Kosap Aúkúkú Óm Angang, nge Okkufu Memmeefin Lipwákingaw
1. Pwata ekkóch ra pireir le ereni emén ika a mochen káé Paipel?
1 Pokiten kese lúkúlúk wóón óm tufichin emmweniéchú eú káé, iwe ka pireir le ereni emén ika a mochen káé Paipel? Me lóóm, fán ekkóch néún Kot kewe chón angang mi tuppwél choweán Moses me Jeremaia ra meefi pwe ra lipwákingaw lón ar angang. (Eks. 3:10, 11; 4:10; Jer. 1:4-6) Iwe nge, chómmóng ra pwal meefi ekkena sókkun memmeef. Ifa usun sipwe okkufu ekkena memmeef?
2. Pwata sisap chék menemenéch le fiti ewe angangen afalafal imw me imw nge likit ngeni ekkewe ekkóch ar repwe wisen féri ewe angangen káé ngeni aramas?
2 Sipwe chechchemeni pwe Jiowa ese fókkun erenikich pwe sipwe féri eú angang mi lu seni ach tufich. (Kölf. 103:14) Ina popun wisach we le álisi aramas le wiliiti chón áppirú Kraist me “afalafaleer,” ina ewe angang kich mi tongeni apwénúetá. (Mat. 28:19, 20) Jiowa ese chék ewisa ngeni chókkewe mi kon lipwákéch are kon tufich me leich ena angang. (1 Kor. 1:26, 27) Ina popun, sisap chék menemenéch le fiti ewe angangen afalafal imw me imw nge likit ngeni ekkewe ekkóch ar repwe wisen féri ewe angangen káé ngeni aramas.
3. Ifa usun Jiowa a elipwákéchúkich lón ewe angangen káé ngeni aramas?
3 Jiowa A Elipwákéchúkich: Ach lipwákéch le álisi aramas le wiliti chón áppirú Kraist a pop seni Jiowa. (2 Kor. 3:5) A áiti ngenikich ekkewe enlet lón ewe Paipel me ren an we mwicheich, ewe pwal mwo nge ekkewe mi kon tipachem wóón ei fénúfan rese silei. (1 Kor. 2:7, 8) A fen akkóta pwe epwe makketiw napanapen án Jesus, ewe Sense mi Lap, asukula aramas pwe sipwe káé seni. Me a kan akkawora minen káit ngenikich ren ewe mwichefel. Pwal och, Jiowa a awora ngenikich ekkewe minen káé mi lamot ngenikich le asukula aramas ewe Paipel. A fen ngenikich ekkewe pisekin káit usun chék ewe puk Paipel A Apasa, ewe mi áitikich ewe enlet lón eú napanap mi ffat me mecheres ach sipwe weweiti. Iwe ach kákkáé ngeni emén, ese kon weires usun met sia ekieki.
4. Pwata sipwe lúkúlúk pwe Jiowa epwe álisikich?
4 Moses me Jeremaia ra tongeni apwénúetá wiser kewe ren án Jiowa álillis. (Eks. 4:11, 12; Jer. 1:7, 8) Sia pwal tongeni tingorei Jiowa pwe epwe álisikich. Iwe, atun sia káé ngeni emén ewe Paipel, sia asukula eménna ewe enlet usun Jiowa, ewe mi apwapwaai I. (1 Joh. 3:22) Ina popun, kopwe achocho le fiti ewe angangen káé ngeni aramas, eú kinikinin ewe angangen afalafal mi kon apwapwa me kopwe kúna feiéch ren.