Met Epwe Álisikich le Eáni eú Manaw mi Núkúnúkéch lón Mwachkkan?

Usun met sia fen pwóróus usun lón ekkewe lesen mwen ei, aramas ra achocho le kútta eú manaw mi núkúnúkéch lón fansoun mwer ren ar lúkúlúk wóón ekkeei mettóch, áwewe chék ren ewe lúkú pwe manawach a fen kkótóló seni me lóóm, sukul, wéú, me ar achocho le manawéch. Iwe nge ar lúkúlúk wóón ekkena mettóch, a usun ar néúnéú eú map ese pwúng ren ar repwe tikeri ikewe ra mochen ló ie. A itá wewe ngeni pwe ese wor emmwen mi alúkúlúk fán iten mwachkkan? Ewer mi wor!

EMMWEN SENI EWE SOUEMMWEN MI LAPALAP SENI MEINISIN

Lape ngeni atun sia féri kefil, sia kan kútta emmwen seni emén mi watte senikich me silelap lap senikich. A pwal ina usun, sia tongeni kúna emmwen mi alúkúlúk fán iten mwachkkan seni ewe Emén mi fókkun watte senikich me silelap lap senikich. Sia tongeni álleani an kapasen emmwen seni ewe Paipel, ewe puk mi fen makketiw ina epwe 3,500 ier a ló.

Pwata sia tongeni lúkúlúk wóón ewe Paipel? Pokiten a feito seni ewe Emén mi watte lap seni meinisin me tipachem lap seni meinisin lón unuselapen láng me fénúfan. Ewe Paipel a áweweei pwe “Kot ewe mi nom seni me lomlom” me “seni fansoun esepop tori fansoun esemüch.” (Taniel 7:9; Kölfel 90:2) “A föri läng, i ewe Kot a pwal föri fanüfan.” (Aisea 45:18) A erenikich pwe itan, Jiowa.​—Kölfel 83:18.a

Ewe Paipel ese erá pwe eú eéreni are fénú a múrinné lap seni ekkewe ekkóch pokiten ena puk a feito seni ewe emén mi fératá aramas meinisin. An kewe kapasen emmwen ra álilliséch fansoun meinisin me ra álisi aramasen fénú meinisin. A kawor lón chómmóng fós me a chéú einetin lap seni puk meinisin.b Weween pwe aramas ekis meinisin ra tongeni álleani me kútta emmwen seni. Ena mettóch a tipeeú ngeni pwisin alon Paipel ei:

“Kot esap lifilifil aramas, nge a etiwa aramas mi niuokusiti i o föri mine a pwüng seni ekewe mwü meinisin.”​—FÖFÖR 10:34, 35.

Jiowa Kot a usun emén sam are in mi tong mi awora emmwen fán iten néún kewe. A awora ngenikich emmwen ren an we Kapas ewe Paipel. (2 Timoty 3:16) Ka tongeni lúkúlúk wóón an we Kapas pokiten i a férikichetá me a silei met epwe atoto ach pwapwa.

Met a lamot kopwe féri pwe kopwe eáni ena esin manaw lón mwachkkan? Sipwe ppii en lesen mwirin ei.