Ewe Napanap mi Lamot seni Meinisin a Nom ren Emön Sense mi Mürinnö
1. Ifa ewe napanap mi lamot seni meinisin emön sense mi mürinnö a eäni?
1 Ifa ewe napanap emön epwe eäni an epwe emön sense mi mürinnö? An fiti sukul tekia? Pükün tufichin? Silean? Aapw, ren enletin, ina ewe napanap mi esissillatä nöün Jises kewe chon käeö, pwal ina pwönüetään ewe Allük, pwal ina napanapen Jiowa we mi kkolo aüchean seni meinisin. (Jon 13:35; Kal. 5:14; 1 Jon 4:8) Ina ewe napanap tong. Ekkewe sense mi mürinnö ra pwäraatä tong.
2. Pwata a lamot sipwe eäni tong ngeni aramas?
2 Tongei Aramas: Jises, ewe Sense mi Lap, a pwäraatä an tong ngeni aramas, iwe a amwökütüür le aüseling ngeni i. (Luk 5:12, 13; Jon 13:1; 15:13) Ika sia tongei aramas, sipwe afalafal ngeniir iteiten fansoun a suuk ngenikich. Ekkewe minen eppet usun chök koput me än aramas tanechepwak resap eppetikich. Sipwe enletin äfänni ekkewe aramas sia afalafaler, me siwili met sipwe fos usun ngeni minne epwe lamot ngeniir. Sipwe awora fansoun esap chök lon ewe atun sia käeö Paipel ngeni emön, nge pwal lon fansoun sia ammolnatä fän iten emön me emön nöüch kewe chon käeö.
3. Ifa usun ach tongei ekkewe pworaus mi enlet epwe älisikich lon ach angangen afalafal?
3 Tongei ewe Enlet lon Paipel: Jises a pwal pwäraatä an tongei ekkewe pworaus mi enlet lon Paipel, me ren iir usun chök pisek aüchea. (Mt. 13:52) Ika sia tongei ewe enlet, sipwe mwasangasang lupwen sia fos, iwe epwe tongeni amwasangasanga ekkewe chon aüselingakich. Ena tong epwe älisikich le ännefota ewe pworaus mi lamot sia afalafala ngeni aramas nge esap lipwäkingawach, iwe eli sisap kon lien niuokkus lupwen sia afalafal.
4. Ifa usun sipwe ämääraatä tong?
4 Ämääraatä Tong: Ifa usun sipwe ämääraatä ewe tong ngeni aramas? Ren ach ekilonei ewe tong Jiowa me Jises ra pwäraatä me osupwangen aramas lon ar silefichi Kot. (Mark 6:34; 1 Jon 4:10, 11) Ach aücheani ewe enlet lon Paipel epwe alolloololo ika sia pwisin käeö Paipel me ekilonei minne sia käkkäeö iteitan. Tong, ina kinikinin uwaan än Kot we manaman. (Kal. 5:22) Ina popun, sia tongeni tingor än Jiowa we manaman mi fel me an älillis pwe sipwe ämääraatä ewe tong. (Luk 11:13; 1 Jon 5:14) Ese lifilifil menni sukul sia fiti, ükükün sileach lon ewe enlet are pükün tufichich, nge sia tongeni wiliti emön senseen Paipel mi lipwäköch ika sia pwäpwäraatä tong.