Tipetekison Atun A Wor Met Kese Weweiti

1. Ikkefa ekkewe tufich Jiowa a fang ngenikich, me pwata?

JIOWA a férikichetá me a fang ngenikich ewe tufichin ekiek, káé mineféén mettóch, me silei ifa ussun sipwe apwénúetá met sia káé. Pwata a férikichetá lón ena napanap? Pún a mochen ach sipwe feffeitá lón ach silei i, me angang ngeni ren unusen ekiekich.—SalF. 2:1-5; Rom 12:1.

2. (a) Met a lamot ach sipwe weweiti ussun pwisinkich? (Rom 11:33, 34) (Pwal ppii ewe sasing.) (b) Pwata a álilliséch ach mirititi pwe ese pwal lamot ach sipwe silei mettóch meinisin?

² Inaamwo iká a wor ach tufich le káé, nge a wor aúkúúkún met sia silei. (Álleani Rom 11:33, 34.) Áwewe chék ren pwóróusen Jop. Jiowa a eáni ngeni Jop chómmóng kapas eis mi pwáári pwe a chómmóng met Jop ese silei. Minne a fis, a efisi an epwe eáni tipetekison me áwena an ekiek. (Hiop 42:3-6) Sia pwal kúna feiéch atun sia tipetekison le mirititi pwe sise silei mettóch meinisin. Ena esin tipetekison a álisikich ach sipwe lúkúlúk pwe Jiowa epwe pwáári met mi wesewesen lamot ach sipwe silei pwe sipwe tongeni eáni kefil mi múrinné.—SalF. 2:6.

3. Met sipwele káé lón ei lesen?

³ Lón ei lesen, sipwe káé ekkóch mettóch sise silei, me pwata ach sise silei ekkena mettóch a áweiresi manawach fán ekkóch. Sipwe pwal káé pwata a múrinné ach sise silei ekkóch mettóch. Ach káé ekkena pwóróus epwe alapaaló ach lúkúlúk pwe Jiowa, “ewe mi unus lon an silelap,” epwe erenikich met mi wesewesen lamot ach sipwe silei.—Hiop 37:16.

SISE SILEI INEET EWE SÓPWÓLÓÓN EPWE WAR

4. Ifa eú mettóch sise silei me ren Mattu 24:36?

⁴ Álleani Mattu 24:36. Sise silei ineet epwe war sópwólóón ei ótót. Atun Jises a nóm wóón fénúfan, ese mwo nge pwal silei “ewe kulók are rán.”a Mwirin, a ereni néún kewe aposel pwe Jiowa, i ewe a wisen filaatá ineet epwe fis ekkóch mettóch. (Féf. 1:6, 7) Jiowa a wisen apwúngaló ineet ewe sópwólóón epwe war, nge kich sise tongeni silei ineet epwe wesewesen war.

5. Met sia tongeni meefi pokiten sise silei ineet ewe sópwólóón epwe waroto?

⁵ Sise silei epwe ifa ttamen ach sipwe pwal witiwit me mwen warotoon ewe sópwólóón. Ina minne, eli sipwe chipwangeló le witiwit are lichippúng, ákkáeúin iká a fen ttam ach witiwiti ránin Jiowa we. Are eli epwe weires ach sipwe likiitú ngeni án chón ach famili are án ekkewe ekkóch esiitakich. (2 Pit. 3:3, 4) Eli sipwe pwal ekieki pwe iká sia silei wesewesen ránin warotoon ewe sópwólóón, iwe epwe mecheres ach sipwe mosonottam me sipwe tongeni likiitú ngeni án ekkewe ekkóch esiitakich.

6. Pwata a múrinné ach sise silei ineet epwe war ewe sópwólóón?

⁶ Ren enletin, án Jiowa ese erenikich ineet ewe sópwólóón epwe waroto, a atufichi ach sipwe pwáári pwe sia angang ngeni pokiten sia tongei me lúkúlúk wóón. Sia mochen angang ngeni Jiowa tori feilfeiló, nge esap chék tori warotoon ewe sópwólóón. Ina popun, a éch ach sipwe nefótófót wóón ekkewe mettóch mi múrinné repwe fis mwirin “ránin Jiowa” we, lap seni ach nefótófót wóón ineet epwe waroto. Ach féri ena, epwe álisikich le ririéch ngeni Jiowa, lúkúlúk wóón, me achocho úkúúkún ach tufich le apwapwaai i.—2 Pit. 3:11, 12.

7. Met sia silei?

⁷ A lamot ach sipwe nefótófót wóón met sia silei. Sia silei pwe ewe ránin lesópwólóón a poputá lón ewe ier 1914. Ewe Paipel a awora ekkewe oesini mi ánneta pwe ewe ránin lesópwólóón a poputá lón ewe ier 1914. A pwal erenikich chómmóng pwóróus mi tichik ussun met epwe fis wóón ei fénúfan mwirin ena ier. Ina minne, sia lúkúlúk pwe “ränin ewe Samol mi Lapalap a arapoto.” (Sef 1:14) Sia pwal silei ewe angang Jiowa a mochen ach sipwe féri. A mochen ach sipwe esilei ewe “kapas allim ussun ewe Mwú” ngeni aramas úkúúkún ach tufich. (Mat. 24:14) Sia fen afalafala pwóróusen ena Mwú lón lap seni 240 fénú me lón lap seni 1,000 fósun fénúfan. Ese pwal lamot ach sipwe silei ewe “rán me kulók” ren ach sipwe afalafal fán tinikken.

SISE SILEI IFA USSUN JIOWA EPWE ÁLISIKICH

8. Met weween “än Kot angang”? (Än Salomon Afalafal 11:5)

⁸ Esap fansoun meinisin sia silei “än Kot angang.” (Álleani Än Salomon Afalafal 11:5.) Ei itiitin kapas “än Kot angang,” a wewe ngeni met i a atufichi an epwe fis, are met a mut ngeni an epwe fis ren an epwe apwénúetá letipan. Sise tongeni wesewesen silei iká pwata Jiowa a mutatá fisin och mettóch are met epwe féri ren an epwe álisikich. (Kölf. 37:5) A fókkun weires ach sipwe weweiti ena ussun chék weiresin ach weweiti mámmááritáán emén ménúkol lón luken inan, ewe mettóch ekkewe scientist rese mwo nge unusen weweiti tori iei.

9. Met sia tongeni poputá le ekieki atun sise silei met Jiowa epwe wesewesen féri ren an epwe álisikich?

⁹ Ach sise silei met Jiowa epwe wesewesen féri ren an epwe álisikich, a tongeni efisi ach sipwe tipemwárámwár le eáni eú kefil. Eli sipwe tipemwárámwár le pennúkú och mettóch ren ach sipwe alapaaló ach angang ngeni. Áwewe chék, ren ach ámecheresi nónnómun manawach are mwékút ngeni ikewe mi osupwangen chón afalafal ie. Are eli sipwe ekieki pwe Jiowa ese pwapwa rech iká ese fis met ewe sia achocho ngeni. Áwewe chék, inaamwo iká sia achocho le akkafalafal nge ese mwo wor néúch chón káé. Are, sia achocho lón eú angang lón án Jiowa mwicheich nge a chómmóng minen eppet mi áweiresi ena angang.

10. Ach sise wesewesen silei met Jiowa epwe féri, a atufichikich le ámááraatá menni napanap?

¹⁰ Pokiten sise wesewesen silei met Jiowa epwe féri, iwe a atufichikich le ámááraatá ekkewe napanap mi aúchea, áwewe chék ren tipetekison. A álisikich le weweiti pwe fansoun meinisin Jiowa a silei met mi kon múrinné. (Ais. 55:8, 9) Sia pwal káé ach sipwe unusen lúkúlúk pwe Jiowa epwe asopwéchúkich. Sia mwareiti Jiowa atun a sópwéch ach angangen afalafal, are eú angang lón an we mwicheich. (Kölf. 127:1; 1 Kor. 3:7) Iká a wor ekkóch mettóch ese fis lón ewe napanap sia ekieki, iwe a lamot sipwe chemeni pwe Jiowa a kúna mettóch meinisin. (Ais. 26:12) Sia féri wisach me sipwe sópweeló le lúkúlúk pwe i epwe pwal féri wisan. Sia lúkúlúk pwe epwe awora ewe emmwen mi lamot ngenikich, inaamwo iká ese pwal féri ren eú manaman ussun chék met a kan féri fán ekkóch lón fansoun lóóm.—Féf. 16:6-10.

11. Ikkefa ekkewe mettóch mi aúchea sia silei?

¹¹ Sia silei pwe fansoun meinisin, Jiowa i mi tong, pwúng, me tipáchem. Sia silei pwe a fókkun aúcheani met sia féri fán itan me fán iten chienach kewe chón lúkú. Me sia silei pwe fansoun meinisin, Jiowa a kan liiwini chókkewe mi túppwél ngeni.—Ipru 11:6.

SISE SILEI MET EPWE FIS LESOR ME PWONÓÓN

12. Met sia káé seni Jemes 4:13, 14?

¹² Álleani Jemes 4:13, 14. Sise silei met epwe fis ngeni manawach lesor me pwonóón. A tongeni weiweitá fisin chómmóng mettóch lón manawach, are sise tongeni nemeni. (SalAf. 9:11) Iwe pokiten ena, sise tongeni silei iká epwe sópwéch ach kókkót, are iká sipwe manaw ngeni fisin ach na kókkót.

13. Met meefiach fán ekkóch pokiten ese unus met sia silei an epwe fis lón fansoun mwach?

¹³ Eli epwe weires ach sipwe likiitú pokiten sise wesewesen silei met epwe fis lón fansoun mwach. Pwata? Eli sipwe lólilen ren met epwe fis, me ena mettóch a tongeni angealó ach pwapwa. A tongeni weiweitá fisin osukosuk lón manawach, are a tongeni mwittir fis ngenikich met mi fókkun alólilen, iwe a efisi ach sipwe fókkun letipechou me meefi weires. Me iká ese fis minne sia áneánei, a tongeni efisi ach sipwe lichippúng me letipengaw.—SalF. 13:12.

14. Ach pwapwa fóchófóch a lóngólóng wóón met? (Pwal ppii ekkewe sasing.)

¹⁴ Atun sia likiitú fán weires, a ánnetatá pwe ese lifilifil met epwe fis, nge sia angang ngeni Semach we lón láng pokiten sia tongei i. Ekkewe pwóróus lón Paipel, ra áiti ngenikich pwe sisap ekieki pwe Jiowa epwe túmúnúkich seni meinisin sókkun weires, me ese akkóta me mwan met epwe fis ngenikich. A silei pwe ach pwapwa ese lóngólóng wóón met epwe fis ngenikich lón fansoun mwach, nge a lóngólóng wóón ach kútta an emmwen me álleasochisi. (Jer. 10:23) Ach kútta an emmwen atun sia féri kefil, ussun itá sia apasa: “Iká fán letipen Jiowa, iwe sipwe manaw me féri ien me ien.”—Jem. 4:15.

15. Met sia silei ussun mwachkkan?

¹⁵ Sise silei met epwe fis iteiten rán, nge sia silei pwe Jiowa a pwonei ngenikich manaw esemuch lón láng are wóón fénúfan. Sia silei pwe i esap tongeni kapas chofona, me ese wor met epwe eppeti an epwe apwénúetá an kewe pwon. (Tait. 1:2) I chék a tongeni ‘osuni me lepopun mine epwe fis le sopolan, a pwal pwärätä seni ekewe fansoun lom mettoch resamwo fis.’ Meinisin met a osuni pwe epwe fis lón fansoun lóóm, ra fen pwénútá, me epwe pwal pwénútá meinisin met a osuni an epwe fis lón fansoun mwach. (Ais. 46:10) Sia fókkun lúkú pwe ese wor met epwe tongeni eppeti an epwe tongekich. (Rom 8:35-39) Epwe fang ngenikich tipáchem, ourur, me ewe péchékkúl mi lamot ngenikich pwe sipwe likiitú lón mettóch meinisin. Sia lúkúlúk pwe Jiowa epwe álisikich me efeiéchúkich.—Jer. 17:7, 8.

SISE TONGENI UNUSEN WEWEITI ÚKÚÚKÚN ÁN JIOWA SILEKICH

16. Met Jiowa a silei ussuch, me met sia meefi ren ach silei ena? (Kölfel 139:1-6)

¹⁶ Álleani Kölfel 139:1-6. Ewe Chón Férikich a silei mettóch meinisin ussuch. A silei popun sia eáni eú sókkun ekiek me memmeef, a pwal silei ekkewe mettóch sia apasa me met a nóm lón letipach. A pwal silei meinisin met sia féri me popun ach féri ena. King Tafit a erá pwe fansoun meinisin, Jiowa a mmólnetá me tufichin álisikich. A ifa me amwararen án ewe Samolun unuselapen láng me fénúfan, ewe Chón Féraatá mi unusen manaman, fókkun áfánnikich! Tafit a apasa: “Ei sokun silelap a fokun amwarar ngeniei, a pwal tekia ngeniei pwe üsap tongeni to won.”—Kölf. 139:6.

17. Eli pwata epwe weires ach sipwe lúkú pwe Jiowa a fókkun silefichiikich?

¹⁷ Eli pokiten ééreniach, ach lúkú me lóóm, are ekkewe mettóch mi fis ngeni ach famili, epwe áweiresi ach sipwe lúkú pwe Jiowa i emén Sam mi tong mi áfánnikich. Are eli sipwe meefi pwe met ekkewe sia mwáálliló wóór me lóóm a fókkun ngaw pwe Jiowa esap fókkun mochen silekich me a fókkun towaw senikich. Pwal mwo nge Tafit, a pwal meefi ena esin memmeef fán ekkóch. (Kölf. 38:18, 21) Are eli emén mi fókkun achocho le mochen siwili manawan me etipeeúfengeni ngeni án Kot kewe allúk, epwe ekieki, ‘Iká Kot a wesewesen weweitiei, iwe pwata epwe mochen úpwe likitaaló ewe manaw úa kinamwe le manaweni?’

18. Pwata a múrinné ach sipwe lúkú pwe Jiowa a silefichiikich lap seni pwisinkich? (Pwal ppii ekkewe sasing.)

¹⁸ Sia tongeni lúkú pwe Jiowa a silefichiikich lap seni pwisinkich. A kúna ach kewe apwangapwang, nge a weweiti met sókkun aramas sia mochen wiliiti, me a tongekich. (Rom 7:15) Atun sia mirititi pwe fansoun meinisin Jiowa a kúna met sókkun aramas sia tongeni wiliiti, epwe lapóló ach eáni ewe lúkúlúk mi lamot ngenikich ren ach sipwe angang ngeni fán túppwél me pwapwa.

19. Met sia silefichi ussun Jiowa?

¹⁹ Sia silei pwe Jiowa i mi tong. Ese fókkun wor tipemwárámwár ussun ena. (1 Jon 4:8) Sia silei pwe mettóch meinisin a apasa ach sipwe féri are sisap féri, a erenikich pokiten a tongekich me mochen ach sipwe eáni ewe manaw mi fókkun múrinné. Sia silei pwe Jiowa a mochen ach sipwe eáni manaw esemuch. A tufich ena pokiten a awora ewe méén kepich. Ena liffang méén kepich a alúkúlúkú ngenikich pwe sia tongeni sópwéch inaamwo iká sia kan mwámmwáálliló. (Rom 7:24, 25) Me sia pwal silei pwe “Kot a lapalap seni letipach me i a silei mettóch meinisin.” (1 Jon 3:19, 20) Jiowa a silei mettóch meinisin ussuch, me a lúkúlúk pwe sia tongeni sópwéch lón ach féri letipan.

20. Met epwe álisikich ach sisap kon aúreki met sise silei?

²⁰ Jiowa a erenikich meinisin met mi wesewesen lamot ach sipwe silei ussun. Ina pwata ese pwal lamot ach sipwe aúreki met sise silei, nge sia tongeni nefótófót wóón met mi kon aúchea. Ach féri ena, a pwáári ach unusen lúkúlúk wóón Jiowa, ewe “eman mi fokun silelap.” (Hiop 36:4) Inaamwo iká a aúkúk met sia tongeni weweiti iei, nge sia silei pwe Jiowa epwe chék sópweeló le ákkáiti ngenikich mineféén mettóch. Me sia pwapwa pwe esap fókkun wor múchchún ach káé mineféén pwóróus ussun ach we Kot mi amwarar.—SalAf. 3:11.