Kosap Pireir!
1. Lon met sokkun napanap sisap pireir le “eäni kirikiröch”?
1 Ren ach achocho le esilefeili ewe kapas allimen än Kot we Mwu, sisap pireir le “eäni kirikiröch” ngeni aramas lon ach we leenien afalafal. (SalF. 3:27) Ese pwal wor och pworaus sia tongeni ngeni aramas epwe mürinnö seni me lükün ewe fansoun mi mürinnö epwe war fän än Kot we nemenem. Inaamwo ika ka achocho le apworausa ewe äpilükülük ussun ewe Mwu ren om eäni afalafal mi sereseröch are anöünöü ekkewe puk, pwata kose achocho ngeni an epwe wor nöüm chon käeö, ika ese mwo wor nöüm?
2. Met epwe tongeni pineikich seni ach sipwe nöüni chon käeö?
2 Fän ekkoch, ach memmeef ussun ach nöüni chon käeö, ina eü me lein ekkewe minen eppet a kon weires seni meinisin. Ekkoch ra pireir le käeö ngeni emön pokiten ra meefi pwe ir mi lipwäkingaü are ra tawengaü. Ekkewe minen älillis mi mak fan epwe älisuk ren om kosap pireir le awora om älillis lon ewe angangen afalafal.—Mt. 28:19; Fof. 20:20.
3. Pwata a tufich ngenikich ach sipwe asukula aramas ewe Paipel?
3 Ese Wor Ach Lükülük: Neman üküngaüen ach sukul are ren pwal ekkoch popun sia äpilükülüküngaü ren lon ach tufich le nöüni chon käeö. Ekkewe Chon Kraist lon ewe äeüin senturi ra lipwäköch nge “rese kaeo lon sukul, o ir mi aramas kisikis” chök. Met a atufichiir pwe repwe tongeni asukula ekkewe ekkoch ussun ewe enlet? “Ra pin nonnom ren Jises.” (Fof. 4:13) Ra käeö seni Jises, ewe Sense mi Lapalap. An kewe afalafal me napanapen an asukul ra nom lon ewe Paipel fän itach. Inaamwo ika sise awesi sukul, nge ka kan akkangei ewe osukul ussun Kot me an kewe kokkot, ewe ese wor tappin.—Ais. 50:4; 2 Kor. 3:5.
4. Met sia käeö seni än Amos we leenien äppirü?
4 Fän ekkoch Jiowa a nöünöü ekkewe soufos le apwüngü mwäälin ekkewe sou nemenem are ekkewe mi eäni wis tekia. Ekkoch ussun Amos ese wor itan. Amos a erä: “Sap ngang eman soufos, sap pwal ngang eman nöün soufos. Nge i ngang chök eman chon masen sip me chon tümwünü ekewe irä sikamor.” (Am. 7:14) Ina minne, Amos ese pireir le apworausa än Jiowa we kapwüng ngeni ewe samol fel Amasia, ewe chon fel ngeni ululun kou. (Am. 7:16, 17) Sipwe fokkun chechchemeni pwe sia föri än Kot angang me epwe älisikich pwe sipwe fich ngeni ewe angang a mochen sipwe föri.—2 Tim. 3:17.
5. Pwata sipwe fokkun achocho le poputäni eü Bible study inaamwo ika a kon chommong wisach?
5 Ren Chommongun Ach Angang: Inaamwo ika a kon chommong met kopwe föri, ese mwääl ka akkota om fansoun le fiti ewe angang afalafal iteitan. Eü me lein ewe kinikinin ach angangen afalafal mi fokkun apwapwa seni meinisin, ina ach nöüni emön chon käeö. Ina eü feiöch ach küna än Jiowa we Kapas a pwäpwälo manamanan lon manauen aramas. (Ipru 4:12) Jiowa a pwapwa lupwen sia pennüküolo pwisin ach kewe mochen ren ach sipwe älisi ekkewe ekkoch pwe repwe “sineifichi minne mi enlet.” (1 Tim. 2:4) Pwal mwo ekkewe chonläng ra meefi pwapwa atun emön a aier seni napanapan kewe minen loom me äsimaüolo le wiliti nöün Kot chon angang.—Luk 15:10.
6. Ifa wisach mi aüchea lon ach akkapwönüetä letipen Kot?
6 Kot “a mochen pwe aramas meinisin repwe kuna amanauen ngunur o sineifichi minne mi enlet.” (1 Tim. 2:4) A ifa me tekian wisach ach sipwe apwönüetä letipen Kot lupwen sise kan pireir le käeö ngeni aramas!