Kosap Aúkúkú Óm Angang, nge Angang Wóón Tawengawen Óm Schedule
1. Pwata ekkóch ra tipemwaramwar le eisini aramas ika ra mochen káé?
1 Ekkóch ra tipemwaramwar le eisini aramas ika ra mochen káé rer pokiten tawengawen ar schedule. A lamot fansoun ren ach sipwe álisi emén chón káé. A pwal lamot fansoun le ammólnatá ewe káé, emmweni me álisi ewe chón káé an epwe pwákini met ekkewe mi eppeti. Ewe aposel Paulus a erá pwe a pennúkúoló manawan pwe epwe álisi ekkewe chón Tesalonika le káé usun Jiowa. (1 Tes. 2:7, 8) Ifa usun sipwe káé ngeni emén inaamwo ika sia kon tawengaw lón ach schedule?
2. Ifa usun ach tongei Jiowa a amwékútúkich le áeá ach fansoun?
2 A Lamot Fansoun lón Ach Angang Ngeni Jiowa: Mi pwúng pwe sipwe awora fansoun le fel ngeni Jiowa. Áwewe chék, a lamot fansoun ren ach fiffiti mwich, angangen afalafal, álleani Paipel me iótek. Emén mi pwúpwúlú mi kon chómmóng an angang, a pwapwaiti le awora fansoun ngeni pwúlúwan we. Nge sipwe fen kon pwapwa le awora fansoun le “alomota” ach fel ngeni Jiowa pokiten sia tongei i. (Ef. 5:15-17; 1 Joh. 5:3) Me ren Jesus, eú kinikinin ach fel ngeni Kot mi kon lamot, ina ach fiti ewe angangen álisi aramas le wiliiti chón áppirú Kraist. (Mat. 28:19, 20) Ach ekilonei ei mettóch epwe álisikich pwe sisap pireir le etiwa wisach le káé ngeni aramas.
3. Ifa usun sipwe álisi emén chón káé inaamwo ika nónnómuch a aosukosuka ach schedule fán iten ewe angangen afalafal?
3 Nge ifa usun ika sia osukosuk pokiten angangen moni, samau mi chou are ren wisach kewe lón ewe mwichefel? Ekkewe chón afalafal rese nóm fán ekkóch pwe repwe káé ngeni néúr kewe chón káé, ra féri ena káé wóón phone are computer. Chókkewe mi osukosuk ar schedule pokiten watteen ar samau, ra akkóta pwe néúr kewe chón káé repwe etto rer lón imwer kewe pwe repwe káé ngeniir. Ekkóch ra akkóta pwe epwe wor emén chón afalafal mi tinikken epwe wisen káé ngeni néúr kewe chón káé ika rese tawe.
4. Ikkefa ekkewe feiéch mi pop seni ach fiti ewe angangen káé ngeni aramas?
4 Paulus a kúna watteen pwapwa seni an fangóló an fansoun me péchékkúl le álisi aramas le káé ewe enlet. (Föf. 20:35) Atun a ekilonei uwaan an angang lón Tesalonika, a fókkun kilisou ngeni Jiowa. (1 Tes. 1:2) Ach pwapwa me menemenéch lón ewe angangen afalafal a tongeni lapóló ika sise mut ngeni tawengawen ach schedule epwe aúkúkú ach fiti ewe angangen káé ngeni aramas.