Asukul lón Pwóróus Allim Brochure
1. Ifa ewe napanap ewe Pwóróus Allim brochure a ffér lón?
1 Lón Ach Angangen Afalafala ewe Mwú minen July, sia fen pwóróus usun eú minen asukul mi fókkun aúchea, ina ewe brochure Pwóróus Allim seni Kot! Ese makketiw masouan ekkewe wokisin lón ena brochure pwe ewe chón imw epwe pwapwaiti an káé seni pwisin ewe Paipel. Chómmóng me lein néúch kewe puk ra ffér lón ewe sókkun napanap pwe ewe chón káé epwe tongeni káé wóón pwisin an, nge ei brochure a ffér lón ewe napanap pwe epwe káé nge epwe wor emén epwe wisen emmweni. Ina popun, ika sia anéúnéú ei puk, mi lamot sipwe sótuni le áiti ngeni ewe chón imw ewe kókkótun káé pwe epwe tongeni kúna apwapwaan an káé seni ewe Paipel ewe kapas allim.—Mat. 13:44.
2. Ifa usun sia tongeni néúnéú ewe Pwóróus Allim atun ach áeúin fós ngeni aramas?
2 Áeúin Ach Fós Ngeni Aramas: Sótun erá ei: “Atun aua chuuri aramas ra aúreki ika met epwe fis ngeni aramas lón mwachkkan. Óm ekiek nónnómuch lón ei fénúfan epwe múrinnéló? [Aúseling ngeni meefian.] Ewe Paipel a masou ren kapas allim mi ngenikich ápilúkúlúk. Ikkeei ekkóch kapas eis Paipel a pélúweni.” Eiti ngeni ewe chón imw ewe brochure, me etiwa epwe filatá eú kapas eis seni lúkúnúppen ena puk. Mwirin áiti ngeni ewe káé lón parakraf eú lón ena lesen a filatá. Are eisini ewe chón imw eú kapas eis mi achchúngú letipen aramas mi lóngólóng wóón eú lesen ka filatá, iwe mwirin, áiti ngeni ifa usun ewe puk a tongeni álisi i le kúna pélúwen me ren ewe Paipel. Ika a wor video wóón jw.org usun ena lesen, ekkóch chón afalafal ra fichi lón ena atun.
3. Áweweei ifa usun kopwe emmweni eú káé nge ka néúnéú ewe Pwóróus Allim.
3 Usun Ach Emmweni ewe Káé: (1) Álleani ewe kapas eis mi makkechól me wor nampaan pwe epwe álisi ewe chón imw le nefotofot wóón ewe pwóróus mi lamot. (2) Álleani ewe parakraf mwirin. (3) Álleani ekkewe wokisin mi kopái makkan me áeá ekkewe esin kapas eis rese achowu letipen aramas pwe epwe álisi ewe chón imw le kúna ifa usun ekkewe wokisin ra pélúweni ewe kapas eis mi wor nampaan. (4) Nge ika mi wor pwal eú parakraf fán ena kapas eis iwe kopwe férsefáli nge lón chék napanapen ena oruuan me aúlúngátin. Ika mi wor eú video mi pwóróus usun ena kapas eis nge kesaamwo fichi ngeni ewe chón imw, fichi atun oua fósfengen wóón. (5) Sáingolóón eisini ewe chón imw epwe pélúweni ewe kapas eis mi wor nampaan pwe kopwe núkúnúk pwe a weweiti.
4. Met epwe álisikich pwe sipwe angangéch le néúnéú ei minen asukul mi aúchea?
4 Sileéchú ei pisekin asukul mi aúchea. Néúnéú iteiten fansoun mi fich. Me mwen eú me eú káé, ekieki usun ewe chón káé me ifa usun kopwe áweweéchú nge kopwe néúnéú ekkewe wokisin lón ewe lesen. (SalF. 15:28; Föf. 17:2, 3) Atun epwe watteeló óm silei me óm tufich eli kopwe fókkun ekieki pwe ei brochure eú me lein ekkewe ka kon sani le asukula aramas ewe enlet lón!