Mineféén Kélún Mwareiti Jiowa!
1 Lón án Watch Tower Bible and Tract Society of Pennsylvania mwich mi fiffis iteiten ier, nge lón ei ier a fis lón October 4, 2014, a esilesil pwe epwe wor ekkesiwilin néúch we puken kél. A ifa me ámmeseiken ena pwóróus! Ra áchema ngeni meinisin chón fiti ena mwich lamoten ach kewe kélún Mwú lón ach fel ngeni Jiowa.—Kölf. 96:2.
2 Neman kopwe ekieki, ‘Pwata a lamot an epwe ekkesiwil néúch we puken kél?’ A wor chómmóng popun. Áeúin, ach weweiti weween ekkewe wokisin ra ffaffateló, ina popun a lamot kúkúún ach kewe kél repwe siwil. (SalF. 4:18) Oruuan, lón ekkóch fósun fénúfan, chómmóng mwuten kapas lón néúch we puken kél a pop seni ewe New World Translation minen akkomw. Iwe, mi lamot epwe ekkesiwil kúkúún ekkena kél pwe repwe tipeeú ngeni ekkewe kapas lón ewe mineféén afféún New World Translation. Pokiten epwe watte angangen ekkesiwilin kúkúún ekkewe kél, iwe a kapwúngúló pwe epwe pachelong fitaché mineféén kél lón néúch puken kél.
3 Itá sipwe witiwit tori ewe mineféén puken kél epwe katowu me mwen sipwe poputá le eáni ekkena mineféén kél? Aapw. Sia pwapwa le esile ngenikemi pwe lón ekkan maram, fitaché mineféén kél repwe kawor wóón ach we Web site jw.org. Ika eché mineféén kél a katowu lón kapasen fénúom, iwe epwe kkótóló pwe le muchúlóón ewe Káitin Chón Afalafal sipwe eáni ena kél nge epwe mak lón ewe schedule “mineféén kél.”
4 Usun Káéén Ekkewe Mineféén Kél: A tongeni an epwe weires ach sipwe káé eché mineféén kél. Nge sipwe usun ewe soumakken kélfel, sia mochen sipwe kélú ekkewe kél lón ach kewe mwich nge sisap “fanafanala.” (Kölf. 30:12) Ren óm kopwe silei eché mineféén kél, féri ekkeei mettóch.
Aúseling fán fite ewe nikáttik, ekkewe epwe katowu wóón ach we Web site. Óm aúseling ngeni fán chómmóng ewe nikáttik epwe ámecheresi óm kopwe chechchemeni.
Káé kúkúún ewe kél me sótuni le amwéchúlúkún.
Kélú ewe kél. Féri ena tori óm kopwe fókkun silei.
Asóssót ekkewe mineféén kél fán fitu lón ámi Famili Fel tori óm famili a silei.
5 Lón ekkan maram mwach atun a kefilitá eché mineféén kél sipwe eáni le muchulóón ewe Káitin Chón Afalafal, ewe mwichefel epwe aúseling fán eú akkomw ngeni ewe nikáttik. Mwirin chón mwich repwe kél fiti ewe nikáttik, usun chék met sia fen piin féfféri ren ekkewe ekkóch.
6 Ach eáni kél lón ach kewe mwich a atoto ach pwapwa le kélfengen lón ach mwareiti Jiowa. Ina popun, itá sisap eérenaaló le towu ika ese wor popun, atun sipwele kél lón ach kewe mwich.
7 A wor pwal eú alen ach sipwe tongeni pwáraatá ach aúcheani ach kewe kél mi pin. Mwen poputáán eú me eú prokram lón ewe mwichelap, a ttik och nikáttik. Pwiich kewe seni sókkópaten fénú ra pwisin mééni ar sái fán ruu lón eú ier ngeni Patterson, New York pwe repwe féri ekkewe nikáttik mi ngiiéch fán iten ach fel. Ina popun, mi lamot sipwe álleasochis lupwen ewe chónemmweni ewe mwichelap a etiwakich le mómmóót me aúseling ngeni ewe nikáttik férien pwich kewe. Ach féri ena, epwe álisikich le ammólnatá letipach ngeni ewe prokram epwe tapwoto mwirin.—Esr. 7:10.
8 Itelapan eché me lein ekkewe mineféén kél, “The Kingdom Is in Place—Let It Come!” (Ewe Mwú A Poputá An Nemenem, Amwo Epwele War!) A ffér ei kél fán iten a 100 ierin Án Kot we Mwú le Nemenem. Ra menlapei ei kél lón ewe mwich a fis October 4, 2014.
9 Ekkewe mineféén kél, iir ekkewe “mettoch mi mürina” seni Jiowa. (Mat. 12:35a) Sipwe achocho le káé ekkeei mineféén kél me kél seni letipach pwe sipwe ngeni ach Kot ewe mi fich ngeni ach mwareiti me asamolu.—Kölf. 147:1.