LESEN 19
KÉL 22 Mwúún A Fen Nemenem Amwo Epwele Waroto!
Met Sia Silei Ussun án Jiowa we Ránin Kapwúng lón Fansoun Mwach?
“Jiowa . . . ese mochen án emén epwe máló.”—2 PIT. 3:9.
MENLAPAN
Sia tongeni lúkúlúk pwe atun Jiowa epwe apwúngú aramas lón fansoun mwach, epwe féri fán pwúngiéch.
1. Pwata sia tongeni erá pwe sia nónnóm lón eú fansoun mi ammwétéres?
SIA nóm lón ei fansoun mi ammwétéres! Iteiten rán, sia kúna pwépwénúetáán án Paipel kewe oesini. Áwewe chék, sia kúna án “ewe kingen efeng” me “ewe kingen éér” okkuffengen pwe ra mochen nemeni ei fénúfan. (Tan. 11:40, NW) Sia kúna pwe kapas allimen án Kot we Mwú a afalafalfeil wóón unusen fénúfan me fite million aramas ra filaatá le angang ngeni Jiowa. (Ais. 60:22; Mat. 24:14) Me sia akkangei chómmóng mwéngé lón pekin ngún “lón fansoun mi fich.”—Mat. 24:45-47.
2. Met sia tongeni lúkúlúkú, nge met a lamot sipwe mirititi?
2 Jiowa a sópweeló le álisikich le weweéchúti ekkewe mettóch mi aúchea repwele fis ekiseló chék. (SalF. 4:18; Tan. 2:28) Sia tongeni lúkúlúk pwe atun epwe poputá ewe riáfféú mi lapalap, sipwe silei ekkewe mettóch a lamot ngenikich ren ach sipwe túppwél le likiitú me tittipeeúfengen atun ena fansoun mi áweires. Iwe nge, a lamot sipwe mirititi pwe a wor ekkóch mettóch sise silei ussun fansoun mwach. Lón ei lesen, sipwe akkomw pwóróusfengen pwata sia siwili met sia piin erá ussun ekkewe mettóch repwe fis. Mwirin, sipwe enniwili ekkóch ekkewe mettóch sia silei ussun fansoun mwach me ifa ussun Semach we lón láng epwe mwékút.
MINNE SISE FÓKKUN SILEI
3. Met sia fen erá ren ewe atun esap chúen suuk ngeni aramas ar repwe lúkú Jiowa, me pwata sia eáni ena ekiek?
3 Me lóóm, sia erá pwe atun epwe poputá ewe riáfféú mi lapalap, esap chúen suuk ngeni aramas ar repwe tongeni lúkú Jiowa me kúna manaw lón ewe Armaketon. Sia erá ena pokiten sia ekieki pwe meinisin met a fis atun ewe Noter, a liosuetá met epwe fis lón fansoun mwach. Áwewe chék, mwirin án Jiowa esipaaló asamen ewe waimw, ese chúen wor emén epwe tongeni tolong lón ewe waimw, ina popun sia ekieki pwe epwe pwal ina ussun atun epwe poputá ewe riáfféú mi lapalap, esap pwal chúen tufich ngeni emén an epwe lúkú Jiowa.—Mat. 24:37-39.
4. Pwata sisap chúen ekieki pwe meinisin met a fis lón fansoun Noa we, a liosuetá met epwe fis lón ach keei fansoun?
4 Itá mi pwúng ach erá pwe meinisin ekkewe mettóch mi fis atun ewe Noter ra liosuetá minne epwe fis lón fansoun mwach? Aapw, ese pwúng. Pwata? Pokiten ese mak ena lón ewe Paipel.a Ewer, mi pwúng pwe Jises a aléllééi “ránin Noa we” ngeni fansoun an nónnóm. Nge ese erá pwe meinisin met a fis lón fansoun Noa we, epwe ina pwénútáán met epwe fis lón fansoun mwach, áwewe chék ren ewe atun Jiowa a esipaaló asamen ewe waimw. Iwe nge, esap weween pwe sise tongeni káé seni pwóróusen Noa me ewe Noter.
5. (a) Met Noa a féri me mwen ewe Noter? (Ipru 11:7; 1 Piter 3:20) (b) Ifa ussun án Noa afalafal a léllé ngeni ach angangen afalafal lón ei fansoun?
5 Atun Noa a rong án Jiowa éúréúr, a pwáári pwe a wor an lúkú ren an fala ewe waimw. (Álleani Ipru 11:7; 1 Piter 3:20.) A pwal ina ussun, a lamot án chókkewe mi rong kapas allimen án Kot we Mwú repwe apwénúetá met ra rong. (Féf. 3:17-20) Piter a kér ngeni Noa “chón afalafala ussun pwúng.” (2 Pit. 2:5) Iwe nge, ussun met sia káé lón ewe lesen mwen ei, sise silei iká Noa a achocho le afalafal ngeni aramas meinisin wóón fénúfan me mwen ewe Noter. Lón ei fansoun, sia achocho le afalafal ngeni aramas meinisin wóón unusen fénúfan, me sia tinikken le fiti ena angang. Iwe nge, ese lifilifil úkúúkún ach achocho, nge sisap tongeni tikeri emén me emén aramas wóón ei fénúfan me mwen warotoon ewe sópwólóón. Pwata?
6-7. Pwata sia tongeni erá pwe esap tufich ach sipwe tour ngeni aramas meinisin wóón fénúfan mwen warotoon ewe sópwólóón? Áweweei.
6 Nengeni met Jises a apasa ussun ach angangen afalafal. A oesini pwe ewe kapas allim epwe afalafalfeil “wóón unusen fénúfan pwe epwe eú minen pwáraatá ngeni aramasen mwú meinisin.” (Mat. 24:14) A fen lapóló seni lóóm pwénúetáán ena oesini. Pwóróusen ewe Mwú, a fen kawor lón lap seni 1,000 fósun fénúfan, me ren álillisin ewe website jw.org, lape ngeni aramas wóón fénúfan lón ei fansoun ra tongeni káé kapas allimen ewe Mwúún Kot.
7 Iwe nge, Jises a pwal ereni néún kewe chón káé pwe resap tongeni ‘áwesi unusen ekkewe telinimw,’ are afalafal ngeni meinisin me mwen an epwe waroto. (Mat. 10:23; 25:31-33) Alon Jises kena ra pwal pwúng lón ach ei fansoun. A wor fite million aramas lón ach ei fansoun ra nóm ikewe a fókkun pinepin ie ach angangen afalafal. Pwal och, a wor fitepúkú ménúkol ra uputiw iteiten minich. Ina pwata esap tufich ach sipwe afalafal ngeni aramas meinisin wóón ei fénúfan mwen warotoon ewe sópwólóón, inaamwo iká sia fókkun achocho le afalafal ngeni aramas seni ‘meinisin mwú, einang, me kapas.’—Pwár. 14:6.
8. Ifa ewe kapas eis sia tongeni eáni ussun án Jiowa kapwúng lón fansoun mwach? (Pwal ppii ekkewe sasing.)
8 Iwe nge, a ppiitá ei kapas eis: Ifa ussun ren chókkewe ese suuk ngeniir ar repwe rong ewe kapas allim me mwen poputáán ewe riáfféú mi lapalap? Met Jiowa me Néún we, ewe a kewis an epwe apwúngú aramas, repwe féri ngeniir? (Jon 5:19, 22, 27; Féf. 17:31) Ewe wokisin ei lesen a lóngólóng wóón a erá pwe Jiowa “ese mochen án emén epwe máló.” Nge a mochen “meinisin repwe áier.” (2 Pit. 3:9; 1 Tim. 2:4) Inaamwo iká sia silei ekkena mettóch ussun Jiowa, nge ese mwo erenikich ifa ussun epwe apwúngú chókkewe ese suuk ngeniir ar repwe rong pwóróusen ewe mwú. Ewer, ese pwal lamot an epwe erenikich.
Met Jiowa epwe féri ngeni chókkewe eli ese mwo suuk ngeniir alen ar repwe rong ewe pwóróus allim mwen fisin ewe riáfféú mi lapalap? (Ppii parakraf 8)c
9. Met Jiowa a pwáári ngenikich lón ewe Paipel?
9 Jiowa a pwáári ngenikich me lón an we Kapas ekkóch ekkewe mettóch epwe féri. Áwewe chék, ewe Paipel a erenikich pwe Jiowa epwe amanawasefáli ekkewe aramas “rese pwúng,” chókkewe ese suuk ngeniir ar repwe káé ussun ewe pwóróus allim me ekkesiwili manawer. (Féf. 24:15; Luk 23:42, 43) Ena mettóch a pwal eppiietá fitu kapas eis mi aúchea.
10. Pwal ikkefa ekkewe kapas eis ra ppiitá?
10 Itá meinisin chókkewe mi máló atun ewe riáfféú mi lapalap repwe máffócholó me esap chúen wor ar ápilúkúlúkún manawsefál? Ewe Paipel a affata pwe atun ewe Armaketon, Jiowa me an we mwichen soufiu repwe nieló chókkewe mi ú ngeni me resap manawsefál. (2 Tes. 1:6-10) Nge ifa ussun ren ekkewe ekkóch áwewe chék ren ekkewe eli ra máló atun ewe riáfféú mi lapalap pokiten ra semmwen, are chinnap, are pokiten ra máló lón ákseten, are emén a nireló? (SalAf. 9:11; Sek. 14:13) Itá ekkóch me leir ra kapachelong lein ekkewe “rese pwúng” iir kewe repwe manawsefál lón ewe ótót séfé? Sise silei.
MINNE SIA SILEI
11. Ifa lóngólóngun án aramas repwe kúna kapwúng atun ewe Armaketon?
11 Sia silei ekkóch mettóch ussun minne repwe fis lón fansoun mwach. Áwewe chék, sia silei pwe lón ewe Armaketon, aramas repwe angei kapwúngúúr ren ifa ussun féfférúr ngeni pwiin Kraist kewe. (Mat. 25:40) Chókkewe mi kapwúngúló pwe iir siip, ra pwáári pwe ra álisaatá Kraist me ekkewe mi kepit. Sia pwal silei pwe ekkóch pwiin Kraist kewe repwe chúen nóm wóón fénúfan mwirin poputáán ewe riáfféú mi lapalap me repwap feitá láng mwen chék fisin ewe Armaketon. A tongeni fis pwe atun pwiin Kraist kewe ra chúen nóm fénúfan, epwe chúen suuk ngeni chókkewe mi letipwenechar ar repwe álisaatá chókkana me ewe angang ra féfféri. (Mat. 25:31, 32; Pwár. 12:17) Pwata ra aúchea ekkena pwóróus?
12-13. Eli epwe met meefien ekkóch mwirin ar kúna talóón “Papilon mi Lapalap”? (Pwal ppii ekkewe sasing.)
12 Pwal mwo nge mwirin poputáán ewe riáfféú mi lapalap, epwe tufich án ekkóch chókkewe mi kúna talóón “Papilon mi Lapalap” repwe chemeni pwe ren fite fite ier Chón Pwáraatá Jiowa ra fósun an epwe fis ena mettóch. Itá epwe ekkesiwil letipen chókkana mi kúna minne a fis?—Pwár. 17:5; Is. 33:33.
13 Iká a fis ena, iwe pwal ina met a fis lón Isip lón fansoun Moses we. Chemeni pwe a wor “chomong sokopaten mwichen aramas” ra fiti ekkewe chón Israel atun ra towu seni Isip. Ekkóch me leir eli ra poputá le eáni lúkú atun ra kúna pwe án Moses éúréúr ussun ekkewe Engol Riáfféú a pwénúetá. (Eks. 12:38) Iká epwe fis ena esin mwirin talóón Papilon mi Lapalap, iwe itá sipwe lichippúng ren án aramas tufichin fitikich me mwen warotoon ewe sópwólóón? Aapw sisap lichippúng! Sia mochen áppirú Semach we lón láng, ewe “Kot mi eäni ümöümöch me kirikiröch, songomang, pwal wöün tong me allükülük.”b—Eks. 34:6.
Ekkóch chókkewe mi kúna talóón “Papilon mi Lapalap” repwe chemeni pwe ren fite fite ier Chón Pwáraatá Jiowa ra fósun an epwe fis ena mettóch (Ppii parakraf 12-13)d
14-15. Itá án emén ápilúkúlúkún manaw tori feilfeiló a lóngólóng wóón ineet a máló are ia a nóm ie? Áweweei. (Kölfel 33:4, 5)
14 Fán ekkóch, eli emén chienach Chón Kraist epwe erá ei ussun emén aramasan are chón an famili ese angang ngeni Jiowa nge a máló: “A éch an máló mwen ewe riáfféú mi lapalap, pokiten epwe wor an ápilúkúlúkún manawsefál.” Ewer, a wor popun mi pwúng ach eáni ena esin memmeef. Nge án emén aramas ápilúkúlúkún manaw esemuch ese lóngólóng wóón ineet a máló. Jiowa, ewe Soukapwúng mi unuséch, iwe fansoun meinisin, minne a filaatá a pwúngiéch. (Álleani Kölfel 33:4, 5.) Sia tongeni lúkúlúk pwe “ewe Souapwüngün unusen fanüfan” epwe féri minne mi pwúng.—Ken. 18:25.
15 A pwal pwúng ach sipwe ekieki pwe án emén ápilúkúlúkún manaw tori feilfeiló ese lóngólóng wóón ia a nóm ie. Jiowa esap fókkun apwúngaló pwe fite million aramas iir siike pokiten chék ra nóm lón eú leeni ese suuk ngeniir ar repwe rong pwóróusen ewe Mwú me ie. (Mat. 25:46) Án ewe Soukapwúngún unusen fénúfan chúngú ekkena esin aramas, a lap seni ach chúngúúr. Sise silei ifa ussun Jiowa epwe akkóta ekkewe mettóch repwe fis atun ewe riáfféú mi lapalap. Eli epwe suuk ngeni ekkóch ekkena aramas alen ar repwe káé ussun Jiowa, lúkú i, úppós le peni atun epwe epinaaló pwisin i mwen mesen meinisin chón fénúfan.—Is. 38:16.
Mwirin poputáán ewe riáfféú mi lapalap, . . . itá epwe wor ekkóch epwe ekkesiwil letiper mwirin ar kúna fisin ekkewe mettóch?
16. Met sia silei ussun Jiowa? (Pwal ppii ewe sasing.)
16 Seni ach káé ewe Paipel, sia silei úkúúkún aúchean aramas me ren Jiowa. A fang manawen Néún we pwe kich meinisin sipwe tongeni eáni ewe ápilúkúlúkún manaw tori feilfeiló chék. (Jon 3:16) Kich meinisin sia fen meefi án Jiowa tong enlet. (Ais. 49:15) A silei iten emén me emén kich. Ren enletin, a fókkun silefichiikich pún ikáámwo sia máló, nge a tongeni amanawasefálikich pokiten a chemeni meinisin tichikin manawach me meinisin met sia chemeni. (Mat. 10:29-31) Ewer, a wor popun mi pwúng ach sipwe lúkúlúk pwe epwe unuséch án Semach we mi tong lón láng féri an kapwúng wóón emén me emén aramas pokiten a tipáchem, pwúng, me úméúméch.—Jem. 2:13.
Sia tongeni lúkúlúk pwe epwe unuséch án Jiowa féri an kapwúng wóón emén me emén aramas pokiten a tipáchem, pwúng, me úméúméch (Ppii parakraf 16)
17. Met sipwe pwóróusfengen wóón lón en lesen mwirin?
17 Pokiten sia silei ekkeei mineféén siwil lón ach weweiti ekkeei pwóróus, iwe a álisikich le mirititi pwe ach we angangen afalafal a fókkun atapwalapwal seni lóóm. Pwata sia erá ena? Me met a amwékútúkich ach sisap úkútiw le sópweeló le afalafala ewe pwóróus allim? Sipwe pwóróus wóón tichikin pélúwen ekkena kapas eis lón en lesen mwirin.
KÉL 76 Met Meefiom?
a Ren áweween popun an a wor ei ekkesiwil, ppii ei lesen itelapan, “Iei Usun Letipom” lón Ewe Leenien Mas minen March 1, 2015 p. 8-12.
b Mwirin katalóón Papilon mi Lapalap, meinisin néún Jiowa kewe chón angang repwe kúna sóssót atun ewe maun án Kok seni Makok. Meinisin mi peni néún Kot kewe aramas mwirin katalóón Papilon mi Lapalap, repwe pwal kúna sóssót.
c ÁWEWEEN SASING: Úlúngát sasing mi pwáári pwata eli ese tour ngeni ekkóch ach we angangen afalafal: (1) Emén fefin mi nóm ikewe a wor ie eú lamalam mi fókkun pinei án aramas repwe rong ewe kapas allim ie, (2) eú pean pwúpwúlú ra nóm ikewe mi allúk me efeiengaw án Chón Pwáraatá Jiowa repwe afalafal ie, me (3) emén mwán mi nóm lón eú leeni mi towaw, me aramas rese tongeni tikeri.
d ÁWEWEEN SASING: Emén fépwúl mi úkútiw le angang ngeni Jiowa, a chemeni met a káé ussun katalóón “Papilon mi Lapalap.” A siwil letipan me a filaatá le liwiniti Jiowa me liwinló ren seman kewe me inan Chón Kraist. Iká a fis ena sókkun, sia mochen áppirú án Semach we lón láng úméúméch me chúngú aramas, me sipwe pwapwa atun emén chón tipis a liwinsefál.