Einetin ewe Taropween Etiwetiw Fän Iten ewe Ächechchem Woon Unusen Fönüfan!
1. Ifa ewe angang mi aüchean ra akkota epwe fis woon unusen fönüfan mwen ewe Ächechchem?
1 “Oupwe föri ei pwe oupwe chechemeniei.” (Luk 22:19) Ren ach sipwe älleasochisi ei allük seni Jises, kich me ekkewe mi pwapwaiti, sipwe fiti ächechemen än Jises we mälo epwe fis lon March 30, 2010. Ewe taropween etiwetiw mi sokkolo aüchean fän iten ewe Ächechchem epwe poputä einet woon unusen fönüfan lon March 13 ngeni March 30.
2. Ifa usun sipwe anöünöü ewe taropween etiwetiw?
2 Ifa Usun Sipwe Anöünöü: Kopwe ngeni ewe chon imw ewe taropween etiwetiw pwe epwe tongeni küna ewe sasing woon, iwe ka apasa: “Lekuniolun March 30, fite million aramas woon unusen fönüfan repwe mwichfengen pwe repwe föri ächechemen än Jises we mälo. Ua mochen ngonuk ei taropween etiwetiw fän itom me om famili pwe oupwe tongeni fiti. Chienom kewe ra pwal tongeni fiti. Iei kulokun me ia epwe fis ie ewe ächechchem.” Ika mei tufich ka tongeni äiti ngeni ewe wokisin lon Luk 22:19 ewe a makketiw ie än Jises we allük. Iwe nge, chechchemeni pwe mi chök aükük ei fansoun einet, ina minne mi öch sisap attama ach fos pwe sipwe äwesi ewe leenien afalafal.
3. Iö ka tongeni etiwa?
3 Ika a watte än ewe mwichefel leenien afalafal, eli ekkewe elter repwe akkota pwe sipwe likiti ewe taropween etiwetiw lon ekkewe imw esor aramas lon. Ika mei tufich atun sia eineti ekkewe taropween etiwetiw, sia pwal tongeni anöünöü ekkewe puk. Achocho le etiwa nöüm kewe return visit, chon käeö, chienom chon angang, chon sukul, märärum, chon orum, me pwal ekkewe aramas ka sissileer.
4. Ach kilisou ren än Jiowa tong le awora ewe möön kepich a amwökütükich le föri met?
4 Mmolnetä le Unusen Fiti: Ewe fansoun Fääf ina ewe atun mi öch sipwe alapalo ach angangen afalafal. Ka tongeni föri om schedule pwe kopwe auxiliary pioneer? Mi wor nöüm are nöüm chon käeö mi feffeitä lon ar käkkäeö Paipel? Ika mi wor, kopwe fos ngeni ekkewe elter ika mi tufich ar repwe wiliti chon afalafal esaamwo papatais pwe repwe fiti ewe angang mi kkolo aücheaan. Ach kilisou ren än Jiowa tong ren an awora ewe möön kepich a amwökütükich ach sipwe fiti ewe Ächechchem me etiwa chommong aramas ar repwe pwal fiti.—Jon 3:16.