Pwúng me Mwáál: Eú Kapas Eis Kich Meinisin Sia Kan Eáni

Iká ka mochen ló ngeni eú leeni kesaamwo piin ló ie, met kopwe féri?

1. 1. Fiti chék ewe al ka ekieki pwe mi pwúng.

2. 2. Tapweló mwirin ekkóch aramas, pún neman ra silei ewe al.

3. 3. Fiti eú emmwen mi alúkúlúk, áwewe chék ren eú GPS, eché map, are emén chienom ka lúkúlúkú pwe mi silei ewe al.

Iká sia fili nampa eú are nampa ruu, iwe sipwe ló ngeni eú leeni nge neman esap ikewe sia wesewesen mochen ló ie. Iwe nge, iká sipwe fili nampa úlúngát, sia tongeni lúkúlúk pwe sipwe tikeri ikewe sia wesewesen mochen ló ie.

Manawach aramas a ussun chék seresin eú sái, ewe sia ápilúkúlúkú pwe epwe emmwenikich ngeni eú manaw mi pwapwa lón mwachkkan. Ikáámwo sipwe tikeri ikena are sisap, epwe chék alóngólóng wóón ia sia kútta emmwen me ie atun sia féri kefil.

Ikáámwo chómmóng ach kewe kefil resap kkúú nónnómun manawach ren fansoun langattam, nge ekkóch leir ra fókkun aúchea. Ekkena kefil mi fókkun aúchea ra pwáári met ach ekiek wóón minne mi pwúng me mwáál. Pokiten ekkena esin kefil, kich me chókkewe sia tongeer sia tongeni kúna feiéch are feiengaw ren fansoun langattam. A kapachelong lón ekkena kefil ekkeei esin mettóch:

• Lisowu me pwúpwúlú

• Wenechar, angang, me moni

• Túmúnún semirit

• Féfférúch ngeni aramas

Ifa ussun kopwe silei iká óm kewe kefil repwe atoto ngonuk me óm famili eú manaw mi pwapwa lón mwachkkan?

Iei ewe kapas eis emén me emén kich sia kan eáni: Met sókkun emmwen úpwe fiti wóón met mi pwúng me met mi mwáál?

Ei puk epwe áweweei pwata sia tongeni lúkúlúk wóón án ewe Paipel emmwen wóón met mi pwúng me mwáál, me ifa ussun a tongeni álisikich.