Ach Chiechiéch Ngeni Kot A Atoto Feiéch Ngenikich!

1-2. (a) Ifa ewe mettóch sipwe achocho ngeni ren ach sipwe chiechiéch ngeni emén? (b) Met sipwe pwóróus wóón lón ei lesen?

A WOR emén chienom oua chiechiéchfengen? Met ka féri pwe oupwe chiechiéchfengen? Eli ka awora óm fansoun ngeni, ppii met pwóróusen manawan, me met a sani me met ese sani. Ka kúna napanapan kewe mi múrinné ka mochen áppirú, me ka tongei chienom na.

² Ren ach sipwe chiechiéch me emén, a lamot ach sipwe awora ach fansoun ngeni. Pwal ina chék ussun ach chiechi ngeni Jiowa Kot. Lón ei lesen, sipwe pwóróus wóón ifa ussun sipwe ririéch ngeni Kot me ikkefa ekkewe feiéch sipwe kúna iká sia féri ena. Akkomw, sipwe ppii pwata a múrinné ach sipwe ririéch ngeni chienach na, Jiowa.

3. Pwata a lamot ach sipwe ekilonei ekkewe feiéch sipwe kúna ren ach chiechi ngeni Jiowa? Áweweei.

³ Ese mwáál ka fókkun tipeeú ngeni pwe ach chiechi ngeni Jiowa a fókkun múrinné. Nge ach ekilonei úkúúkún múrinnéén ach chiechi ngeni a tongeni amwékútúkich le sópweeló le riri ngeni. (Kölf. 63:​6-8) Áwewe chék, sia silei pwe a múrinné ngenikich ach sipwe fiti eú diet, taiso, annafa ach asésé, me únnúmmóng konik. Iwe nge, a chómmóng chókkewe rese féri ekkena mettóch, me rese túmúnú péchékkúlen inisiir. Nge ach ekkekieki úkúúkún feiéchún ach túmúnú péchékkúlen inisich, epwe álisikich le sópweeló le féri ekkena mettóch. Pwal ina chék ussun, eli sia silei pwe ach chiechi ngeni Jiowa a múrinné ngenikich, nge ach ekilonei met feiéchún ach chiechi ngeni epwe tongeni amwékútúkich le sópweeló ach chiechi ngeni Chiechiach na.—Kölf. 119:​27-30.

4. Ifa alon ewe soumakken kélfel lón Kölfel 73:28?

⁴ Álleani Kölfel 73:28. Ewe chón makkeei Kölfel 73, i emén chón Lifai mi kefilitá an epwe emén chón kél lón án Jiowa we imwenfel. A angang ngeni Jiowa fán túppwél ren fite ier. Iwe nge, a silei pwe a lamot an epwe chemeni pwe a múrinné ngeni me pwal ekkewe ekkóch ar repwe “kan ngeni Kot.” Ikkefa feiéchún ach féri ena?

ACH CHIECHIÉCH NGENI KOT A ATOTO PWAPWA

5. (a) Pwata ach chiechiéch ngeni Jiowa a atoto pwapwa? (b) Ifa ussun ewe tipáchem Jiowa a fang ngonuk a tongeni álisuk me túmúnuk? (Än Salomon Fos 2:​6-16)

⁵ Lapólóón ach chiechi ngeni Jiowa pwal ina lapólóón ach pwapwa. (Kölf. 65:4) A chómmóng popun sia tongeni pwapwa. Áwewe chék, atun sia álleani met Jiowa a erenikich lón ewe Paipel me álleasochisi, sia tipáchemeló. Ena esin tipáchem a túmúnúkich seni ekkewe mettóch mi tongeni efeiengawakich me a pwal túmúnúkich seni ach féri tipis mi chou. (Álleani Än Salomon Fos 2:​6-16.) Ina minne, ewe Paipel a erá: “A feiöch ewe aramas mi küna tipachem, a feiöch ewe aramas mi wewekai.”—SalF. 3:13.

6. Met a efisi án ewe soumakken kélfel esap chúen pwapwa?

⁶ Ewer, chienen Jiowa kewe ra pwal letipechou fán ekkóch. A péút seni ewe chón makkeei Kölfel 73 an pwapwa atun a eáni ekiek ese pwúng. Ena soumakken kélfel a poputá le ekieki pwe a apwapwa manawen ekkewe aramas mi ngaw inaamwo iká rese ekieki Kot are álleasochisi, iwe a song me lólówóitiir. A pwal mwo nge mocheniaiti ekkewe mettóch a nóm rer. A mwáál an ekiek ussun ekkewe aramas mi lamalamtekia me ekkewe chón féri féfférún akkachofesá pokiten a ekieki pwe ra kon wéúéch me péchékkúl, me ese pwal mwo nge wor ar weires. (Kölf. 73:​3-7, 12) Pokiten a kon osukosuk lón ekiekin ewe soumakken kélfel, iwe lón eú atun a meefi pwe ese wor aúchean an angang ngeni Jiowa. A fókkun letipechou me a erá: “Ellet a solap pwe üa tümwünü lelukei pwe epwe limöch, a solap ai üsap tipis.”—Kölf. 73:13.

7. Atun sia letipechou, met sia tongeni féri? (Pwal ppii ewe sasing.)

⁷ Inaamwo iká ewe soumakken kélfel a fókkun letipechou, nge a féri och mettóch pwe epwe siwili an ekiek. A tolong lón án Kot we imwenfel, ikewe Jiowa a áwena an ekiek me ie. (Kölf. 73:​17-19) Atun sia letipechou, Chiechiach we Jiowa a silei. Iká sia iótek ngeni fán iten an emmwen me etiwa ewe álillis a awora seni an we Kapas me ewe mwichefel, sia tongeni angei ewe péchékkúl ach sipwe sópweeló le angang ngeni pwal mwo nge atun sia letipechou. Inaamwo iká a luluuló ach aúrek, Jiowa epwe oururukich me ekinamwekich.—Kölf. 94:19.a

CHIECHIÉCH NGENI KOT A ATOTO MANAW MI MÚRINNÉ IEI ME ÁPILÚKÚLÚK

8. Pwal ikkefa ruu feiéch sipwe kúna ren ach chiechiéch ngeni Kot?

⁸ A pwal wor ruu feiéch sia tongeni kúna ren ach chiechiéch ngeni Kot. Áeúin, sia tongeni eáni eú manaw mi múrinné. Oruuan, a ngenikich eú ápilúkúlúk mi núkúchar fán iten mwachkkan. (Jer. 29:11) Iei sipwele etittinafichi ekkena feiéch.

9. Ifa ussun ach chiechiéch ngeni Jiowa a atoto ngenikich enletin pwapwa?

⁹ Sia tongeni eáni eú manaw mi múrinné atun sia chiechiéch ngeni Jiowa. Chómmóng aramas lón ei fansoun ra erá pwe ese wor emén Kot. Ina popun, rese silei pwata aramas ra nóm wóón ei fénúfan, me ra lúkú pwe esap chúen wor aramas lón mwachkkan. Iwe nge, seni met sia káé lón án Kot we Kapas, sia fókkun lúkú pwe Kot “i wesewesen emén, me i ewe chón liiwini chókkewe mi enletin kúkkútta i.” (Ipru 11:6) Pwal och, Jiowa a férikichetá fitifengen me ach mochen angang ngeni. Ina popun, atun sia féri ena sia meefi enletin pwapwa.—Tut. 10:​12, 13.

10. Met Jiowa a pwonei ngeni chókkewe mi lúkúlúk wóón i? (Kölfel 37:29)

¹⁰ Chómmóng aramas ese wor ar ápilúkúlúk fán iten mwachkkan. Ra chék akkangang, pwúpwúlú, néúnéú, me ammólnatá fán iten ar retire. Rese silei met Kot a pwonei fán iten mwachkkan. Iwe nge, néún Jiowa kewe chón angang ra eáni ápilúkúlúk wóón i. (Kölf. 25:​3-5; 1 Tim. 6:17) Sia lúkúlúk wóón ewe Kot sia chiechi ngeni, me sia lúkúlúk wóón met a eáni pwon ngenikich. A chómmóng mettóch mi múrinné sia ápilúkúlúkú lón mwachkkan, ákkáeúin ach fel ngeni lón Paratis tori feilfeiló chék.—Álleani Kölfel 37:29.

11. Met a fis atun sia chiechiéch ngeni Kot, me met a tongeni meefi?

¹¹ Ach chiechiéch ngeni Jiowa a échitikich lón sókkopaten napanap. Áwewe chék, Jiowa a pwonei pwe epwe omusaaló tipisich iká sia áier. (Ais. 1:18) Ina popun, sipwe otur senikich ewe watteen mengiringir sia meefi ren ekkewe tipis sia féri me lóóm. (Kölf. 32:​1-5) Pwal och, atun sia chiechi ngeni Jiowa, i a pwapwa. (SalF. 23:15) Ewer, a chómmóng mettóch mi múrinné mi fiffis ngenikich pokiten sia chiechiéch ngeni Kot. Iwe nge, ifa ussun sipwe sópweeló le chiechiéch ngeni Kot?

IFA USSUN SIPWE SÓPWEELÓ LE CHIECHI NGENI KOT?

12. Met ka fen féri pwe kopwe chiechiéch ngeni Kot?

¹² Iká ka fen papatais, ka fen féri chómmóng mettóch pwe kopwe wiliiti emén chiechien Jiowa. Ka fen káé chómmóng pwóróus mi enlet ussun Jiowa Kot me Jises Kraist, áier seni óm kewe tipis me lóóm, apéchékkúlaló óm lúkú Kot, me ka úppós le etipeeúfengeni manawom ngeni minne a mochen kopwe féri. Iwe nge, ren óm kopwe chiechiéch ngeni Kot, a lamot kopwe sópweeló le féri ekkena mettóch.—Kol. 2:6.

13. Ikkefa ekkewe úlúngát mettóch ra tongeni álisikich ach sipwe chichiechiéch ngeni Jiowa?

¹³ Met epwe álisikich ach sipwe chichiechiéch ngeni Jiowa? (1) A lamot sipwe sópweeló le álleani me káé ewe Paipel. Atun sia féri ena, sia mochen achocho ach sisap chék káé ekkewe pwóróus ussun Kot mi mecheres. Nge a lamot sipwe achocho le weweiti án Kot ekiek me met a mochen ach sipwe féri, me manaweni ewe manaw a mochen sipwe manaweni. (Efi. 5:​15-17) (2) A lamot sipwe apéchékkúlaló ach lúkú ren ach ekilonei ussun an pwáári an tongekich lón sókkopaten napanap. (3) A lamot sipwe sópweeló le oputa ekkewe mettóch Jiowa a oput me túmúnú senikich ekkewe sókkun aramas mi féri met mi ngaw.—Kölf. 1:1; 101:3.

14. Me ren 1 Korint 10:​31, ikkefa ekkóch mettóch sia tongeni féri iteiten rán pwe sipwe apwapwaai Jiowa? (Pwal ppii ekkewe sasing.)

¹⁴ Álleani 1 Korint 10:31. A lamot ach sipwe féri ekkewe mettóch mi apwapwaai Jiowa. Nge a pwal wor met a lamot sipwe féri me lúkún ach fiti ewe angangen afalafal me fiti ach kewe mwiich. A lamot pwe féfférúch iteiten rán epwe apwapwaai Jiowa. Áwewe chék, atun sia wenechar lón mettóch meinisin me fang ngeni ekkewe ekkóch met a wor rech, sia apwapwaai Jiowa. (2 Kor. 8:21; 9:7) I a pwal mochen sipwe pwáári ach aúcheani ewe manaw a fang ngenikich. Ina minne, sia túmúnú úkúúkún met sia mwéngé me ún, me sia féri pwal ekkóch mettóch pwe sipwe túmúnú péchékkúlen inisich. Atun Jiowa a kúna ach achocho le apwapwaai lón meinisin met sia féri, pwal mwo nge lón ekkewe mettóch mi kisikis, a lallapoló an tongekich.—Luk 16:10.

15. Met Jiowa a mochen ach sipwe féri ngeni aramas?

¹⁵ Jiowa a kirekiréch ngeni meinisin aramas, ekkewe mi angang ngeni me pwal ekkewe rese. (Mat. 5:45) I a pwal mochen ach sipwe kirekiréch ngeni aramas. Áwewe chék, sisap ‘eáni kapas mi ngaw ussun emén, sisap ánini, nge sipwe tipepwetete ngeni aramas meinisin.’ (Tait. 3:2) Iwe, inaamwo iká aramas rese lúkú Jiowa, nge sisap ekieki pwe sia tekia seniir. (2 Tim. 2:​23-25) Sia chiechiéch ngeni Jiowa ren ach kirekiréch me féfféréch lón meinisin met sia féri ngeni aramas meinisin.

SIA TONGENI CHIECHIÉCH NGENI KOT PWAL MWO NGE ATUN SIA MWÁÁLLILÓ

16. Met ewe soumakken Kölfel 73 a poputá le meefi mwirin och fansoun?

¹⁶ Fán ekkóch, eli kopwe meefi pwe Jiowa ese mochen chiechi ngonuk pokiten ka kan mwámmwáálliló. Nge chemeni met a pwal fis ngeni ewe soumakken Kölfel 73. A apasa: ‘Ekis ngeni chok pechei keei repwe chepetek, ekis ngeni chok upwe faselo ren ai fefetal.’ (Kölf. 73:​2, Testament mi Fö) I a mirititi pwe letipan a “chou” me ‘ese weweiti och’ “usun chök eman man” mwen mesen Jiowa. (Kölf. 73:​21, 22) Nge itá a meefi pwe Jiowa ese chúen tongei me esap chúen omusaaló tipisin pokiten an kewe mwáál?

17. (a) Inaamwo iká ewe soumakken kélfel a meefi lichippúng, nge met a féri? (b) Met sia káé seni pwóróusan? (Pwal ppii ekkewe sasing.)

¹⁷ Iká ewe soumakken kélfel a ekieki pwe Jiowa a likitaaló, eli a chék meefi ena lón ekis fansoun. Inaamwo iká a fókkun meefi lichippúng, nge a silei pwe a lamot epwe chiechiéch ngeni Jiowa. Iei met a makkeei: “Ngang üa chök nonom reöm [Jiowa] fansoun meinisin, pun en ka amwöchü pöüifichi. Ka emweniei fän om öüröür, nge mürin kopwe etiwaei lon ling.” (Kölf. 73:​23, 24) Sia pwal mochen tingorei Jiowa an epwe apéchékkúlakich atun sia meefi pwe a apwangapwang ach lúkú are atun sia meefi lichippúng ren mwáállich kewe. (Kölf. 73:26; 94:18) Inaamwo iká sia féri tipis mi chou, nge sia chúen tongeni liwiniti Jiowa me lúkúlúk pwe epwe ‘amusala tipisich.’ (Kölf. 86:5) Atun a watte ach lichippúng, a fókkun lamot ach sipwe chiechiéch ngeni ach we Kot.—Kölf. 103:​13, 14.

CHIECHIÉCH NGENI KOT TORI FEILFEILÓ

18. Pwata ese wor kaúkún ach sipwe chiechi ngeni Jiowa?

¹⁸ Ese wor kaúkún ach sipwe chiechi ngeni Jiowa me úkúúkún ach sipwe silefichi i. Ewe Paipel a apasa pwe án Jiowa ekiek, an tipáchem, me an sile ra fókkun ‘alóllóól,’ ese wor kaúkún. (Rom 11:33) Sia tongeni káé ussun i tori feilfeiló.

19. Ifa ewe mettóch Kölfel 73 a alúkúlúkú ngenikich?

¹⁹ Kölfel 79:13 a apasa: “Äm noum aramas, ewe mwichen sipen om mälämäl, äm aipwe kilisou ngonuk tori feilfeilachök. Seni eu täppin aramas tori eu täppin äm aipwe mwareituk.” Atun ka chichchiechi ngeni Kot, ka pwal tongeni lúkúlúk pwe epwe efeiéchuk tori feilfeiló me ka tongeni apasa fán lúkúlúk: “Kot ai pöchökül pwal wisei tori feilfeilachök.”—Kölf. 73:26.