Néúnéú ewe Puk “Kákkáé Met A Nóm lón án Kot Kapas” le Poputááni Eú Pwóróusfengen
1. Ifa ewe mineféén minen álillis fán iten angangen afalafal a katowu?
1 Ewe Mwichen Soupwúngúpwúng a atowu eú kúkkún puk lón sókkópaten fósun fénúfan itelapan: “Kákkáé Met A Nóm lón án Kot Kapas.” Ifa usun sipwe tongeni néúnéú ena mineféén puk atun sia ammólnatá fán iten ach angangen afalafal? Epwe fókkun álilliséch ena puk le poputááni pwóróusfengen pún napanapan a usun napanapen ewe Reasoning puk, a wor fitu wokisin seni Paipel mi nóm fán eú me eú itelap.
2. Ifa usun sia tongeni néúnéú lón ewe angangen afalafal ewe puk “Kákkáé Met A Nóm lón án Kot Kapas”?
2 Eli kopwe áeá ewe kapas eis 8 me erá: “Aua kan chuchchuuri aramas pún chómmóng ra kan ekieki, ‘Itá tipisin Kot án aramas riáfféú?’ [Lón ekkóch territory, epwe kon álilliséch ika sia áiti ngeni ewe chón imw ewe kapas eis.] Met meefiom? [Mut ngeni an epwe pélúweni.] Ewe Paipel a pélúwenéchú ena kapas eis.” Álleani seni lón Paipel eú are lap seni ekkewe wokisin mi fen mak lón me pwóróus wóón. Ika ewe chón imw a pwári an mochen aúseling, ka tongeni áiti ngeni ekkewe 20 kapas eis mi makketiw lepoputáán me eisini menni leir a mochen oupwe pwóróusfengen wóón lón nan. Are kopwe tongeni anéúnéú eú me lein ekkewe puk sia kan nénnéúnéú fán iten káé nge mi chómmóng pwóróus lón mi weneiti met oua fen pwóróusfengen wóón.
3. Ifa usun sia tongeni néúnéú ewe puk “Kákkáé Met A Nóm lón án Kot Kapas” le poputááni eú pwóróusfengen lón ekkewe territory ia aramasen lón ra fiti eú lamalam rese lúkú Jesus?
3 Ekkewe kapas eis 4 me 13 ngeni 17 repwe fókkun álilliséch atun sia afalafal ia ekkewe aramas ra fiti eú lamalam rese lúkú Jesus. Áwewe chék, neman ka tongeni áeá ewe pwóróus mi nóm lón kapas eis 17 me apasa: “Aua kan chuuri ekkewe aramas pwe aupwe álisi ekkewe famili. Ka tipeeú ngeni pwe ekkewe famili ikenái a tottoriir chómmóng osukosuk? [Mut ngeni an epwe pélúweni.] Chómmóng pwúpwúlú ra kúna pwe a álilliséch ekkeei kapas mi pwáraatá tipachem: ‘Ämi fefin meinisin oupwe meniniti pwülüemi.’ [Ese pwal lamot óm kopwe apasa pwe ena a mak lón Efisos 5:33. Ika ka fós ngeni emén fefin, neman epwe fen éch ika kopwe apasawu alon Efisos 5:28.] Óm ekiek pwe ach apwénúetá ena kapasen fén epwe álilliséch ngeni ririin pwúpwúlú?”
4. Met ka tongeni féri lemuchúlóón ámi pwóróusfengen me emén a fiti eú lamalam ese lúkú Jesus?
4 Lemuchúlóón ámi pwóróusfengen, akkóta pwe oupwap sópweló lón pwal eú rán. Neman ka tongeni akkóta pwe oupwe pwóróus wóón eú me lein ekkewe wokisin seni ewe kapas eis ka fen eisini. Lón fansoun mi fich, ereni ewe chón imw pwe ewe kapas mi pwáraatá tipachem ka ereni a feito seni ewe Paipel. Anéúnéú ngeni eú puk ka ekieki pwe epwe sani alóngólóng wóón ámi pwóróusfengen me ekiekin usun Paipel.—Ppii ewe insert lón Ach Angangen Afalafala ewe Mwú minen December 2013.