Pworun Kapas Eis

◼ Ach anöünöü ngeni aramas nöüch kewe puk epwe alongolong woon met?

Sipwe akkomw ppii ika emön a sani le aüseling ngeni pworaus seni Paipel. Ika a äfänni ach afalafal ngeni, iwe, sia tongeni likiti ngeni ruu Leenien Mas are eü puk sia anöünöü lon ena atun. Sipwe tongeni föri ena inaamwo ika sia esilla pwe eli epwe tongeni awora ekis chök monien älillis ngeni ewe angangen afalafal are esap fen wor. (Hiop 34:19; Pwar. 22:17) Iwe nge, sisap anöünöü nöüch kewe puk mi aüchea ngeni chokkewe resap aücheani.​—Mt. 7:6.

Ifa usun emön chon imw a pwääri pwe a etiwa pworausen Paipel? Epwe sillelo ren an tipemecheres le pworaus ngenikich, aüselingöch atun sia fos, pölüweni ach kapas eis, me uwawu meefian. An fiti älleaan ekkewe wokisin seni Paipel a pwal pwäraatä an süföliiti än Kot we Kapas. Epwe pwal öch sipwe eisini ika epwe älleani nöüch kewe puk. Ekkewe chon afalafal repwe äeä ar mirit le esilla ika emön a mochen älleani nöüch kewe puken äweween Paipel. Äwewe chök, atun sia afalafal woon al, ese öch ach sipwe chök anöünöü nöüch kewe puk ngeni aramas ese lifilifil. Nge ika ese ffat ika emön epwe älleani nöüch kewe puk, sipwe chök ngeni echö tract.

Pwal usun chök ren ekkewe puk emön chon afalafal epwe angei seni ewe leenien puk, itä epwe chök longolong woon ükükün met epwe nöünöü lon ewe angangen afalafal, nge sap woon ükükün ewe moni epwe awora le älisaatä ei angang. Ewe moni sia kan awora esap möön nöüch kewe puk nge fän iten kälisitään meinisin kinikinin ewe angangen afalafal woon unusen fönüfan. Ese lifilifil nonnomuch, nge ach kilisou epwe amwökütükich ach sipwe kisäseü le älisaatä angangen ewe Mwu ren ach fangolo monien älillis seni minne a wor rech nge sap seni somwen wöüch. (Mark 12:41-44; 2 Kor. 9:7) Sipwe chök angei ükükün puk sipwe tongeni anöünöü, nge sisap asolaper.

[Ekis Pwóróus lon pekin taropwe 2]

Ekkewe chon afalafal repwe äeä ar mirit le esilla ika emön a mochen älleani nöüch kewe puken äweween Paipel