Káé Seni Ekkewe Chón Afalafal mi Lipwákéch
Sia fókkun aúcheani ekkewe chón afalafal mi lipwákéch lón ewe mwichefel. Ekkóch me leir ra fen angang ngeni Jiowa fán tuppwél lón chómmóng ier nge ekkóch neman ra kerán fitu ierin ar angang ngeni Jiowa nge ra pwal lipwákéch. Ekkeei chón afalafal ra kúna ifa usun Jesus a emmweni ewe mwichefelin Chón Kraist lón ekkeei ránin lesópwólóón ren an alapaaló ewe angangen afalafal me angangen álisi aramas le wiliti Chón Kraist. (Mat. 28:19, 20) Lón ar fiffiti ewe angangen afalafal ra angei ewe “tufich mi somwola” atun ra pwisin kúna weires me riáfféú. (2 Kor. 4:7) A wor chómmóng mettóch sipwe tongeni káé seniir. Ika sia awora ngeniir fansoun, ra pwapwa le asukula ekkewe ekkóch met ra silei. (Kölf. 71:18) Ina popun sipwe kútta alen ach sipwe káé seniir. Ifa usun sipwe tongeni féri ena?
Atun Angangen Afalafal. Mi lamot ngeni ekkewe minefé chón afalafal are chókkewe resaamwo angangéch an epwe wor káit ngeniir pwe repwe lipwákéch. Eú mettóch a tongeni álisiir ina ar kakkatol napanapen án ekkewe mi ásimaw angangen afalafal. (Ppii ewe Leenien Mas minen February 1, 2015, lón ewe lesen “Akkamwéchú Óm Tinikken lón ewe Angangen Afalafal,” fán ewe itelap kisikis “Álisi Ekkewe Minefé” nge aúlúngátin parakraf.) Ifa usun ka kúna álillis seni ámi mwin me ekkewe mi lipwákéch le afalafal?
Pwata kese etiwa emén chón afalafal mi lipwákéch pwe oupwe mwin le afalafal? Nge ika i emén mi samau are apwangapwang, neman fán ekkóch kopwe káé ngeni noum we chón káé lón imwan. Mwirin ewe káé, eisini ika mi wor mettóch are emmwen a tongeni apasa.
Awora Óm Fansoun Ngeniir: Kopwe awora fansoun ngeni ekkewe chón afalafal mi lipwákéch. Etiwa emén me leir an epwe fitikemi lón ámi famili fel me eisini ekkóch kapas eis. Ika mi samau are apwangapwang neman epwe wor kókkót pwe ewe famili fel epwe fis lón imwan pwe epwe pwapwaiti. Eisini ifa usun a silei ewe enlet. Met sókkun feiéch a kúna? Ifa ewe sókkun feffeitá lón ewe angangen afalafal a kúna? Met sókkun pwapwa a kúna lón an angang ngeni Jiowa?
Kopwe mirit me itepék me rúúepek ren ewe álillis ka mochen kútta seniir. Ekkewe mi likiitú lón langattam fansoun ra sókkofesen lón ar tufichéch lón ewe angangen afalafal usun chék kich meinisin. (Rom 12:6-8) Ekkóch me leir ra chinnap iwe neman epwe aúkúk ewe fansoun repwe tongeni nóm rech. Iwe nge sia tongeni káé seniir chómmóng mettóch lón ar manaweni manawen Chón Kraist fán tuppwél.