkewe brother repwe chchüngü ekkewe mwän rese lükü. Ifa usun?
4. Ifa usun sipwe pwäratä ach chchüngü aramas?
4 Ka tongeni esile ngeni pwiich we pwe ka mochen chuuri pwülüwan we ese fiti lon an lükü. Kosap lichippüng ika pwülüwan we ese kon lien pwapwaiti atun ka kerän chuuri. Ach pwapwaiti me chchüngü eli epwe amwökütü le eäni ekieköch usun Chon Pwäratä Jiowa. (Rom 12:20) Chommong chon Kraist mi äsimaü ra etiwa pwülüwen pwiich we ese lükü le möngöön lekuniol pwe repwe alapalo ar silefengeniir me siwili ar ekiek mwääl usuch. Ra fos usun met i a kon pwapwaiti nge rese foffos usun ekkewe mettochun lükü. Eli epwe tufich ar repwe fos usun ewe Paipel lupwen i a meefi kinamwe ren. Are epwe tipeeü ngeni an epwe fiti ach mwich pwe epwe katol met pwülüwan we a kan käkkäeö, äkkäeüin ika a fen sissilei ekkoch chon ewe mwichefel. Inaamwo ika esaamwo mmolnetä le käeö Paipel, nge sia tongeni mwareiti ren an tipemecheresin älisi pwülüwan we mi lükü Kot.
5. Ifa usun ekkewe elter repwe älisi pwülüwen pwiich kewe rese lükü?
5 Ekkewe elter repwe äkkäeüin älisi pwülüwen pwiich kewe rese lükü me achocho le pwär ngeniir ewe enlet lon fansoun mi fich. Eli emön ese fiti ach lükü epwe aüseling atun a lüing are samau watte. Ika a wor mi mä lon ewe famili, iwe, ekkewe elter repwe etiwa pwülüwen pwiich we ese lükü an epwe pwal mommot rer atun ra aururu ewe famili.
6. Ikkefa ekkewe popun sipwe älisi pwülüwen pwiich kewe rese lükü?
6 Ekieki mwo pwapwaan pwiich we lon ach we mwichefel ika pwülüwan we a tolong lon ewe enlet! Epwe pwal apwapwaai Jiowa, ekkewe chonläng, me unusen ewe mwichefel. (Luk 15:7, 10) Iwe nge, ika emönnewe ese mwittir etiwa, iwe sipwe chüen pwapwa pwe ach akkachocho a apwapwaai Jiowa, ewe ese “mochen pwe eman epwe pöütmwälila, nge a fen mochen pwe meinisin repwe ekieksefäl.”—2 Pit. 3:9.
[Ekis Pwóróus lón pekin taropwe 6]
Eli le poputään, föfföröchüch epwe lukeato pwülüwen pwiich we ese lükü, nge esap ach afalafal ngeni