Sipwe Pwapwa Fansoun Áchechchem!
1. Ifa eú alen ach sipwe alapaaló ach pwapwa fansoun Áchechchem?
1 En mi mochen alapaaló óm pwapwa fán March, April me May? Iwe, eú alen óm kopwe féri ena, kopwe alapaaló óm fiti ewe angangen afalafal nge ika mi tufich, kopwe auxiliary pioneer. Ifa usun ena epwe alapaaló óm pwapwa?
2. Pwata lapólóón ach fiti ewe angangen afalafal a pwal ina lapólóón ach pwapwa?
2 Alapaaló Óm Pwapwa: Jiowa a férikichetá ren ewe tufich le eáni pwapwa me menemenéch seni ach fel ngeni atun sia angei pwúkún osupwangach le riri ngeni. (Luk. 11:28) A pwal férikich lón ewe napanap pwe sipwe kúna pwapwa lón ach fang ngeni ekkewe ekkóch. (Föf. 20:35) Ewe angangen afalafal a atufichikich le fériir me ruu, weween ach sipwe fel ngeni Kot me álisi aramas. A pwúng pwe lapólóón ach angangen afalafal, pwal ina lapólóón ach pwapwa. Pwal och, lapólóón ach afalafal, pwal lapólóón lipwákéchúch. Pokiten sia lipwákéchúló, a wor ach lúkúlúk me a kúkkúnúló ach niwokkus. Epwe suuk ngenikich watteen fansoun le afalafal me poputááni káéén Paipel. Meinisin ekkeei mettóch ra alapaaló apwapwaan ewe angangen afalafal.
3. Pwata ekkeei maram March me April ra ákkáeúin múrinné le auxiliary pioneer?
3 A ákkáeúin múrinné sipwe auxiliary pioneer fán March me April pokiten sia tongeni filatá eú me lein ekkewe awa mi mumutá ren 30 are 50 awa. Pwal eú, poputá seni Ammól, March 22, sópwósópwóló tori ewe Áchechchem lón Sárinfál, April 14, sipwe fiti ewe angang mi apwapwa, angangen etiwa aramas pwe repwe fiti ewe Áchechchem. Mwichefel meinisin repwe fókkun meseik pokiten chómmóng repwe akkangang “fän tipeeu” le áwesi ekkewe leenien afalafal úkúkún ar tufich lón fansoun mi chék kaúkúló.—Sef. 3:9.
4. Ika sia mochen auxiliary pioneer, met a lamot sipwe féri?
4 Ammólnatá Iei: Ika kesaamwo féri ei, awora fansoun le nengenisefáli óm we schedule me ppii met ka tongeni siwili pwe kopwe alapaaló óm angangen afalafal lón eú maram are lap seni. Ióteki ei mettóch. (Jas. 1:5) Fós ngeni chón óm famili me ekkewe ekkóch lón ewe mwichefel usun ei mettóch. (SalF. 15:22) Eli kopwe kúna pwe inaamwo ika ka weires ren apwangapwangen inis are angang iteitan nge ka pwal tongeni kúna pwapwa seni óm fiti auxiliary pioneer.
5. Ika sia alapaaló ach fiti ewe angangen afalafal fansoun Áchechchem, iwe, met mwirilóón?
5 Jiowa a mochen pwe néún kewe chón angang repwe pwapwa. (Kölf. 32:11) Ren ach pwisin éttúres le alapaaló ach angangen afalafal fansoun Áchechchem, sap minne epwe chék lapóló ach pwapwa nge Semach we lón láng a pwal pwapwa.—SalF. 23:24; 27:11.