Ewe Méén Kepich, án Kot Liffang mi Lapalap Seni Meinisin

1, 2. (a) Met sókkun liffang a kon aúchea ngonuk? (b) Pwata ewe méén kepich eú liffang mi aúchea seni meinisin ka tongeni angei?

IFA ewe liffang mi lap seni meinisin ka fen angei? Sap minne aúchean eú liffang epwe alóngólóng wóón watteen liwinin. Popun, pún enletin aúchean ese alóngólóng wóón moni. Nge ika eú liffang a apwapwaai letipom are ataweei och osupwang lón manawom, iwe a fókkun aúchea ngonuk.

² Mi wor eú liffang mi kkóló aúchean seni meinisin ka tongeni angei. Ina án Jiowa Kot we liffang ngeni aramas. A fen ngenikich chómmóng mettóch nge ewe mi aúchea seni meinisin, ina ewe méén kepich ren Néún we, Jesus Kraist. (Álleani Mateus 20:28.) Sipwele kúna lón ei sópwun pwe ewe méén kepich a aúchea seni liffang meinisin ka tongeni angei pún a tongeni atoto reom pwapwa chapur me ataweei óm kewe watteen osupwang. Ewe méén kepich, ina esissillen án Jiowa tongeok mi kon lapalap.

MET WEWEEN EWE MÉÉN KEPICH?

3. Met weween ewe méén kepich? Met a lamot sipwe akkomw weweiti ren ach sipwe mirititi aúchean ei liffang?

³ Ewe méén kepich, ina ewe mettóch Jiowa a awora pwe epwe angasaaló are seláni aramas seni tipis me máló. (Efisos 1:7) Sia tongeni mirititi weween me aúchean ewe méén kepich fán itach ika sia akkomw weweiti met a fis lón Eten me met a péút seni Atam atun a tipis.

4. Met weween án Atam eáni manaw mi unuséch?

⁴ Lupwen Jiowa a fératá Atam, a liffang ngeni manaw mi unuséch, nge ina eú mettóch mi fókkun aúchea. Ekieki mwo weween ena mettóch ngeni Atam. Pokiten inisin me ekiekin ra unuséch, iwe esap tongeni semmwen, chinnapeló are máló. A pwal sókkóló aúchean an ririéch ngeni Jiowa. Ewe Paipel a apasa pwe Atam, “nöün Kot.” (Lukas 3:38) Ina minne, Atam a pwapwaiti an ririéch ngeni Jiowa Kot, usun chék emén nau ngeni seman we mi tong. Jiowa a kan pwóppwóróus ngeni Atam, néún we wóón fénúfan, iwe a ewisa ngeni angang mi apwapwa me áiti ngeni met a mochen epwe féri.​—Keneses 1:28-30; 2:16, 17.

5. Met weween alon Paipel lupwen a apasa pwe Atam a ffér lón ‘lapalapen’ Kot?

⁵ Atam a ffér lón ‘lapalapen’ Kot. (Keneses 1:27) Esap weween pwe Atam a nikinikin Kot. Sia fen káé lón Sópwun 1 lón ei puk pwe sise tongeni kúna Jiowa pwe i emén Ngún. (Johannes 4:24) Iwe inisin Jiowa esap futuk me chcha. Án Atam ffér lón napanapen Kot a wewe ngeni pwe a eáni ekkewe napanap mi nóm ren Kot, pachelong tong, tipachem, pwúng me manaman. Atam a pwal usun Seman we pún a nóm ren ewe tufichin pwisin filatá. Ina minne, Kot a fératá Atam pwe epwe sókko seni ekkewe man. Atam a tongeni filatá met epwe féri me filatá lefilen minne mi pwúng me mwáál. Ika a filatá le álleasochisi Kot epwe manaw tori feilfeiló lón Paratis wóón fénúfan.

6. Met a péút seni Atam pokiten an álleasolapa Kot me ifa usun a kkúú mwirimwirin kewe?

⁶ Iwe, a ffat pwe lupwen Atam a álleasolapa Kot, a fókkun watte liwinin tipisin, weween a péút seni manawan we mi unuséch fitifengen me feiéchún kewe meinisin. A pwal kúna kapwúngún máló. (Keneses 3:17-19) Solapan pwe ena esin manaw mi aúchea ese chék péút seni Atam pwe pwal seni mwirimwirin kewe. Iei alon án Kot we Kapas: “Ren eman mwän [Atam] tipis a tolong lon fanüfan, nge an tipis a atoto mäla. Iei popun mäla a tori aramas meinisin, pun ir meinisin ra tipis.” (Rom 5:12) Pwúngún, kich meinisin sia álemwiri tipis seni Atam. Ina minne, ewe Paipel a apasa pwe a atolonga i me mwirimwirin kewe “fän nemenien tipis” me máló. (Rom 7:14) Ese wor án Atam are Efa ápilúkúlúk pún ra pwúkún filatá le álleasolapa Kot. Nge ifa usun kich mwirimwiriir kewe?

7, 8. Ikkefa ruu weween ewe mettóch méén kepich?

⁷ Jiowa a seláni aramas ren ewe méén kepich. Met weween eú méén kepich? Mei wor ruu weween. Áeúin, eú méén kepich, iei liwinin ngaselóón are méénsefálin och mettóch. Áwewe chék, ina och liiwin epwe angasaaló emén semirit seni ewe chón sú fan. Oruuan, eú méén kepich, iei liwinin och mettóch. Ren chék áwewe, ika emén a atai och pisek epwe ménatiw nge epwe chék léllé ngeni liwinin ewe pisek a atai.

⁸ Iwe, ifa usun epwe tongeni tufich le méénisefáli ewe watteen mettóch a péút senikich pokiten tipisin Atam me pwal angasakich seni tipis me máló? Sipwe káé usun ewe méén kepich Jiowa a awora me met lamotan ngonuk.

IFA USUN JIOWA A AWORA EWE MÉÉN KEPICH?

9. Met sókkun méén kepich epwe kawor?

⁹ Pokiten a péútúló manawen ewe aramas mi unuséch, iwe manawen emén ese unuséch esap tongeni méénisefáli. (Kölfel 49:7, 8) A lamot epwe wor eú méén kepich mi léllé aúchean ngeni minne a péútúló. Ei a tipeeú ngeni ewe allúk fán iten minne mi pwúng lón Paipel, ewe mi apasa, “Oupwe liwini manau ngeni manau.” (Tuteronomi 19:21) Iwe met epwe tongeni méénisefáli ewe manaw mi unuséch, ewe Atam a péútaaló? Epwe kawor manawen pwal emén aramas mi unuséch.​—1 Timoty 2:6.

10. Ifa usun Jiowa a awora ewe méén kepich?

¹⁰ Ifa usun Jiowa a awora ewe méén kepich? A tiinaato emén me lein néún kewe chónláng mi unuséch. Nge Jiowa ese chék tiinaato ese lifilifil emén me lein ekkewe chónláng. Nge a tiinaato Néún we áláemén, ewe a aúcheani lap seni meinisin. (Álleani 1 Johannes 4:9, 10.) Néún na a tipemecheresin likitaló pwúkún leenian we lón láng. (Filipi 2:7) Sia fen káé lón sópwun rúáánú pwe Jiowa a féri eú manaman le siwilielong manawen Néún we lón án Maria we leenien ménúkol. Ren án Kot we manaman mi fel, Jesus a uputiw nge i emén aramas mi unuséch me ese nóm fán kapwúngún liwinin tipis.​—Lukas 1:35.

11. Ifa usun a tufich ngeni emén chék mwán epwe awora méén kepich fán iten fite million?

¹¹ Ifa usun a tufich ngeni emén chék mwán epwe awora méén kepich fán iten fite million? Iwe, ifa usun aramas meinisin ra wiliti chón tipis? Chemeni pwe ren án Atam tipis, a péút seni an epwe eáni ewe mettóch mi aúchea, manaw mi unuséch. Ina popun, ese tongeni ngeni mwirimwirin kewe manaw mi unuséch nge fen tipis me máló. Lón Paipel, Jesus a iteni “ewe amüchülan Atam,” iwe a eáni manaw mi unuséch pún ese tipis fán eú. (1 Korint 15:45) Weween pwe Jesus a siwili Atam pwe epwe amanawakich. Ren an fangóló manawan we mi unuséch me unusen álleasochisi Kot, a ménatiw liwinin tipisin Atam. Ina minne, Jesus a awora ápilúkúlúk allim ngeni mwirimwirin Atam kewe.​—Rom 5:19; 1 Korint 15:21, 22.

12. Met Jesus a ánnetatá ren an kúna riáfféú?

¹² Ewe Paipel a tichiki ewe riáfféú Jesus a likiitú fan me mwen an we máló. A kawet, chúfélútá me riáfféún máló wóón efóch iráán ninni. (Johannes 19:1, 16-18, 30; Pwal Ekkóch Áwewe, lón ewe lesen “Itá Ekkewe Chón Kraist Repwe Néúnéú Irápenges lón Ar Fel?”) Pwata Jesus a kúna riáfféú watte? Iwe Satan a efisi tipemwaramwar ren an erá pwe ese wor emén epwe amwéchú an tuppwél ngeni Jiowa ika a kúna sóssót. Sipwap káé tichikin ena pwóróus lón eú me lein ekkena sópwun mwirin. Jesus a pélúwenéchú án Satan tipimwáál ren an likiitú fán watteen riáfféú. A ánnetatá pwe emén mi unuséch me a wor an tufichin pwisin filatá, a tongeni amwéchú enletin an tuppwél ngeni Kot, ese lifilifil met ewe Tefil epwe féri. Ese mwáál Jiowa a fókkun chengel ren tuppwélún Néún we mi áchengicheng!​—Än Salomon Fos 27:11.

13. Ifa usun a kamétiw ewe méén kepich?

¹³ Ifa usun a kamétiw ewe méén kepich? Lón Nisan 14, lón ewe ier 33, lón néún chón Jus we pwinin maram, Kot a mutatá ninniilóón Néún we mi unuséch. A ina usun án Jesus asoresini manawan we mi unuséch “fän eu chök, nge a naf ngeni fansoun meinisin.” (Ipru 10:10) Lón ewe aúlúngátin rán mwirin málóón Jesus, Jiowa a amanawasefáli lón ngún. Iwe lón láng Jesus a mwe ngeni Kot aúchean manawan mi unuséch pwe ina ewe méén kepich a méénisefáli mwirimwirin Atam kewe. (Ipru 9:24) Jiowa a etiwa aúchean án Jesus asor pwe ina méén kepichin aramas seni fétekin tipis me máló.​—Álleani Rom 3:23, 24.

LAMOTEN EWE MÉÉN KEPICH NGONUK

14, 15. Met sipwe féri ika sia mochen pwe epwe ‘musala ach tipis’?

¹⁴ Sia tongeni kúna feiéch mi lapalap seni ewe méén kepich inaamwo ika kich chón tipis. Sipwele káé usun ekkóch feiéch ena liffang mi kon aúchea seni Kot epwe atoto rech lón ei fansoun me pwal lón mwachkkan.

¹⁵ Omusomusen tipis. A mmen weires ach sipwe féri minne mi pwúng pokiten sia álemwiri tipis seni popuch kewe. Kich meinisin sia tipis lón ach kapas are féffér. Nge sipwe tongeni kúna ‘pwe a musala ach tipis’ ren án Jesus we méén kepich. (Kolose 1:13, 14) Iwe nge, sipwe enletin aier pwe epwe musoló tipisich. Sipwe pwal tipetekison le tingor omusomus seni Jiowa nge epwe alóngólóng wóón ach lúkú án Jesus we méén kepich.​—Álleani 1 Johannes 1:8, 9.

16. Met a atufichikich le fel ngeni Kot ren eú mwelien letip mi liméch? Ifa aúchean ena sókkun mwelien letip?

¹⁶ Mwelien letip mi liméch mwen mesen Kot. Mengiringirin mwelien letipach a tongeni efisi ápilúkúlúkúngaw me ámmeef ngenikich pwe ese wor lamoten manawach. Iwe nge, ren án Jiowa kirekiréch me tufichin musolóón tipis ren ewe méén kepich, sia tongeni fel ngeni Jiowa ren mwelien letip mi liméch, inaamwo ika sise unuséch. (Ipru 9:13, 14) Ina minne, sia tongeni arap ngeni Jiowa lón iótek nge esap wor eppetin. (Ipru 4:14-16) Ika mwelien letipach a chék lilliméch, epwe kinamwe ekiekich, watteeló ach aúcheani manawach me lapóló pwapwaach.

17. Ikkefa ekkewe feiéch sipwe tufichin kúna pokiten án Jesus máló fán ásengesich?

¹⁷ Ewe ápilúkúlúkún manaw esemuch lón paratis wóón fénúfan. Rom 6:23 a apasa, “Liwinin tipis mäla.” A pwal erá, “Nge än Kot lifang manau esemüch lon Kraist Jesus ach Samol.” Lón Sópwun 3 lón ei puk, sia fen káé usun ekkewe feiéch sipwe kúna lón ewe Paratis wóón fénúfan. (Pwärätä 21:3, 4) Án Jesus máló fán ásengesich a atufichi ekkena feiéch meinisin pachelong manaw esemuch lón inis mi unuséch. Ika sia mochen kúna ekkena feiéch, a lamot sipwe pwáraatá ach kilisou ren ewe liffangen méén kepich.

IFA USUN KA TONGENI PWÁRAATÁ ÓM KILISOU?

18. Met popun sipwe kilisou ngeni Jiowa ren an awora ewe méén kepich?

¹⁸ Pwata sipwe fókkun kilisou ngeni Jiowa ren ewe méén kepich? Ika emén chón liffang a áeá watteen fansoun, péchékkúl are moni, iwe an na liffang a kon aúchea. A chúng letipach lupwen eú liffang a pwáraatá enletin án ewe chón liffang tongekich. Iwe, ewe méén kepich ina ewe liffang mi aúchea seni meinisin pún minne Kot a pennúkúóló a fókkun lapalap. Johannes 3:16 a apasa, “Kot a echeni chon fanüfan, pwe a fangala Nöün Aleman.” Ewe méén kepich ina ewe pisekin ánnet a kon pwári án Jiowa tongekich. A pwal ánnetatá án Jesus tong pún a tipeeú ngeni an epwe fangóló manawan fán ásengesich. (Álleani Johannes 15:13.) Ina minne, ewe liffangen méén kepich a alúkúlúkúkich pwe Jiowa me Néún we ra tongei emén me emén leich.​—Kalatia 2:20.

19, 20. Ifa usun ka tongeni pwáraaló óm kilisou ngeni Kot ren an liffangen méén kepich?

¹⁹ Iwe, ifa usun ka tongeni pwáraatá óm kilisou ren án Kot liffangen méén kepich? Akkomw, kopwe sileeló ewe Chón Liffang mi Lapalap, Jiowa. (Johannes 17:3) Atun kopwe kákkáé Paipel ren álillisin ei puk, kopwe silefichi Jiowa, iwe óm tongei epwe lallapóló. Iwe mwirin, óm tong epwe amwékútuk le mochen apwapwaai i.—1 Johannes 5:3.

²⁰ Pwáraaló óm lúkú án Jesus we asoren méén kepich. Iei alon Paipel usun Jesus: “Iö a lükü ewe Nau a eäni manau esemüch.” (Johannes 3:36) Ifa usun sipwe tongeni pwáraaló ach lúkú Jesus? Esap chék ren kapas. James 2:26 a apasa pwe lúkú “a mäla are ese fiti föför.” Ewer, lúkú mi enlet a pwáló ren ach “föför.” Eú alen ach pwáraaló pwe sia lúkú Jesus ren ach achocho le ákkáppirú i, sap chék lón ach kapas nge pwal lón ach féffér.​—Johannes 13:15.

21, 22. (a) Pwata a lamot sipwe fiffiti ewe Fááfen Ach Samol iteiten ier? (b) Met Sópwun 6 me 7 repwe áweweei?

²¹ Kopwe fiffiti ewe Fááfen Ach Samol iteiten ier. Lón ewe pwinin Nisan 14, lón ewe ier 33, Jesus a poputááni eú mettóch mi kkóló aúchean, iwe ewe Paipel a eita ngeni “ewe mongö än ach Samol.” (1 Korint 11:20; Mateus 26:26-28) Ena rán a pwal iteni Áchechchemen málóón Kraist. Jesus a poputááni ewe Áchechchem pwe epwe álisi néún kewe aposel me meinisin chókkewe mi wiliti chón Kraist mi enlet le chechchemeni pwe ren an máló, a fangóló manawan mi unuséch pwe epwe eú méén kepich. Iei alon Jesus usun ena fansoun mi aúchea: “Oupwe föri ei pwe oupwe chechemeniei.” (Lukas 22:19) Ach fiffiti ena Áchechchem a áchema ngenikich usun ewe tong mi lapalap Jiowa me Jesus ra pwáraaló ren ewe méén kepich. Sia tongeni pwáraaló ach kilisou ren ewe méén kepich ren ach fiffiti Áchechchemen málóón Jesus iteiten ier.a

²² Án Jiowa awora ewe méén kepich, ina eú liffang mi wesewesen aúchea. (2 Korint 9:14, 15) Sópwun 6 me 7 repwe áweweei ifa usun ena liffang epwe efeiéchú pwal mwo nge chókkewe mi fen máló.