Pwúng me Mwáál: Ewe Paipel eú Puken Emmwen mi Alúkúlúk

Sisap silei iká epwe tongeni sópwéch ach kefil wóón minne mi pwúng me mwáál iká pwe sia alónga wóón pwisin meefiach are meefien ekkewe ekkóch. Ewe Paipel a affata pwata. Nge me lúkún ena, a pwal masou ren emmwen mi alúkúlúk ussun met mi pwúng me mwáál, ina ewe mettóch mi tongeni atoto enletin pwapwa me menemenéch.

A LAMOT NGENIKICH ÁN KOT EMMWEN

Lón ewe Paipel, Jiowaa Kot a affata pwe a lamot ngeni aramas ar repwe kútta álillis seni me resap pwisin emmweni manawer. (Jeremaia 10:23) Ina popun, a awora emmwen lón Paipel ussun minne mi pwúng me mwáál. A tongekich aramas me ese mochen ach sipwe eáni kefil mi ngaw epwe ámetekikich me áweiresi manawach. (Tuteronomi 5:29; 1 Jon 4:8) Pwal och, pokiten i ewe Chón Férikich, a nóm ren ewe tipáchem me sile mi tongeni áiti ngenikich emmwen mi fókkun múrinné. (Kölfel 100:3; 104:24) Iwe nge, i ese fókkun echchimwa aramas ar repwe fiti an kewe allúk.

Jiowa a ngeni ekkewe áeménún mwán me fefin, Atam me If, mettóch meinisin mi lamot ngeniir pwe repwe enletin pwapwa. (Keneses 1:28, 29; 2:8, 15) A pwal ngeniir emmwen mi chék mecheres ar repwe álleasochisi. Iwe nge, a mut ngeniir ar repwe pwisin filaatá iká repwe álleasochisi are resap. (Keneses 2:9, 16, 17) A eletipengaw pwe Atam me If ra filaatá ar repwe pwisin fiti met mi pwúng me rer lap seni ar fiti án Kot allúk. (Keneses 3:6) Met mwirilóón ar féri ena? Án aramas filaatá met mi pwúng me mwáál, a kan emmwen ngeniir pwapwa? Aapw. Seni lóóm tori iei, sia fen kúna pwe án aramas tunaaló án Kot allúk ese atoto enletin kinamwe me pwapwa.—Än Salomon Afalafal 8:9.

Ewe Paipel a awora emmwen mi lamot ngenikich pwe sipwe féri kefil mi múrinné mi tongeni álisikich ese lifilifil iká kich ié are ia sia nónnóm ie. (2 Timoty 3:16, 17; ppii ewe pwóór itelapan “Eú Puk fán Iten Aramas Meinisin.”) Ppii ifa ussun ewe Paipel a féri ena.

Ppii pwal ekkóch pwóróus mi affata pwata a pwúng án ewe Paipel iteni “kapasen Kot.”—1 Tesalonika 2:13. Katol ei video Ewe Paipel A Pop Seni Ia? wóón jw.org/chk.

POPUN ÁN EKKÓCH RESE LÚKÚLÚK WÓÓN PAIPEL

Ekkóch aramas ra ekieki pwe ewe Paipel ese tongeni awora emmwen mi múrinné. Ikkeei met ekkóch ra apasa.

Minne ra apasa: “A ú fengen met mi mak lón Paipel.”

Iei met mi enlet: Me akkomwan, neman kopwe kúna pwe ekkóch kinikin lón ewe Paipel ussun nge rese tipeeúfengen me pwal ekkóch kinikinin lón. Nge iká kopwe káé tichikin pwóróusen masouer, pwóróusen uruwoon aramas lóóm, pwóróusen ekkewe chón makker, are pwal ekkóch mettóch, iwe kopwe kúna pwe ekkena wokisin rese ú fengen.

Ren óm kopwe kúna ekkóch pwóróus mi álilliséch, álleani ei lesen “Are There Contradictions in the Bible?” wóón jw.org.

Minne ra apasa: “Chókkewe mi erá pwe ra álleasochisi ewe Paipel, ra féri minne mi ngaw, ina popun neman esap ina eú minen emmwen mi múrinné.”

Iei met mi enlet: Sisap tipi ngeni ewe Paipel féfféringawen chókkewe rese apwénúetá masouen lón. A fen oesini pwe chómmóng aramas, kapachelong néúwisin lamalam, iir kewe mi erá pwe ra fiti met Paipel a apasa, repwe eáni féffér mi ú ngeni ewe Paipel. A pwal erá pwe “aramas repwe esiita” minne Paipel a eáni káit pokiten ekkena sókkun aramas.—2 Piter 2:1, 2.

Ren óm kopwe kúna ekkewe pwóróus ussun án néúwisin lamalam tunaaló met ewe Paipel a eáni káit, álleani ei lesen “Is Religion Just Another Big Business?” wóón jw.org.

Minne ra apasa: “Paipel a apéchékkúla ekiekin lifilifil aramas.”

Iei met mi enlet: Paipel a pesei ngenikich ach sipwe súféliti aramas. Ese etiwa ekkeei esin féffér:

Ach átekiakichetá seni ekkewe ekkóch.—Filipai 2:3.
Ach ésúfélúngawa chókkewe mi sókkóló ar ekiek are lúkú.—1 Piter 2:17.
Ach echchimwa emén an epwe fiti ach ekiek.—Mattu 10:14.

Ewe Paipel a pwáári pwe Kot a kirekiréch me mosonottam ngeni aramas fansoun meinisin me a mochen ach sipwe pwal ina ussun.—Rom 9:14.

Ren pwal ekkóch pwóróus, álleani ei lesen “Tolerance—How the Bible Can Help” wóón jw.org.

PAIPEL A AFFATA ÁN KOT EMMWEN NGENIKICH

Ewe Paipel a áiti ngenikich ewe riri lefilen Kot me aramas seni me lepoputáán. Minne a mak lón, a álisikich le silei met án Kot ekiek ussun met mi pwúng me mwáál, me met epwe efeiéchúkich me efeiengawakich. (Kölfel 19:7, 11) A chómmóng kapasen emmwen sia káé seni mi tongeni álisikich le féri kefil mi múrinné lón manawach iteiten rán.

Áwewe chék, ppii ei kapasen fén lón Än Salomon Fos 13:20: “Eman mi chiechi ngeni aramas mi tipachem epwe tipachemela, nge eman mi chiechi ngeni ekewe chon tiparoch epwe feiengau.” Ena kapasen emmwen a men álilliséch ngenikich lón ei fansoun, ussun chék álilliséchún ngeni ekkewe aramas lóóm. Lón ewe Paipel, a wor chómmóng ekkena esin kapasen emmwen mi álilliséch me aúchea.—Ppii ewe pwóór “A Chúen Álilliséch án Paipel Emmwen.”

Nge eli kopwe ekieki, ‘Pwata úa tongeni lúkúlúk pwe án Paipel kapasen emmwen ussun met mi pwúng me mwáál a tongeni álisiei?’ Ewe lesen mwirin ei epwe fós ussun pwóróusen ekkóch aramas.

a Jiowa ina iten Kot we. (Kölfel 83:18) Ewe kapasen lepoputáán lón ewe Paipel are Testamentin Lom me Testament Söfö, a apasa pwe “lon ewe Testamentin Lom sia nöünöü . . . ‘Samol mi Lapalap’ fän iten Jiowa ika Yahwe.”

A CHÚEN ÁLILLISÉCH ÁN PAIPEL EMMWEN

Inaamwo iká a wes makken ewe Paipel 2,000 ier a ló, nge a chúen álilliséch tori ach ei fansoun. Seni lóóm tori ikenái, aramas ra mochen pwapwa me eáni manaw mi múrinné. (Än Salomon Afalafal 1:9) Ekkewe kapasen emmwen mi álilliséch lón Paipel, ra tongeni álisikich le eáni ena esin manaw.

Wenechar

“Áúa mochen wenechar lón mettóch meinisin.”—Ipru 13:18.
“Emén mi sossolá esap chúen solá, nge epwe fen angang weires.”—Efisus 4:28.

Riri Ngeni Aramas

“Emén me emén epwe sópweeló le kúkkútta esap pwisin feiéchún, nge feiéchún ekkewe ekkóch.”—1 Korint 10:24.
“Oupwe sópweeló le engilófengen lefilemi me unusen omusaaló tipisin emén me emén.”—Kolose 3:13.

Eáni Kefil

“Eman mi wewemang a lükü mettoch meinisin, nge eman mi mirit a nenengeni ia epwe feila ie.”—Än Salomon Fos 14:15.
“Eman aramas mi mirit a küna ewe feiengau mi feito o opola, nge ekewe chon wewemang ra chök feilong lon o feiengau.”—Än Salomon Fos 22:3.