Áiti Ngeni Aramas jw.org Atun Óm Afalafal

Ach we Web site a fókkun álilliséch ngenikich le esilefeili ewe kapas allim “lon unusen fonufan meinisin.” (Föf. 1:8, TF) Chómmóng aramas rese silei jw.org. Nge ra káé usun atun chék emén chón afalafal a áiti ngeniir.

Emén chónemmwen mi wisen sáifetál a kapiinawu ewe video itelapan Pwata Kopwe Káé ewe Paipel? wóón néún we phone me áiti ngeni aramas ika a tufich ngeni an epwe epii ngeniir. Áwewe chék, atun ewe angangen afalafal imw me imw, iei met a apasa: “Ngang ua kan chuchchuuri aramas lón ekis fansoun le álisiir ifa usun repwe kúna pélúwan ekkeei kapas eis mi lamot: Pwata a chómmóng osukosuk lón ei fénúfan? Ifa usun Kot epwe pwákiniir? Me ifa usun sipwe tongeni likiitú lón ekkeei rán? Ei video mi mwochomwoch epwe pélúweni ekkena kapas eis.” Iwe, a chék sópweló ren an tiki ewe video me ppii ika ewe chón imw epwe sani. A kon amwarar ewe video pwe chómmóng aramas ra chék newenewenelong tori muchulóón. Iwe mwirin ewe chónemmwen mi wisen sáifetál a apasa: “Ka kerán rong me lón na video pwe ka tongeni tingor eú káéén Paipel wóón Internet. Nge pokiten ua nóm, ua tongeni ekis áiti ngonuk ewe káéén Paipel iei.” Ika ewe chón imw a tipeeú, iwe a áiti ngeni ewe káé ren an néúnéú ewe puk Pwóróus Allim. Ika ese wor án ewe chón imw fansoun, iwe a akkóta pwe epwe féri ena atun an liwinsefál. Atun a ló asésé lón kafie pwe epwe ún coffee, iwe a pwal chék eáni ena sókkun afalafal ngeni emén a móót arapakkan ngeni, mwirin an ekis fós me chiechi ngeni. Ka kan áiti ngeni aramas jw.org atun óm afalafal?