Minne Sipwe Féri pwe Epwe Lapóló Ach Pwapwa lón ewe Angangen Afalafal

1. Met meefien ekkóch ussun ar fós ngeni aramas lón ewe angangen afalafal? (Pwal ppii ewe sasing.)

POKITEN kich néún Jiowa aramas, sia afalafal ngeni aramas pokiten sia tongei Semach na lón láng me sia mochen álisiir le silei i. Chómmóng chón afalafal ra fókkun sani ewe angangen afalafal. Nge a weires ngeni ekkóch ar repwe pwapwaiti ena angang. Pwata? Eli ekkóch ra fókkun sáw me ra meefi pwe esap iir sense mi lipwákéch. Ekkóch rese meefi kinamwe le ló ren imwen aramas nge rese ketiw me rer. Eli ekkóch ra niwokkus iká chón ewe imw repwe song ngeniir. Ekkóch ra fen káé ar resap asonga ekkewe ekkóch. Inaamwo iká chienach kena Chón Kraist ra fókkun tongei Jiowa, nge a chúen weires ngeniir ar repwe fós ngeni aramas rese sissileer ussun ewe kapas allim. Nge ra esilla aúchean ena angang, me ra afalafal iteitan. A ifa me pwapwaan Jiowa!

2. Iká ka meefi pwe a weires ngonuk óm kopwe pwapwaiti ewe angangen afalafal, pwata a lamot óm kosap meefi lichippúng?

² Fán ekkóch ka meefi pwe a weires óm kopwe pwapwaiti ewe angangen afalafal ren ekkena esin memmeef? Iká ewer, kosap lichippúng. Óm meefi pwe esap en emén sense mi lipwákéch, eli a pwáári pwe ka tipetekison me kese mochen aramas repwe kon ingeituk. A pwal pwáári pwe kese mochen ánini ngeni aramas. Me ese wor a sani an esap ketiw me ren aramas, ákkáeúin atun a achocho le féri met mi múrinné fán iter. Semach we lón láng a fókkun silei ekkewe weires ka kúna me a mochen fang ngonuk ewe álillis mi lamot. (Ais. 41:13) Sipwe káé lón ei lesen nimu kapasen emmwen ren ifa ussun sipwe fiu ngeni ekkena esin memmeef me ifa ussun sipwe alapaaló ach pwapwa lón ewe angangen afalafal.

MUT NGENI ÁN KOT WE KAPAS EPWE APÉCHÉKKÚLOK

3. Met a álisi ewe soufós Jeremaia le afalafala ekkewe ekkóch?

³ Pwal mwo nge néún Jiowa kewe chón angang me lóóm ra péchékkúletá ren án Kot kapas atun a wor wiser mi weires ar repwe apwénúetá. Áwewe chék ren ewe soufós Jeremaia. A pireir atun Jiowa a ewisa ngeni an epwe afalafal. Jeremaia a erá: “Üsap sile fos, pun ngang eman mi chök ier kükün.” (Jer. 1:6) Met a álisi pwe epwe pwora le afalafal? A péchékkúletá seni met Kot a ereni. A erá: “A usun chök ekkei mi kü me lon lelukei, a pwourur me lechüi. Üa resin apwosalong.” (Jer. 20:​8, 9) Inaamwo iká a weires án Jeremaia we leenien afalafal, nge ena pwóróus Jiowa a ewisa ngeni an epwe esilei a awora ngeni ewe péchékkúl mi lamot ngeni ren an epwe féri ena angang.

4. Met a fis atun sia álleani án Kot we Kapas me ekilonei? (Kolose 1:​9, 10)

⁴ Chón Kraist ra angei ewe péchékkúl mi lamot ngeniir seni masouen án Kot we Kapas. Atun aposel Paul a mak ngeni chón ewe mwichefel lón Kolose, a apasa pwe ar akkangei ewe sile mi enlet epwe amwékútúúr ar ‘repwe tongeni manaweni ewe manaw mi fich ngeni iten Jiowa’ lón ar sópweeló le “ukkuwa lón iteiten angang múrinné meinisin.” (Álleani Kolose 1:​9, 10.) Ewe angangen afalafala ewe kapas allim, a kapachelong lón ewe angang mi múrinné. Iwe, atun sia álleani án Kot we Kapas me ekilonei, epwe péchékkúleló ach lúkú Jiowa me epwe lapóló ach weweiti aúchean popun ach afalafala pwóróusen ewe Mwú.

5. Ifa ussun sipwe unusen feiéch seni ach állea me káé Paipel?

⁵ Ren ach sipwe unusen feiéch seni án Kot Kapas, a lamot ach sisap atapwal lón ach állea, káé, me ekilon. Kosap atapwalapwal. Iká ka seretá wóón eú wokisin mi weires óm kopwe weweiti, kosap luchang seni, nge kopwe fen néúnéú ewe Watch Tower Publications Index are ewe Research Guide for Jehovah’s Witnesses le kútta áweween ena wokisin. Iká kese atapwal lón óm káé, epwe lapóló óm lúkúlúk pwe a enlet met ewe Paipel a apasa. (1 Tes. 5:21) Lapólóón óm lúkú, epwe pwal ina lapólóón óm pwapwa le ereni aramas met ka káé.

MMÓLNÉCHÚTÁ FÁN ITEN EWE ANGANGEN AFALAFAL

6. Pwata a lamot ach sipwe mmólnéchútá fán iten ewe angangen afalafal?

⁶ Iká ka mmólnéchútá fán iten ewe angangen afalafal, eli kopwe meefi kinamwe le fós ngeni aramas. Jises a álisi néún kewe chón káé le mmólnetá me mwen an tiiniireló pwe repwe afalafal. (Luk 10:​1-11) Pokiten ekkena chón káé ra apwénúetá met Jises a áiti ngeniir, iwe ra tufichin féri chómmóng mettóch mi múrinné, me ena mettóch a efisi ar repwe fókkun pwapwa.—Luk 10:17.

7. Ifa ussun sia tongeni mmólnetá fán iten ewe angangen afalafal? (Pwal ppii ewe sasing.)

⁷ Ifa ussun sia tongeni mmólnetá fán iten ewe angangen afalafal? A lamot ach sipwe ekieki met sia mochen apasa, iwe mwirin apasa lón kapas mi itiitiéch, me apasa lón pwisin napanapen ach fós. A pwal álilliséch ach sipwe anchangei ruu iká úlúngát mettóch eli aramas repwe erenikich, me ekieki ifa ussun sipwe pélúweni. Iwe atun sia fós ngeniir, sipwe chék fós ngeniir fán kinamwe, emelimel ngeniir, me chiechiéch ngeniir.

8. Ifa ussun ekkewe Chón Kraist ra ussun ewe sepi mi ffér seni pwúl lón án Paul we kapas áwewe?

⁸ Ewe aposel Paul a áweweei wisach we le afalafal atun a erá: “A nóm rem ei wéú lón sepi mi ffér seni pwúl.” (2 Kor. 4:7) Ifa ena wéú? Ina ewe angangen afalafala pwóróusen ewe Mwú, ewe a tongeni amanawa aramas. (2 Kor. 4:1) Met ewe sepi mi ffér seni pwúl a liosuetá? A liosuetá néún Kot kewe chón angang, chókkewe mi atoura ngeni aramas ewe kapas allim. Lón fansoun Paul we, ekkewe chón amémé ra kan áeá ekkewe sepi mi ffér seni pwúl le uwei ekkewe mettóch mi aúchea, áwewe chék ren mwéngé, wain, me moni. Pwal ina chék ussun, Jiowa a lúkúngenikich ewe pwóróus mi aúchea ussun ewe Mwú. Ren an álillis, sia tongeni angei ewe péchékkúl mi lamot pwe sipwe atoura ena pwóróus fán túppwél.

IÓTEK FÁN ITEN PWORA

9. Ifa ussun sia tongeni okkufu ach niwokkusiti aramas are ach niwokkus iká sise ketiw me rer? (Pwal ppii ewe sasing.)

⁹ Fán ekkóch, a tongeni fis ach sipwe meefi ach niwokkusiti aramas are iká sise ketiw me rer. Ifa ussun sia tongeni ú ngeni ena esin weires? Ekieki ussun án ekkewe aposel iótek atun a allúk ar resap afalafal. Rese niwokkus me úkútiw le afalafal, nge ra fen tingorei Jiowa an epwe álisiir ‘ar repwe unusen pwora le apasa an kapas.’ Mwittir chék, Jiowa a pélúweni ar iótek. (Féf. 4:​18, 29, 31) Iká ach niwokkusiti aramas a áweiresikich fán ekkóch, sia pwal tongeni ióteki án Jiowa álillis. Tingorei an epwe álisuk le alapaaló óm tongei aramas pwe kosap niwokkus le ereniir ussun ewe kapas allim.

10. Ifa ussun Jiowa a álisikich ach sipwe néún Chón Pwáraatá? (Aisea 43:​10-12)

¹⁰ Jiowa a ewisa ngenikich ach sipwe néún Chón Pwáraatá, me a pwonei pwe epwe álisikich pwe sipwe pwora. (Álleani Aisea 43:​10-12.) Áwewe chék, ikeei rúáánú me lein an féri ena. Áeúin, Jises a nóm rech ekis meinisin ese lifilifil ineet sia afalafala ewe kapas allim. (Mat. 28:​18-20) Oruuan, Jiowa a ewisa ngeni ekkewe chónláng ar repwe álisikich. (Pwár. 14:6) Aúlúngátin, Jiowa a fang ngenikich an we ngún mi fel pwe epwe álisikich le chemeni ekkewe mettóch sia fen káé. (Jon 14:​25, 26) Arúáánúún, Jiowa a awora ngenikich chienach kewe Chón Kraist ar repwe fiffitikich. Ren án Jiowa álillis, me ren álillisin chienach kewe Chón Kraist, a wor rech meinisin met mi lamot ngenikich pwe sipwe sópwéch.

SIWILI ÓM KÓKKÓT ME EÁNI EKIEK MI PWÚNG

11. Ifa ussun ka tongeni kúna chómmóng aramas lón ewe angangen afalafal? (Pwal ppii ewe sasing.)

¹¹ Ka kan meefi lichippúng atun kese kon kúna chómmóng aramas lón ewe angangen afalafal? Pwisin eisinuk: ‘Ikkefa iir iei ekkewe aramas lón ái leenien afalafal?’ (Féf. 16:13) ‘Ra ló angang are ra ló shopping?’ Iká ina, iwe eli kopwe tongeni kúnékún aramas ren óm afalafal wóón al. Iei alon emén Chón Kraist mwán itan Joshua, “A kan suuk ngeniei alen ái úpwe afalafal atun úa fetál lón ekkewe leenien shopping me lón ekkewe leeni mi chómmóng aramas ie.” Iir me pwúlúwan we, Bridget, ra pwal kúna pwe a wor aramas lón imwer kewe atun ra ló afalafal lekuniol me pwal mwirin leolowasen Ráninfel.—Efi. 5:​15, 16.

12. Ifa ussun sia tongeni silei met aramas ra eáni lúkú are met ra kan ekieki?

¹² Iká aramas rese kon sani ewe pwóróus sia uwei, sótun ppii iká met ra eáni lúkú are met ra kan ekieki. Joshua me Bridget ra néúnéú ewe kapas eis mi nóm wóón péén eché tract lón ar poputááni ar fós ngeni emén. Áwewe chék, atun ra néúnéú ewe tract Met Óm Ekiek Usun ewe Paipel? ra erá: “Ekkóch aramas ra ekieki pwe ewe Paipel ina eú puk seni Kot, nge ekkóch rese kon pwal ekieki ena. Nge en, met meefiom?” Lape ngeni ar féri ena, a emmwen ngeni ar pwóróusfengen.

13. Pwata sia tongeni erá pwe sia sópwéch lón ach angangen afalafal inaamwo iká aramas rese mochen aúseling? (Än Salomon Fos 27:11)

¹³ Inaamwo iká aramas rese aúseling ngeni ach afalafal, nge sia chúen apwénúetá met ewe sia achocho ngeni. Ifa? Pokiten sia féri met Jiowa me Néún we ra mochen ach sipwe féri, iwe sia féri wisach wisen chón pwáraatá. (Féf. 10:42) Inaamwo iká ese wor ié sia fós ngeni lón ewe angangen afalafal, are aramas rese mochen aúseling, nge sia tongeni chúen pwapwa pwe sia silei pwe sia apwapwaai Semach we lón láng.—Álleani Än Salomon Fos 27:11.

14. Pwata sia tongeni pwapwa atun emén chón afalafal a kúna emén lón ach we leenien afalafal mi mochen káé?

¹⁴ Sia pwal tongeni pwapwa atun emén chón afalafal a kúna emén lón ach we leenien afalafal mi mochen káé. Ewe Leenien Mas a aléllééi ach ei angang ngeni eú angangen kútta emén semirit mi mworukoló. Chómmóng ra álillis lón ena angangen kút, me ra kútta lón iteiten leeni meinisin. Atun ena semirit a pwá, meinisin ra pwapwa, nge esap chék ewe emén a wisen kúna. Pwal ina ussun, meinisin lón ewe mwichefel ra álillis lón ewe angangen álisi aramas le wiliiti néún Jises chón káé. A lamot án meinisin álillis le afalafal ngeni meinisin lón ewe leenien afalafal, me kich meinisin sia pwapwa atun emén a poputá le fiti ekkewe mwiich.

NEFÓTÓFÓT WÓÓN ÓM TONGEI JIOWA ME ARAMAS

15. Ifa ussun ach apwénúetá Mattu 22:​37-39 a tongeni álisikich le alapaaló ach pwapwa lón ewe angangen afalafal? (Pwal ppii ewe sasing wóón péén.)

¹⁵ Sia tongeni alapaaló ach pwapwaiti ewe angangen afalafal iká sia nefótófót wóón ach tongei Jiowa me aramas. (Álleani Mattu 22:​37-39.) Anchangei úkúúkún pwapwaan Jiowa atun a kúna ach fiti ewe angangen afalafal me pwapwaan aramas atun ra poputá le káé ewe Paipel! Pwal chemeni pwe chókkewe mi aúseling ngeni ewe pwóróus sia uwei me filaatá le angang ngeni Jiowa, ra tongeni manaw tori feilfeiló.—Jon 6:40; 1 Tim. 4:16.

16. Ifa ussun sia tongeni kúna pwapwa lón ach angang ngeni Jiowa atun sia chék nómólong lón imwach? Apwóróusa ekkewe pwóróus.

¹⁶ Ka chék nónnóm lón imw ren och popun? Iká ewer, nefótófót wóón met ka tongeni féri le pwáári óm tongei Jiowa me aramas. Atun ewe COVID-19 pandemic, Samuel me Dania ra chék nómólong lón imwer we. Lón unusen ena atun mi áweires, ra kan soun afalafal wóón phone, mak taropwe, me káé ngeni aramas wóón Zoom. Samuel a afalafal ngeni chókkewe a kúner lón ewe clinic a kan sáfei ie ren an we kanser. A erá: “Atun sia nóm lón weires, sia kan pekkus lón pekin ekiek, inis, me ngún. A lamot sipwe kútta ifa ussun sipwe pwapwa lón ach angang ngeni Jiowa.” Lepwolen an fiffis ekkena, Dania a fen pwal turuló me mwenilong lón imw ren úkúúkún úlúngát maram. Iwe a chék wawa wheelchair ren úkúúkún wonu maram. A apasa: “Úa achocho le féri meinisin met úa tufichin féri inaamwo iká a ina nónnómui. Úa tongeni afalafal ngeni ewe kangof a kan etto rei, me úa fós ngeni chókkewe ra kan uwouto mettóch ren imwem we. A pwal múrinné ám pwóróusfengen wóón phone me emén fefin a kan angang lón eú pekin pioing.” Nónnómun Samuel me Dania a aúkúkú met ra tongeni féri, nge ra féri met ra tufichin féri me ra pwapwa ren ar féri ena.

17. Ifa ussun kopwe tongeni feiéch seni ekkewe kapasen emmwen lón ei lesen?

¹⁷ Achocho le apwénúetá meinisin ekkeei nimu kapasen emmwen lón ei lesen. Eú me eú ekkeei kapasen emmwen, ra ussun nofitin mwéngé lón eú resepi. Atun meinisin ekkewe nofit lón ewe resepi ra kochufengen, epwe anné ewe mwéngé. Ach apwénúetá meinisin ekkena kapasen emmwen, epwe elipwákéchúkich le likiitú ngeni ach kewe memmeef ese pwúng me álisikich le alapaaló ach pwapwa lón ewe angangen afalafal.