Achocho le Afalafal Ngeni Ekkewe Mwan

1. Ifa ewe watteen osupwang ren tümünün angangen ewe Mwu?

¹ Lon ei ränin le sopwoloon lupwen ewe angangen afalafal a lallapelo, a mmen watte ewe osupwang fän iten ekkewe mwan mi asimau mi fich ngeniir ar repwe wisen emmweni ewe mwichefel. (Mark 4:30-32; Fof. 20:28; 1 Tim. 3:1-13) Iwe nge, lon ekkoch leeni, lap ngeni fefin ra etiwa pworausen ewe Mwu nge chokisikis chök mwan ra etiwa. Ren eörenien ekkoch fönü, ekkewe mwan ra awisa ngeni pwülüwer kewe ar repwe emmweni ar famili lon ar fel ngeni Kot me asukula nöür kewe ussun Kot. Ifa ussun sipwe pesei chommong mwan ar repwe ekiekiöchü ar riri ngeni Kot me fitikich lon ewe fel mi enlet?

2. Ifa ussun än Paul me Piter achocho le afalafal ngeni ekkewe mwan ra uwaaöch?

² Äkkäeüin Afalafal Ngeni Ekkewe Mwan: Lupwen möküren ewe famili a etiwa ewe enlet, fän chommong a älisi chon le imwan ar repwe fiti i lon ewe fel mi enlet. Ren chök awewe lupwen ra kalapus, Paul me Silas ra afalafal ngeni emön chon masen imwen fötek. Iwe, ena mwan me chon an famili meinisin ra papataiselo. (Fof. 16:25-34) Seni än Paul afalafal lon Korint, “Krispus samolun ewe imwen felikis a lükü ewe Samol, i me chon an famili meinisin.” (Fof. 18:8) Jiowa a pwal nöünöü Piter an epwe afalafal ngeni Kornelius, emön meilapen ewe mwichen sounfiu, mi “tupwöl lon an niuokusiti Kot.” Kornelius fengen me aramasan me chiechian kewe mi kan ngeni ra papatais.—Fof. 10:1-48.

3. Ren om kopwe äppirü Filip, iö kewe “nöüwis” kopwe tongeni afalafal ngeni?

³ Ach afalafal ngeni ekkewe “nöüwis” a tongeni fokkun uwaaöch. (1 Tim. 2:1, 2) Awewe chök, nöün Jiowa chonläng a ereni Filip an epwe afalafal ngeni “eman nöüwis mi tekia,” mi tümünü an ewe Kiwinin Itiopia pisek aüchea meinisin. Filip a rongorong an ena mwan “aleani puken ewe soufos Aisea” me awewe ngeni ewe kapas allim ussun Jises. Ei re Itiopia a wiliti nöün Jises chon käeö, ese mwääl a pwal esilefetälei ewe kapas allim ngeni ekkoch atun an säi ngeni pukun fönüan. Eli a pwal afalafal ngeni ewe kiwin me nöün kewe meilap me chon angang, iir kewe aramas mi weires ar repwe rongorong ewe kapas allim.—Fof. 8:26-39.

4. Ifa ussun sipwe älisi chommong ekkewe mwan ar repwe rongorong ewe kapas allim?

⁴ Afalafal Ngeni Chommong Mwan: Pokiten lap ngeni ekkewe mwan ra akkangang le rän, en mi tongeni akkota pwe kopwe alapalo om fansoun afalafal le pwiin, lon wiikend, are atun ekkewe ränin pin? Ika kopwe afalafal iteitan lon ekkewe sitowa me leenien business a tongeni atufichuk le afalafal ngeni ekkewe mwan rese kan nonnom lon imwer. Ekkewe brother ra pwal tongeni achocho le afalafal ngeni chiener kewe mwan lon ar leenien angang. Lupwen ra afalafal imw me imw, äkkäeüin lon ekkewe terrritory ra kan afalafal ie fän chommong, eli ekkewe brother ra tongeni tingor ika iir mi tongeni fos ngeni möküren ewe famili.

5. Met emön sister epwe föri lupwen a chuuri emön mwan mi pwapwaiti ewe kapas allim?

⁵ Emön sister esap chök äkkäläemön lupwen epwe chuurisefälli emön mwan mi fen pwapwaiti ewe enlet. A tongeni mwin me pwülüwan we are pwal emön chon afalafal. Ika ewe mwan a feffeitä, epwe öch ika ewe sister epwe tingorei emön brother mi lipwäköch an epwe sopwelo le chuuri ena mwan.

6. Ifa ussun sipwe äppirü Paul lon an achocho le liapeni “chomong” aramas?

⁶ Pworaus Ussun Met Ekkewe Mwan ra Efich: Ewe aposel Paul a ekiekifichi ekkewe aramas mi aüselinga i me siwili an afalafal pwe epwe fichitiir ren an epwe liapeni “chomong me leir.” (1 Kor. 9:19-23) Pwal ina chök ussun, mi lamot sipwe ekiekifichi me ammolnata och pworaus ekkewe mwan sipwe chuuri repwe efich. Awewe chök, lap ngeni mwan ra mochen pworaus woon osukosuken moni, mwu mi nemenemöch, tümünün me lükücharen ar famili. Eli repwe pwal pwapwaiti pworausen met aüchean manauen aramas met epwe fis ngeni ei fönüfan lon mwach kan me pwata Kot a mutatä riäfföü. Ika sia pwarata mirit me afaani ekkewe mwan lupwen sia afalafal ngeniir, repwe etiwaöchü ach afalafal.—SalF. 16:23.

7. Ifa ussun chon ewe mwichefel ra tongeni älisi pwülüwan ekkewe sister, esap iir chon lükü nge ra fiti mwich?

⁷ Älisi Ekkewe Mwan Pwüpwülü, Esap Iir Chon Lükü: Pwüngün pwe an ekkewe sister föfför mürinnö epwe tongeni älisi pwülüwer kewe ar repwe eäni ach lükü, nge chon ewe mwichefel a pwal tongeni älisiir. (1 Pit. 3:1-4) Lupwen ewe mwan epwe fiti pwülüwan we ngeni ewe mwich, an ewe mwichefel pwapwaiti i epwe eü watte pisekin pwarata ngeni pwe a nom rech ewe enlet. An ena mwan fiti ekkewe mwich a pwarata pwe eli a sani ewe enlet, me epwe tipeeü an emön epwe käeö ngeni ewe Paipel.

8. Ifa ussun ekkewe brother ra tongeni älisi pwülüwan ekkewe sister, esap iir chon lükü nge ra pwäratä pwe ra ekis pwapwaiti ewe enlet?

⁸ Iwe nge, le poputaan ekkoch mwan mi pwüpwülü ra ekis chök pwapwaiti ewe Paipel nge neman mwirin och fansoun epwe tipeeü ngeni emön brother mi meefi kinamwe ren ar repwe pworausfengen ussun ewe Paipel. Ekkewe brother lon eü mwichefel a akkota le chuuri eü famili me akkasos ngeni pwülüwan ewe sister, esap i chon lükü. Ra pworausfengen woon ekkewe pworaus ewe mwan a pwapwaiti. Lo, lo, lo ra poputä le pworaus ussun Kot me ewe Paipel, nge iei ewe mwan a papatais. Lon pwal eü famili, emön brother a älisi ewe mwan an epwe föri tittin imwan na. Pokiten ewe brother a älillisöch ngeni, iwe ewe mwan a tipeeü ngeni an epwe käeö ewe Paipel. (Kal. 6:10; Fil. 2:4) Ika en emön brother, pwata kese achocho le älisi pwülüwan ekkewe ekkoch sister, esap iir chon lükü?

9. Met mwiriloon ekkewe asukul fän iten ekkewe chon Kraist mwan?

⁹ Asukuler Fän Iten Mwach Kan: Ekkewe mwan ra etiwa pworausen ewe Mwuun Kot me ra achocho le alapalo ar angang ngeni Jiowa pwe repwe tufichin eäni pwal och wis lon ewe mwichefel, iir repwe tongeni eü “liffang” lon ewe mwichefel. Ekkeei mwan ra äeä ar tufich me pöchökkül fan asengesin nöün Jiowa kewe aramas. (Ef. 4:8; Kölf. 68:18, NW) Ra mwasangasang le tümünü ewe mwichefel ren unusen letiper. (1 Pit. 5:2, 3) A ifa me watteen feiöch ekkeei elter ngeni pwiich kewe lon unusen fönüfan!

10. Ifa ussun än Ananias achocho le älisi Paul a pwal älisi chommong aramas?

¹⁰ Awewe chök, Saul a wiliti “eman soukünö ngeni ekewe chon lükün Israel,” inaamwo ika a fen pin emön chon eriäfföü ekkewe chon Kraist. (Rom 11:13) Ina popun, me le poputaan ewe chon künö Ananias a tipemwaramwar an epwe afalafal ngeni Saul pokiten a fen silei ussun i. Iwe nge, Ananias a älleäsochisi an ewe Samol emmwen me fos ngeni ena mwan, ewe a wiliti aposel Paul. Lon fite ier, fitu ngerou aramas mi rongorong än Paul afalafal ra fen küna älillis seni. Me tori ikenäi fite milion ra chuen feiöch seni ekkewe taropwe Paul a makkei lon ewe Paipel.—Fof. 9:3-19; 2 Tim. 3:16, 17.

11. Pwata sipwe föri ükükün ach tufich pwe sipwe afalafal ngeni ekkewe mwan?

¹¹ Ina minne, amwo sipwe föri ükükün ach tufich pwe sipwe tongeni afalafal ngeni ekkewe mwan. Ren ach achocho le föri ena, sipwe lükülük pwe Jiowa epwe efeiöchü ach tinikken le apwönüetä letipan me tümünü angangen ewe Mwu.