‘Letipen Kot Epwe Fis’
1. Ifa itelapen ewe eü ränin mwichelap lon ewe 2012 service ier, me pwata a mmen lamot?
1 Sia fförütä pokiten letipen Kot. (Pwar. 4:11) Ina popun, esap tufich an epwe pwönütä popun ach manau ika sise käeö le föri letipen Kot. Nge esap mecheres ach sipwe föri ena pun a wewe ngeni ach sipwe ükkü ngeni ach “apwönüetä mochenin inisich me ekiekin letipach” are “föri mine ekewe chon lükün lamalam ra pwapwa le föri.” (Ef. 2:3; 1 Pit. 4:3; 2 Pit. 2:10) Ika Kot ese älisikich, iwe, ewe Tefil epwe tongeni ‘liapenikich, pwe sipwe föri letipan.’ (2 Tim. 2:26) Ach eü ränin mwichelap fän iten ewe 2012 ierin angangen afalafal, itelapan, ‘Letipen Kot Epwe Fis,’ epwe älisi emön me emön le apwönüetä ewe aülüngätin kinikinin ewe iotek Jises a äiti ngenikich, ewe a erä “letipom epwe fis.”—Mt. 6:9, 10.
2. Ikkefa ekkewe kapas eis repwe pölü atun ewe mwichelap?
2 Ekkewe Kapas Eis Repwe Pölü: Kopwe aüselingöch ekkewe afalafal pwe kopwe silei pölüwan ekkeei kapas eis: Ikkefa pwal ekkoch mettoch mi lamot sipwe föri me lükün ach aüseling ngeni ewe Kapasen Kot? Pwata a lamot sipwe tipemecheres le älisi sokkopaten aramas? Ifa usun sipwe küna pwapwa lon manauach? Ämi nau kana, met a lamot oupwe ännetatä ngeni Jiowa? Met feiöchün ach föri letipen Kot? Pwata a fokkun atapwalapwal ach sipwe apöchökküla me pesei ekkewe ekkoch?
3. Ifa usun sipwe alapaalo feiöchüch seni ekkewe afalafal lon ewe eü ränin mwichelap?
3 A fokkun lamot kopwe fiti me aüselingöchü ekkewe afalafal. Emön tupun Bethel are emön elter mi chuchchuuri mwichefel epwe pwal wisen eäni ekkoch afalafal. Oupwe tongeni fos ngeniir me pwülüwer kewe, ika mi wor pwülüwer, mwen me mwirin ewe mwichelap. Atun ka liwiniti imwom, kosap wiliiti emön chon “manlükala rongean,” nge oupwe enniwili ekkewe afalafal lon ämi famili me pworausfengen ika ifa usun oupwe alapaalo ämi föfföri letipen Kot.—Jem. 1:25.
4. Pwata a mmen lamot ach akkomwa letipen Kot?
4 Arapakkan chök, chokkewe mi akkomwa pwisin mocheniir nge rese mochen föri letipen Jiowa repwele kitetterilo. (1 Jon 2:17) Ina minne, sia fokkun kilisou pwe Jiowa a awora pworaus mi fichiiti ei fansoun pwe epwe älisikich le akkomwa ach föfföri letipan!