Tümünüöch Atun Afalafal
1. Pwata a lamot sipwe tümünüöch lon ewe angangen afalafal?
1 Nöün Kot kewe chon angang ra “usun chök sip lein wolif,” le afalafal “lein ei tapin aramas mi chok pwor pwal sokosokongau.” (Mat. 10:16; Fil. 2:15, TF) A eniuokkus ekkeei pworaus usun fitikoko lefilen chon eü fönü, mwichen aramas mi efisatä osukosuk, me chöüfetälin angangen sü fän aramas. Ikkena esissillen än aramas mi ngaw ra “fokun ngauala.” (2 Tim. 3:13) Ikkefa än Paipel kewe kapasen emmwen sipwe apwönüretä pwe epwe älisikich le “eäni tipachem” lon ewe angangen afalafal?—Mat. 10:16.
2. Ikkefa ekkoch mettoch eli epwe mürinnö sipwe lo seni ikewe sia afalafal ie, me sopwelo lon pwal eü leeni?
2 Eäni Mirit: Än Salomon Fos 22:3 a menlapei tipachemen ach “opola” seni feiengaw. Sipwe tümünüöch! Nükünüköchün eü leeni a tongeni mwittir siwil. Eli ka küna än ekkewe police föri ar angang are chommongun aramas woon ewe al. Fän ekkoch emön chon imw mi kirekiröch epwe awora kapasen öüröür. Sipwe mirit ika sia mwittir lo me sopwelo le afalafal lon pwal eü leeni, lap seni ach nomwotiw me katol met a fis.—Än SalF. 17:14; Jon 8:59; 1 Tes. 4:11.
3. Ifa usun ewe kapasen emmwen lon Än Salomon Afalafal 4:9 a weneiti ach angangen afalafal?
3 Angangfengen: Än Salomon Afalafal 4:9 a apasa: “Ruömön . . . a öch nap seni emon.” Eli ka fen eörenaalo le äkkäläemön le afalafal, nge iei, mi chüen öch ena? Lon ekkoch leeni mi öch. Nge lon ekkoch leeni, iei a efeiengaw än emön fin Kraist are säräfö epwe äkkäläemön le afalafal imw me imw, äkkäeüin atun a kiroch. Sia fen küna lamoten an epwe wor chienach pwe sipwe tümünüfengenikich. (SalAf. 4:10, 12) Emön me emön epwe pwal tümünü ekkewe ekkoch lon ar kümien afalafal. Kopwe eörenaalo le esile ngeni chienom kewe pwe kopwele lo seni ewe leenien afalafal.
4. Ifa usun sipwe awora tümün fän iten meinisin chon ewe mwichefel?
4 Ekkewe elter iir chon ‘mamasakich,’ repwe wisen awora emmwen mi mürinnö alongolong woon met a fiffis lon ach we leenien afalafal. (Ipru 13:17) Jiowa epwe efeiöchükich ika sia pwäri ach tipemirit le unusen tipeeü ngeni ekkewe elter. (Mika 6:8; 1 Kor. 10:12) Amwo meinisin nöün Kot kewe chon angang repwe älisatä ewe angangen afalafal lon ewe leenien afalafal fän lipwäköch, nge iteitan epwe fän tümünüöch.